पुरखा अबराहम सपाय चो धारनिक बुआ
4
तेबे फेर, आमी सपाय चो पुरखा अबराहम चो बारे ने काय बलवां?
2 अबराहम आपलो करलो बुता बाटले धरमकारी होउक सकतो जाले, गुमान करुक सकतो, मानतर महापरभु पुरे नाई।
3 कसनबलले पवितर सास्तर असन बलेसे: “अबराहम, महापरभु के पतेयालो किरता महापरभु हुनके धरमकारी मानलो।”†
4 बुता करु लोग के भूती देतोर दान नोआय, मानतर भूती हुनचो हक आय।
5 बुता नी करतो लोग बले, ओधरमीमन के धारनिक मानतो महापरभु के सतपतेयायसोत जाले, हुन, हुनमन के पतेयातो बाटले धरमकारी मानेसे।
6 जेके महापरभु बुता नी करलोर बले धरमकारी मानेसे, हुनके दाउद बले धन-धन बलेसे:
7 “धन-धन आत हुनमन जोनमन चो
ओधरम खेमा होलीसे,
आउर जोनमन चो पाप के ढाकलोसे!
8 धन-धन आय हुन मनुक जेके
महापरभु पापी नी माने!”†
9 काय ए धन-धन बर, सोजे खतना करालो लोगमन काजे ची आय कि खतना नी करालो लोगमन काजे बले आय? आमी असन बलुंसे, “अबराहम, महापरभु के सतपतेयालो किरता महापरभु हुनके धारनिक मानलो।”
10 तेबे फेर महापरभु हुनके केबे धरमकारी मानलो? खतना करालो बेरा आय कि खतना नी करालो बेरा? खतना करालो बेरा नाई, मानतर खतना नी करालो बेरा हुनके धरमकारी मानलो।
11 अबराहम काजे खतना गोटोक चीना आय, जोन चीना हुनचो खतना नी करालो बेरा महापरभु के सतपतेयातो बाटले पावलो धारनिक चो छापा आय। जेचोले हुन, खतना नी कराउन बले महापरभु के सतपतेयाउन धरमकारी होलो सपाय लोगमन चो बुआ होलो।
12 आउर हुन, खतना करालो लोग चो बले बुआ होलो, जोन अबराहम चो खतना नी करालो बेरा चो असन बिसवास ने चलसोत।
बिसवास बाटले बायदा पावतोर
13 संवसार चो हकदार होतो बायदा, अबराहम आउर हुनचो थर के महापरभु दिलो। ए बायदा अबराहम के नियम-कानुन मानतो बाटले नोआय, मानतर बिसवास ले धारनिक होलो बाटले मिरली।
14 नियम-कानुन ने चलतो लोग ची हकदार आत जाले, बिसवास फोकाहा आउर बायदा काई काम चो नोआय।
15 कसनबलले, नियम-कानुन ले सोजे पाप दखा देयसे आउर हुनके नी मानले महापरभु चो रीस उबजेसे। मानतर जोन थाने नियम-कानुन नीआय हुता कोनी बलतो लोग बले नीआत।
16 एईकाजे महापरभु के बिसवास करले ची हुनचो दया हिसाब ले बायदा मिरेसे, जेचोले ए बायदा अबराहम चो सपाय थरमन काजे पक्का होयसे। सोजे नियम-कानुन के मानतो लोग के ची नाई, मानतर अबराहम असन बिसवास करतो सपाय लोग काजे बले आय। हुनी आमी सपाय चो बुआ आय।
17 जसन पवितर सास्तर ने लिखलीसे: “मय तुके खुबे जातमन चो बुआ बनालेसे,”† अबराहम हुन महापरभु के पतेयाउ आय, जोन मोरलोमन के जियाउआय आउर जोन तीज नीआय बले हुनके असन नाव धरुआय कि हुन आसे।
18 महापरभु चो हुन बचन हिसाब ले: “तुचो थर गनुक नी सकतो असन होदे,”† अबराहम खुबे लोग चो बुआ होयंदे बलुन पिला-झीला मुरे नी होतो समया ने बले बिसवास करुन आसा नी छांडलो।
19 अबराहम सव बरक चो डोकरा होउन रये आउर हुनचो गतर आटु रये, आपलो बायले सारा खुबे डोकरी होलीसे जानुन बले अबराहम बिसवास ने निमल नी होलो।
20 हुन महापरभु चो बायदा के दुक-पुछ नी करलो, मानतर बिसवास ने चमकट रउन महापरभु चो मयमा करलो;
21 आउर हुन पक्का जानलो कि जोन बायदा महापरभु करलोसे, हुन बायदा के पुरा करतो सकत बले हुनके आसे।
22 एईकाजे, “महापरभु हुनके धारनिक मानलो।”†
23 बिसवास किरता हुनके धरमकारी मानलो, ए गोट अबराहम काजे ची नाई,
24 मानतर आमचो काजे बले आय जोन बिसवास करुन धारनिक होउंसे, कसनबलले आमी महापरभु के पतेयाउंसे जोन आमचो परभु जीसु के मोरलोमन ले जियालो।
25 आमचो पापमन चो किरता महापरभु, जीसु के जतरा होतो काजे सोपुन दिलो, आउर आमके धारनिक बनातो काजे हुनके मोरलोमन ले जियालो।