अबराम आउर लूत भिने होतोर
13
तेबे अबराम आपलो बायले आउर धन-माल के धरुन लूत संगे मिसर देस् के छांडुन कनान देस् चो दखिन राज नेगेव ने ईलो।2 अबराम छेरी-मेंडी, गाय-बयला आउर सोन-रूप चो खुबे बड़े सवकार रये। 3 फेर हुन नेगेव ले निकरलो आउर बुलते-बुलते बेतेल लगे हुनी ठान ने अमरलो जोन थाने हुन आगे आपलो तमु गाड़ु रये, हुन बेतेल आउर एय सहर चो मंजिगता आसे, 4 ए थाने हुन आगे बले बेदी बनाउन रलो; अबराम फेर हुता जहोवा ले पारथना करलो। 5 अबराम संगे जातो लूत के बले छेरी-मेंडी, गाय-बयला आउर तमुमन रओत। 6 हुन देस् ने एमन दुनो संगे रउक सकतो असन ठान नी रये; कसनबलले ए दुनो लगे खुबे धन-माल रये, 7 अबराम आउर लूत चो गाय-बयला आउर छेरी-मेंडीमन चो धोरईमन झगड़ा होला। हुदलदांय हुन देस् ने कनानीमन आउर परिजीमन बले रते रओत।
8 तेबे अबराम, लूत के बललो, “आमी गोटकी कुटुम चो लोग आंव। एईकाजे मय आउर तुय आउर आमचो धोरईमन चो मंजी झगड़ा नी होओ। 9 काय, गुलाय राज ने ठान नीआय? एईकाजे तुय मोचो ले भिने हो। तुय डेबरी बाटे गेलीस जाले, मय उजा बाटे जायंदे; आउर तुय उजा बाटे गेलीस जाले, मय डेबरी बाटे जायंदे।” 10 तेबे लूत, जरदन नंदी लगे चो पानी झपालो भुंय के दखलो। एता चो भुंय, सोअर सहर अमरतले, जहोवा चो पदर आउर मिसर देस् चो असन खुबे खतउ रये। सदोम आउर अमोरा के जहोवा नास नी करतो ले आगे ए भुंय खुबे खतउ रली। 11 एईकाजे लूत जरदन नंदी लग चो हुन खतउ भुंय के आपलो काजे बाछलो; आउर बेर उदिया बाटे गेलो। असन बरन ने हुन दुनो भिने होला। 12 अबराम, कनान देस् ने बसापत करलो। लूत, सदोम रेटे आपलो तमु गाड़लो आउर हुन सहरमन लगे रउक मुरियालो। 13 जहोवा चो नंजर ने सदोम चो लोगमन खुबे दुसट आउर पापी रओत।
अबराम हेबरोन ने जातोर
14 लूत आउर अबराम भिने होलो पाछे जहोवा, अबराम के बललो, “तुचो रतो ठान ले बेर उदतो, बेर बसतो, आउर बेर उदतो उजा बाटे, बेर उदतो डेबरी बाटे भोंवरक दख। 15-16 कसनबलले दखा देतो सपाय भुंय के मय, तुके आउर तुचो थर-लर के जुग-जुग काजे देयंदे। मय तुचो थर-लर के मंजपुर चो बारु असन जन बनायंदे; जोन मंजपुर चो बारु के गनुक सकेदे, हुनी तुचो थर-लर के बले गनुक सकेदे। 17 उठ, ए राज चो लाम-ओसार ने हिंडा-बुला हो, कसनबलले ए राज के मय तुकेईची देयंदे।” 18 एचो पाछे अबराम तमु सकलुन हेबरोन ने ममरे चो बांज रूकमन चो पदर ने जाउन रउक मुरियालो, आउर हुता बले जहोवा काजे गोटोक बेदी बनालो।