महापरभु, अबराम के हागदेतोर
12
तेबे जहोवा, अबराम के बललो, “आपलो देस्, आपलो कुटुम-लोग आउर आपलो बुआ चो घर के छांडुन मय जोन देस् के तुके दखायंदे, हुन देस् ने जा। 2 मय तुचो थर-लर के खुबे बड़ायंदे आउर तुके बर देयंदे, तुचो नाव के माहान करेंदे आउर तुय बर चो मूर होसे*। 3 जोन तुके बर देयदे, मय हुनके बर देयंदे; आउर जोन तुके सरापेदे, मय हुनके सराप देयंदे; आउर मंजपुर चो सपाय कुटुम-लोग तुचो बाटले बर पावदे।”4 जहोवा चो ए बचन हिसाब ले अबराम निकरुन बाट हिंडुक मुरियालो, लूत बले हुनचो संगे गेलो; हारान देस् ले निकरतो बेरा अबराम, तीन कोड़ी पंदरा* बरक चो रये। 5 अबराम आपलो बायले सारे, आपलो भाई चो बेटा लूत, हारान देस् ने आपलो कमालो धन-माल आउर कमेया-कमयीनमन के धरुन कनान देस् जातो काजे बाट धरलो; आउर हुनमन कनान देस् ने अमरला। 6 अबराम, हुन देस् भीतर ले जातो बेरा सकेम ने अमरलो, जोन थाने मोरे नाव चो ठाने गोटोक बांज रूक रये। हुदलदांय हुन देस् ने कनानीमन रते रओत। 7 जहोवा, अबराम के दखा देउन बललो, “ए देस् के मय तुचो थर-लर के देयंदे।” तेबे हुन, आपनेके दरसन दिलो जहोवा काजे हुता गोटोक बेदी बनालो। 8 फेर हुता ले पुरे जाउन बेतेल चो बेर उदिया बाटे रलो डोंगरी ने अमरलो आउर हुनी थाने आपलो तमु गाड़लो, जेचो बेर बुड़ती बाटे ‘बेतेल’ आउर बेर उदिया बाटे ‘एय’ सहर आसे। हुन, हुता बले जहोवा काजे गोटोक बेदी बनालो आउर जहोवा ले पारथना करलो। 9 पाछे अबराम, हुताले कनान देस् चो दखिन राज नेगेव बाटे गेलो।
मिसर देस् ने अबराम
10 कनान देस् ने भूक पड़लो किरता अबराम परदेसिया होउन रतो काजे मिसर देस् ने गेलो, कसनबलले हुन देस् ने भारी भूक पड़ु रये। 11 फेर असन होली, मिसर देस् लगे अमरुन अबराम आपलो बायले सारे के बललो, “सुन, मय जानेंसे तुय खुबे सुंदरीन आस; 12 आउर मिसरीमन तुके दखलोने बलदे, ‘ए हुनचो बायले आय’ तेबे हुनमन मोके तो मोरते मारदे, मानतर तुके जीव संगादे। 13 एईकाजे तुय असन बल, ‘मय हुनचो बईन आंय,’ जेचोले तुचो किरता मोचो भलई होओ आउर मोचो जीव बाचो।” 14 फेर असन होली, जिदलदांय अबराम मिसर देस् ने अमरलो, तेबे मिसरीमन दखला कि हुनचो बायले खुबे सुंदरीन आय। 15 फिरोन* चो राजपालमन हुनके दखला आउर फिरोन चो पुरे हुनचो बड़ाई करला; एईकाजे हुन बायले के फिरोन चो माहाल ने अमराउन दिला। 16 सारे चो किरता फिरोन, अबराम के छेरी-मेंडीमन, गाय-बयलामन, कमेया-कमेयीनमन, गदाहा-गदहीमन आउर ऊंटमन देउन भलई करलो।
17 मानतर अबराम चो बायले सारे किरता जहोवा, फिरोन आउर हुनचो कुटुम ने रबी उठालो। 18 तेबे फिरोन, अबराम के हागदेउन बललो, “मय तुचो काय नसाले गुने मोचो संगे तुय असन करलीस? हुन तुचो बायले आय बलुन मोके काय काजे नी सांगलीस? 19 तुय काय काजे हुनके तुचो बईन आय बललीस? मय हुनके आपलो बायले बनातो काजे आनले; एदांय तुय आपलो बायले के धरुन एता ले निकरुन जा।” 20 फिरोन आपलो लोगमन के अबराम चो बारे ने हुकुम दिलो। तेबे हुनमन अबराम आउर हुनचो बायले के हुनचो सपाय धन-माल संगे बिदा करुन दिला।