3
असन आय जाले, बिजातीमन ले जहूदीमन काय ने आगर आसोत? आउर खतना करालो ले काय नफा आसे?
2 जहूदी होतो चो खुबे नफा आसे। कसनबलले महापरभु आपलो बचन सबुले आगे हुनीमन के सोपलो।
3 कोनी-कोनी जहूदीमन, महापरभु चो बचन के नी पतेयाउन निमकधुसा होला जाले काय होली? काय हुनमन निमकधुसा होले महापरभु चो बचन फोकाहा होयदे?
4 केबई नाई! महापरभु आपलो करलो बचन पुरा करुची आय। सपाय लोग फंद होले बले महापरभु सत रयदे। जसन पवितर सास्तर ने लिखलोर आसे,
“तुय आपलो गोटमन ने धरमकारी हो,
आउर तुय नियाव करतोने जय पाव।”†
5 मानतर आमी करलो ओधरम बुतामन ले महापरभु चो धारनिक दखा देयसे जाले, फेर आमी काय बलुक सकुं? काय, महापरभु रीस होतोर ओनियाव आय? (ए गोट के मय मनुक चो नीती ले सांगेंसे)
6 केबई नाई! महापरभु नियाव करतोने सत नोआय जाले, फेर कसन करुन संवसार चो नियाव करेदे?
7 मोचो फंद बुतामन ले महापरभु चो सत आउर हुनचो मयमा जुगे होयसे जाले, कसन ने फेर मोके दोसी मानसोत?
8 “काय आमी भलई होतो काजे अडरा करवां?” केबई नाई! मानतर कोनी-कोनी आमके असनी सिखायसोत बलुन आमचो उपरे कसूर तेंगड़सोत। असन बलतो लोग के नियाव दिने डंड मिरेदे ची।
कोनी धरमकारी नीआत
9 तेबे फेर काय बलवां? कोनी बरन ले आमी जहूदीमन, बिजातीमन ले नंगत आंव? केबई नाई, कसनबलले आमी आगे ची सांगलुसे, जहूदी होओ नोहले बिजाती सपाय पाप चो हक ने आसोत।
10 जसन पवितर सास्तर ने लिखलोर आसे:
“कोनी धरमकारी नीआत, गोटोक बले नीआत!
11 सत के समजतो लोग कोनी नीआत, गोटोक बले नीआत!
महापरभु के डगरातो लोग कोनी नीआत!
12 सपाय, बाट भुलकलासे,
सपाय फोकाहा आत,
भलई करतो लोग कोनी नीआत, गोटोक बले नीआत!”†
13 “जसन उगड़लो मोठ बास देउआय,
उसने एमन चो टोंड ले बाकना गोट निकरुआय। एमन आपलो गोट-बात ले लोग के ठगुआत,”†
“हुनमन चो जीब खाले साप चो बिस असन टेचरई गोट आसे।”†
14 “हुनमन चो टोंडे सराप आउर छंद गोट भोरलीसे”।†
15 “हुनमन जीव धरतो काजे हलवाल होयसोत।
16 हुनमन चो बाट ने तकलीस आउर नास आसे।
17 हुनमन अस्तिर चो बाट के नी जानला।”†
18 “हुनमन महापरभु के मुरे नी डरोत।”†
19 आमी जानुंसे नियम-कानुन जोन बले बलेसे, नियम-कानुन चो हक ने रतो लोग के चे बलेसे, तेबे कोनी बले गोट उलटाउक नी सकोत आउर महापरभु चो पुरे संवसार चो सपाय लोग दोसी आत।
20 एईकाजे नियम-कानुन के मानुन कोनी बले महापरभु पुरे धरमकारी होउक नी सकोत, कसनबलले नियम-कानुन ले सोजे पाप के चिताउक होयसे।
बिसवास ले धरमकारी होतोर
21-22 एदांय महापरभु, नियम-कानुन मानतो बाटले नाई, मानतर जीसु किरिस्त के सतपतेयातो सपाय लोग के धारनिक मानेदे, जहूदी होओ नोहले बिजाती, हुन कोचई पाटेया नी होए। महापरभु चो ए धारनिक चो बारे ने नियम-कानुन आउर अगमजानीमन बले गवई देयसोत।
23 कसनबलले सपाय लोग पाप करलासे आउर महापरभु चो मयमा* ले लापी होलासे।†
24 मानतर ए सपाय लोग जीसु किरिस्त ने मिरतो छंडावा* बाटले धरमकारी होयसोत। ए महापरभु चो दया ले फोकाहा ने मिरेसे।
25 जीसु किरिस्त के सतपतेयातो लोगमन के, हुनचो लोउ बाटले मुक्ति पावतो काजे महापरभु हुनके पठालो। असन करुन महापरभु लोगमन चो आगे करलो पापमन के कटलाउन खेमा करलो, आउर आपलो धारनिक दखालो
26 कि हुन धरमकारी रउन जीसु के सतपतेयातो लोगमन के धरमकारी मानेसे।
27 तेबे काय, नियम-कानुन ले गुमान करुक होयदे? गुमान करुक ची नी होए। नियम-कानुन मानतो बाटले नाई! मानतर सतपतेयातो बाटले गुमान करुक होयदे।
28 एचोले ए जानुक होयसे कि कोनी मनुक के महापरभु हुनचो नियम-कानुन हिसाब ले करलो बुता बाटले नाई, मानतर सतपतेयातो बाटले ची धरमकारी मानेदे।
29 काय, महापरभु जहूदीमनचेई आय? काय, हुन बिजातीमन चो महापरभु नोआय? हव, बिजातीमन चो बले आय।
30 कसनबलले सपाय चो महापरभु गोटकी ची आय, जोन खतना होलो जहूदीमन के आउर खतना नी होलो बिजातीमन के बले सतपतेयातो बाटले धरमकारी मानेसे।
31 तेबे काय, आमी सतपतेयातो बाटले नियम-कानुन के फोकाहा आय बलुंसे? केबई नाई, मानतर पतेयातो बाटले नियम-कानुन के आउर बले चमकट करुंसे।