महापरभु बाबेल ने भासा के भुलकातोर
11
गुलाय मंजपुर ने गोटकी भासा-बोली रली। 2 हुन समया चो लोगमन, बेर उदिया बाटले हिंडते-हिंडते सिनार देस् चो गोटोक भाटा ने बसापत करला। 3 हुनमन गोटोक-दुसर के बलला, “इआ, आमी ईटा मारुन-मारुन भाटी ने डसाउं।” आउर हुनमन, पकना चो पलटा ईटा आउर माटी-गारा चो पलटा डामर लगाउन जोड़ुक मुरियाला। 4 फेर हुनमन बलला, “इआ, आमी गोटोक सहर आउर खुबे डेंग गुमट बनाउं, जेचो टीप बादरी के टेको, असन बरन ले आमी नाव कमाउं, नोहले आमके गुलाय मंजपुर ने बिगरुक पड़ेदे।” 5 लोगमन चो बनातो सहर आउर गुमट के दखतो काजे जहोवा उतरुन ईलो। 6 आउर जहोवा बललो, “दखा, सपाय गोटकी गोहड़ी आत, आउर हुन सपाय चो भासा बले गोटकी चे आय; आउर हुनमन मुरियालो बुता ले जानुक होयसे कि हुनमन काईची बले करुक सकोत, एदांय हुनमन काई बले बिचारले हुनके पक्का करुक सकदे। 7 एईकाजे इआ, आमी उतरुन हुनमन चो भासा के भूलकाउं कि हुनमन गोटोक-दुसर चो गोट के नी समजुक सकोत।” 8 असन बरन ले जहोवा, हुनमन के हुता ले गुलाय मंजपुर ने बिगरालो आउर हुनमन सहर बनाउक छांडला। 9 एईकाजे हुन सहर चो नाव बाबेल* पड़ली; कसनबलले जहोवा गुलाय मंजपुर चो भासा हुताय भूलकालो आउर हुताय ले लोगमन के जहोवा गुलाय मंजपुर ने बिगरालो।सेम चो थर-लर
10 सेम चो थर-लर ए आय। पुर-पानी चो दुय बरक पाछे सेम सव बरक चो होलो आउर हुनचो बेटा अरपसद जनमलो; 11 अरपसद जनमलो पाछे, सेम पांच सव बरक जीव रलो, हुनके आउर बले बेटा-बेटीमन होला।
12 अरपसद पयंतीस बरक चो होलो बेरा हुनचो बेटा सेला जनमलो; 13 आउर सेला जनमलो पाछे अरपसद चार सव तीन बरक जीव रलो, हुनके आउर बले बेटा-बेटीमन होला।
14 सेला तीस बरक चो होलो बेरा हुनचो बेटा एबेर जनमलो; 15 एबेर जनमलो पाछे सेला चार सव तीन बरक जीव रलो, हुनके आउर बले बेटा-बेटीमन होला।
16 एबेर चंवतीस बरक चो होलो बेरा हुनचो बेटा पेलेग जनमलो; 17 पेलेग जनमलो पाछे एबेर चार सव तीस बरक जीव रलो, हुनके आउर बले बेटा-बेटीमन होला।
18 पेलेग तीस बरक चो होलो बेरा हुनचो बेटा रू जनमलो; 19 रू जनमलो पाछे पेलेग दुय सव नव बरक जीव रलो, हुनके आउर बले बेटा-बेटीमन होला।
20 रू बतीस बरक चो होलो बेरा हुनचो बेटा सरूग जनमलो; 21 सरूग जनमलो पाछे रू दुय सव सात बरक जीव रलो, हुनके आउर बले बेटा-बेटीमन होला।
22 सरूग तीस बरक चो होलो बेरा हुनचो बेटा नाहोर जनमलो; 23 नाहोर जनमलो पाछे सरूग दुय सव बरक जीव रलो, हुनके आउर बले बेटा-बेटीमन होला।
24 नाहोर उनतीस बरक चो होलो बेरा हुनचो बेटा तेरह जनमलो; 25 तेरह जनमलो पाछे नाहोर एक सव उन्नीस बरक जीव रलो, हुनके आउर बले बेटा-बेटीमन होला।
26 तेरह, सतर बरक चो होलो बेरा हुनचो बेटामन अबराम, नाहोर आउर हारान जनमला।
तेरह चो थर-लर
27 तेरह चो थर-लर ए आय: तेरह ले अबराम, नाहोर आउर हारान जनमला; आउर हारान, लूत चो बुआ रलो। 28 हारान आपलो बुआ तेरह, जीव रलोदांय कसदेयामन चो ऊर नाव चो सहर ने मोरलो, जोन थाने हुनचो जनम होउ रये। 29 अबराम आउर नाहोर, दुनो बिया होला। अबराम चो बायले चो नाव सारे आउर नाहोर चो बायले चो नाव मिलका रये। मिलका आउर इस्का, दुनो हारान चो बेटीमन रओत। 30 सारे बांझीन रये; हुनके पिला-झीला नी रला।