जहूदा
चो चिटी
1
जीसु किरिस्त चो कमेया आउर जाकूब चो भाई जहूदा बाटले, हुन हागदिलो लोग, जोनमन के बुआ महापरभु मया करेसे आउर जीसु किरिस्त काजे जगारित संगालोसे, हुनमन काजे चिटी:
2 तुमके महापरभु बाटले खुबे दया, अस्तिर आउर मया मिरते रओ।
फंदी गुरुमन काजे डंड
3 ए मोचो मीतमन, मय खुबे मन करते रले कि महापरभु आमके दिलो मुक्ति चो बारे ने तुमके लिखेंदे, जेचो आमी बले भागी आंव। मानतर तुमके ए गोट के समजतोर नंगत लागली कि महापरभु बाटले दिलो बिसवास के रखेया करतो काजे खुबे मसागत करते राहा, जेके पवितर लोगमन के अमदेया काजे गोटकी हार सोपलोसे।
4 कसनबलले कोनी-कोनी आमचो मंजी खुसनाय मिसलासे। एमन चो डंड चो बारे ने सास्तर ने आगे ची लिखलीसे: एमन भक्ति नी करसोत, आमचो महापरभु चो दया के केचड़ बुतामन ने पलटेसोत आउर आमचो गोटकी ची मालिक आउर परभु, जीसु किरिस्त के मुरे नी मानसोत।
5 तुमी ए जमाय गोट के आगतले जानास, तेबले बले मय तुमके फेर सूरता करायंसे। परभु आपलो लोगमन के मिसर राज चो दुख-डंड ले बचालो, मानतर पाछे, नी पतेयालो लोगमन के सत्यानास करलो।
6 तुमी ए बले जानसास, जोन सरगदूतमन, महापरभु दिलो पन आउर आपलो संद के नाहकला, परभु हुनमन के बड़े नियाव चो दिन होओतले जुग-जुग काजे सिकरा ले बांधुन अंधार चो कुंड ने संगालोसे।
7 उसनेची सदोम आउर अमोरा आउर हुनचो आली-पाली सहरमन चो लोगमन बले केचड़ बुतामन आउर ए संवसार चो नीती चो उलटा बेबिचार करुक हलवाल होला। एईकाजे हुनमन केबई नी लिबतो आईग ने जुग-जुग चो डंड पायसोत। ए आमचो काजे गोटोक चेतानी आउर कटाव असन आय।
8 जोन लोगमन चो बारे मय बलेंसे, हुनमन बले सपना दखुमन असन आत, जोनमन आपलो खुद चो देहें के सत्यानास करलासोत। हुनमन महापरभु चो सकत के हेला समजसोत आउर मयमा पाउमन* चो बले इजित धरसोत।
9 मानतर सरगदूतमन चो मुखिया मीकाईल जिदलदांय सयतान संगे मोसा चो मोड़ी काजे बला-बली होला, तेबे हुनके बदी देतो ढाढ़ुस नी करुन, इतलेची बललो: “परभु तुके दागा देओ।”
10 मानतर ए लोगमन जोन गोटमन चो बारे काई जानोत बले नाई, हुनी गोटमन ने बदी देयसोत, आउर आपलेई बिचार ले बुद नोहलो जनावरमन असन आपने के नास करसोत।
11 हुनमन के हाय लागो! कसनबलले हुनमन कईन चो असन बाट धरला आउर बिलाम चो असन धन चो लालच ने पड़ला। हुनमन कोरह चो असन महापरभु के बईर करुन आपने सत्यानास होला।*
12 एमन आमचो भोज-भात ने रतो गोटीमन असन आत, एमन लाज नोहलो पेट-पसा धोरईमन आत। एमन लेहरा ने उड़तो कुमला बादरी असन आत। एमन पाना झड़लो, फर नोहलो रूक असन आत, जोन मोरलो थाने मोरलासे आउर चेर संगे उखनी होलासे।
13 एमन समदूर चो घिन-घिना फेफल छांडतो बड़े-बड़े हलकामन असन आत। एमन बाट भुलकलो तारामन असन आत जोनमन के महापरभु जुग-जुग काजे पिरिचनाय अंधार ने रतो डंड दिलोसे।
14 आदम ले सातवां थर चो हनोक बले एमन चो बारे ने अगमगोट सांगु रलो: दखा, परभु आपलो कुड़ायक पवितर सरगदूतमन संगे सपाय चो नियाव करुक एयदे,
15 आउर सपाय भक्ति नी करतो लोगमन के, जोनमन भक्ति नी करुन सपाय अडरा बुतामन करलासे, आउर जोन भक्ति नी करु पापीमन महापरभु चो बिरुद ने कटुर गोटमन बललासे, हुनमन के दोख देयदे।
16 एमन तो मन नी भोरतो लोग, घुरमुरतो लोग, आपलो मन-इछा ले चलतो लोग, ढोंगाहा आउर आपलो नफा काजे दुसर के चेगातो लोग आत।
चेतानी आउर सिखिया
17 मानतर ए मोचो मीतमन, तुमी परभु जीसु किरिस्त चो पठालो-लोगमन आगे ले सांगलो गोटमन के सूरता करा।
18 हुनमन तुमके सांगते रओत, सरासरी दिनमन ने असन लोगमन होदे, जोनमन महापरभु के बदी देदे आउर हुनचो ले नाता संगातो सपाय चो इजित धरदे आउर भक्ति नी करतो पापीमन चो बाट धरदे।
19 एमन लड़ा-जुजा करातो लोग आउर संवसारी लोग आत, जेचो थाने पवितर आत्मा नीआय।
20 मानतर ए मोचो मीतमन, तुमी आपलो पवितर बिसवास ने खुबे बाड़ते जाहा आउर पवितर आत्मा ने पारथना करुन,
21 आपने के महापरभु चो मया ने चमकट करा आउर जुग-जुग चो जीव काजे आमचो परभु जीसु किरिस्त चो दया पावतो बाट दखते राहा।
22 जोन पतेयातोने मन कुट-कुट करेसे, हुनमन के जीव दुखा,
23 आउर खुबे लोगमन के आईग ले झीकुन बचाहा, आउर दया करतो बेरा चेत ने राहा। हुनमन चो फटई के बले घिनियाहा जोन देहें चो केचड़ बुतामन ले मईल होलीसे।
बर देतोर