पतेयातो बाटले महापरभु संगे मिला-मिसा
5
एदांय परभु जीसु किरिस्त के सतपतेयातो बाटले महापरभु आमके धारनिक मानलोसे आउर आमी महापरभु संगे मिलुन-मिसुन अस्तिर ने आसुं।
2 जीसु किरिस्त के पतेयालो किरता आमके महापरभु ले खुबे दया मिरली। एईकाजे महापरभु चो मयमा चो बाटा पावतो आसा ले आमी खुबे हरिक ने रउंसे।
3 सोजे इतलीचे नाई, आमी तकलीस बेरा बले हरिक ने रउंसे कसनबलले आमी जानुंसे, तकलीस ले कटलातोर,
4 आउर कटलातोर ले चोखा होतोर, आउर चोखा होले आसा उबजेसे,
5 आउर आसा करले लाज पड़ुक नी होए, कसनबलले महापरभु आपलो मया के पवितर आत्मा बाटले आमचो मन ने खुबे उलदलोसे।
6 आमचो निमल रलो बेरा किरिस्त, आमी पापीमन काजे निको समया ने मोरलो।
7 नियम-कानुन हिसाब ले धारनिक मानतो लोग काजे कोनी मोरतोर खुबे खट-खट आसे, फेर बले गोटोक धरमकारी मनुक काजे मोरतो ढाढ़ुस कोनी बले करुक सकदे।
8 मानतर आमी पापी रलो बेरा किरिस्त आमचो काजे मोरलो, आउर असन बरन ले महापरभु आपलो मया आमके दखालो।
9 एदांय आमी किरिस्त चो लोउ ले धरमी होलुसे, एईकाजे हुनचो बाटले महापरभु चो रीस ले बाचुंदे ची।
10 आमी महापरभु चो बयरी रलु आउर हुनचो बेटा चो मोरना बाटले हुनचो संगे आमके मिला-मिसा करलोसे जाले, जीसु किरिस्त चो जीव उठलो बाटले आमी मुक्ति पाउंदे ची।
11 सोजे इतलीचे नाई, आमी आमचो परभु जीसु किरिस्त बाटले महापरभु संगे मिला-मिसा होलो किरता खुबे हरिक आसुं।
आदम ले मोरना आउर किरिस्त ले जुग-जुग चो जीव
12 गोटोक मनुक बललोने, आदम बाटले पाप संवसार ने ईली, आउर पाप ले मोरना ईली, आउर सपाय पाप करलो किरता सबु लोग उपरे मोरना उपड़ली।
13 नियम-कानुन दिलो ले आगे बले संवसार चो लोगमन पाप करते रला, मानतर जोन थाने नियम-कानुन नीआय, हुता पाप चो हिसाब बले नी रये।
14 तेबले बले आदम ले धरुन मोसा ले मोरना सपाय लोगमन उपरे राज करली, जोनमन ले कोनी बले आदम असन पाप नी करु रला। आदम, हुन एतो बीता बललोने जीसु किरिस्त चो छांय आय।
15 मानतर आदम चो पाप आउर महापरभु चो दया गोटकी कटार नोआय। कसनबलले गोटोक मनुक, बललोने आदम चो पाप किरता खुबे लोग मोरला। तेबे गोटोक मनुक, बललोने जीसु किरिस्त बाटले महापरभु चो दया आउर हुनचो बर, खुबे लोगमन उपरे जुगे ले होली।
16 गोटोक मनुक चो पाप किरता उपड़लो मोरना आउर महापरभु चो दया ले मिरतो बर गोटोक कटार चो नोआय। कसनबलले एकलाय चो पाप किरता सपाय लोग डंड ने पड़ला, मानतर महापरभु चो दया ले आमचो खुबे पाप खेमा होउन धारनिक होतो बर मिरली।
17 कसनबलले गोटकी ची मनुक चो पाप किरता मोरना सपाय लोग उपरे राज करली, तेबे जोनमन दया आउर धारनिक बरदान जुगे पायसोत हुनमन गोटकी ची मनुक बललोने, जीसु किरिस्त बाटले जुग-जुग काजे जीव पावदे ची।
18 एईकाजे जसन गोटोक मनुक चो पाप किरता सपाय लोग के डंड चो हुकुम मिरली, उसनेची गोटोक मनुक चो धारनिक बुता किरता सपाय धारनिक होला आउर सपाय के जुग-जुग चो जीव चो बर मिरली।
19 जसन गोटोक मनुक चो हुकुम नी मानलोके सपाय लोग पापी होला, उसनेची गोटोक मनुक हुकुम मानलोके सपाय लोग धरमकारी होदे।
20 नियम-कानुन ईलोके लोग आपलो खुबे पाप के जानला, मानतर हुन पापमन ले बले महापरभु चो दया खुबे आगर होली।
21 एईकाजे जसन पाप मोरना के बिगराउन राज करली, उसनेची महापरभु चो दया बले आमचो परभु जीसु किरिस्त बाटले जुग-जुग चो जीव काजे धारनिक बनाते राज करो।