अबराम, लूत के छंडातोर
14
सिनार राज चो राजा अमरापेल, एलासार राज चो राजा अरयोक, एलाम राज चो राजा कदोरलाओमेर आउर गोयीम राज चो राजा तिदाल चो दिनमन ने असन होली, 2 हुन राजामन, सदोम राज चो राजा बेरा, अमोरा राज चो राजा बिरसा, अदमा राज चो राजा सिनाब, सबोयीम राज चो राजा समेबेर, आउर बेला चो राजा (बेला के सोअर बले बलुआत) ए राजामन चो बिरुद लड़ई करला। 3 ए पांचझन राजामन लोनचर-तरई लगे सिद्दीम नाव चो घाटी थाने गोटोक सोर होला। 4 एमन बारा बरक ले कदोरलाओमेर चो तलेया ने रला, मानतर तेरवां बरक ने हुनमन राजा चो बिरुद करला। 5 चवदवां बरक ने कदोरलाओमेर आउर हुनचो संग चो राजामन एउन असतरोत-करनेम ने रपाईमन के, हाम ने जूजियामन के, साबे-किरयातेम ने एमीमन के, 6 आउर सेईर नाव चो डोंगरीमन ने होरीमन के हराउन एल-पारान नाव चो टंग-टंगा भाटा लगे अमरला। 7 हुताले बोहड़ुन हुनमन एन-मिसपात ने ईला जेके कादेस बले बलुआत, आउर अमालेकीमन चो सपाय राज के आउर एमोरीमन के बले जीतला, जोन हससोन-तामार ने रते रला। 8 तेबे सदोम, अमोरा, अदमा, सबोयीम आउर बेला चो राजा (बेला के सोअर बले बलुआत) निसकला, आउर सिदीम घाटी ने हुनमन ले लड़ई करतो काजे छेकला 9 बललोने, एलाम चो राजा कदोरलाओमेर, गोयीम चो राजा तिदाल, सिनार चो राजा अमरापेल आउर एलासार चो राजा अरयोक, (ए चारो राजामन) हुन पांचझन राजामन के छेकला। 10 सिदीम नाव चो घाटी ने खुबे डामर खोदरामन रली; सदोम आउर अमोरा चो राजामन चो सेनामन परातोदांय कोनी-कोनी हुनी खोदरामन ने घसरला, आउर बाचलो लोग डोंगरी ने पराला। 11 तेबे हुन चार झन राजामन सदोम आउर अमोरा चो सपाय धन-माल आउर खातो तीजमन के झीका-उड़मा करुन नीला; 12 आउर हुन राजामन अबराम चो भाई-बेटा लूत आउर हुनचो धन-माल के बले आपलो संगे धरुन नीला, जोन सदोम ने रते रलो।13 तेबे राजामन ले बाचुन परालो गोटोक मनुक जाउन इबरानी अबराम के ए खबर सांगलो। हुदलदांय अबराम, एमोरी बंस चो ममरे चो बांज रूकमन चो पदर ने रते रये। हुन एसकोल आउर आनेर चो भाई रये। हुनमन अबराम संगे बायदा करुन रओत। 14 आपलो भाई-बेटा के बांधुन नेयसोत सुनुन अबराम आपलो घरे जनमलो तीन सव अठारा पक्का लड़ई सीखलो कमेयामन संगे दान अमरतले हुनमन के खेदुन नीलो। 15 अबराम आपलो कमेयामन के अलग-अलग गोहड़ी बनाउन राती बेरा हुनमन के जीतला आउर मारते-मारते दमिसक चो डेबरी बाटे होबा अमरतले खेदुन नीला 16 आउर सपाय धन-माल के बोहड़ाउन आनलो बललोने, आपलो भाई-बेटा लूत, हुनचो धन-माल, बायलेमन आउर बांदुन नीलो सपाय लोगमन के आनलो।
मलकिसिदक, अबराम के बर देतोर
17 अबराम, कदोरलाओमेर आउर हुनचो संग चो राजामन के जीतुन एतो बेरा सदोम चो राजा, साबे घाटी लगे हुनके भेटुक ईलो, जेके राजा चो घाटी बलुआत। 18 तेबे सालेम चो राजा मलकिसिदक, सबुले बड़े महापरभु चो पुजारी, रोटी आउर अंगुर-रस धरुन ईलो, 19 हुन, अबराम के बर दिलो:
“उपरपुर आउर मंजपुर के बनाउ,
सबुले बड़े महापरभु बाटले तुय धन-धन हो;
20 आउर सबुले बड़े महापरभु धन-धन होओ,
जोन तुचो बयरीमन के तुचो तलेया ने करुन दिलो!”
तेबे अबराम सपाय तीजमन ले हुनके दसवां बाटा दिलो। 21 सदोम चो राजा अबराम के बललो, “लोगमन के मोके देस आउर धन-माल के तुय धर।” 22 अबराम, सदोम चो राजा के बललो, “सबुले बड़े महापरभु जहोवा उपरपुर आउर मंजपुर के बनालोसे, 23 मय हुनचो किरिया खायंसे, जोन बले तुचो आय हुन थान ले, गोटोक छिदरी नोहले पनई डोरी नोहले काई तीज के बले मय नी धरें कि तुय बलुक नी सक, ‘अबराम मोचो किरता सवकार होलो।’ 24 मोचो संगे गेलो जुवानमन जोन बले खादलासे हुनी मोचो बाटा रओ। मानतर मय आनेर, एसकोल आउर ममरे के काई नी दिलेसे, एमन के आपलो-आपलो बाटा मिरो।”