सत नियाव करु महापरभु
2
एईकाजे ए बदी देतो बीता, तुय कोनी होले बले भुरलाउक नी सकीस। कसनबलले जोन गोट ने तुय दुसर के बदी देयसीस, तुय बले हुनीची बुता करुन खुदे बदी पायसीस,
2 आउर आमी जानुंसे, असन बुता करतो लोगमन के सत नियाव करु महापरभु बाटले हुनमन चो बुता हिसाब ले ची डंड मिरेदे।
3 ए भाई, तुय असन बुता करतोमन के बदी देउन खुदे हुनीची बुता करसीस, काय, तुय महापरभु चो डंड ले बाचेंदे बलसीस?
4 काय, तुय महापरभु चो खुबे दया, कटलातोर, आउर धीरजा के हेला पतेयायसीस? काय तुय, ए नी समजसीस महापरभु चो दया तुके मन बोहड़ाउक उकसायसे?
5 मानतर तुय महापरभु करतो सत नियाव चो दिन काजे आपलो कटुर आउर नी खिसियातो हट मन किरता आपलेई काजे महापरभु के रीस चेगायसीस।
6 कसनबलले महापरभु सबु लोग के आपलो-आपलो बुता हिसाब ले ची पलटा देयदे।
7 जोनमन भलई बुता करते-करते मयमा, मान आउर अमर होउक खोजेसोत, हुनमन के महापरभु जुग-जुग चो जीवना देयदे।
8 जोनमन आपलेई नफा काजे सत के नी मानसोत आउर ओधरम ने चलसोत, हुनमन उपरे महापरभु चो जंजाल रीस पड़ेदे,
9 आउर सपाय ओधरमीमन उपरे दुख-तकलीस आउर गराहां एयदे। आगे जहूदीमन उपरे, पाछे बिजातीमन उपरे।
10 मानतर जोन बले भलई बुता करसोत हुनमन मयमा, मान आउर अस्तिर पावदे। आगे जहूदीमन, पाछे बिजातीमन।
11 कसनबलले महापरभु कोचई पाटेया नी होए।
12 एईकाजे जोनमन, मोसा बाटले दिलो नियम-कानुन के नी जानुन पाप करला, हुनमन नियम-कानुन नोहलो नास होदे; आउर जोनमन नियम-कानुन के जानुन बले पाप करला, हुनमन के, नियम-कानुन हिसाब ले डंड मिरेदे।
13 कसनबलले महापरभु नियम-कानुन के सुनतोमन के नाई, मानतर नियम-कानुन हिसाब ले चलतोमन के धरमकारी मानेदे।
14 जेबे नियम-कानुन नोहलो बिजातीमन आपलो जनम-जात नंगत गुन ले ची नियम-कानुन चो हिसाब ने चलसोत, तेबे हुनमन नियम-कानुन नी जानले बले खुदे आपलो नियम-कानुन आत।
15 हुनमन चो चलनी-बुलनी ले जानुक होयसे कि नियम-कानुन हुनमन चो मने लिखलोर आसे। हुनमन चो मन-चेतन बले एचो गवई देयसे कि काय सत आय आउर काय फंद आय।
16 मोचो सुनालो नंगत खबर हिसाब ने, जोन दिने महापरभु, जीसु किरिस्त बाटले मनुकमन खुसनाय करलो बुतामन चो नियाव करेदे, हुन दिने ए सपाय गोटमन पुरा होयदे।
जहूदीमन आउर नियम-कानुन
17 तुय आपने के जहूदी बलसीस, नियम-कानुन ने भोरसा करसीस, आउर महापरभु चो खुद लोग आंव बलुन गुमान करसीस,
18 महापरभु चो मन-इछा के जानसीस, नियम-कानुन चो सिखिया पाउन सत आउर फंद गोटमन के चितायसीस,
19 तुय कानामन के बाट दखाउ आउर गुपलो लोगमन के बुद-भोरसा देउ बीता आंय बलुन आपलेची उपरे भोरसा करसीस,
20 आउर नियम-कानुन ले मोके गियान आउर सत मिरलीसे बलुन भकवामन के सिखातो बीता, आउर पिलामन चो गुरु आंय बलसीस जाले,
21 तुय दुसर के सिखायसीस, काय, तुय खुद नी सीखीस? तुय नी चोरतोर आय बलसीस, काय, खुदे नी चोरसीस?
22 तुय बेबिचार नी करतोर आय बलसीस, काय तुय खुद बेबिचार नी करसीस? तुय मूरतमन के घिनियायसीस, काय, खुदे मंदिरमन ने ठगा-फारसी नी करसीस?
23 तुय नियम-कानुन उपरे गुमान करसीस, मानतर हुनी नियम-कानुन ने नी चलुन, काय, तुय महापरभु चो इजित नी धरसीस?
24 जसन लिखलोर आसे “तुमचो किरता बिजातीमन महापरभु चो नाव के निंदरेसोत।”
25 तुय नियम-कानुन चो हिसाब ने चलसीस जाले, तुचो खतना* करालोर नंगत आय, मानतर तुय नियम-कानुन के नी मानसीस जाले, तुचो खतना करालोर नी करालो कटार चो आय।
26 एईकाजे खतना नी करालो मनुक नियम-कानुन चो हिसाब ने चलेसे जाले, हुन खतना नी कराले बले खतना करालो कटार चो आय।
27 बिजातीमन देहें हिसाब ले खतना नी कराउन बले नियम-कानुन हिसाब ने चलसोत, मानतर तुमी जहूदीमन, जोन लिखलो नियम-कानुन पावलासाहास आउर खतना बले करालासाहास, तेबे तुमी नियम-कानुन के नी मानलोने, काय, हुनमन तुमके दोसी नी बलदे?