रोमीमन
काजे पठालो-बीता पउलुस चो चिटी
जुहार
1
किरिस्त जीसु चो कमेया आउर महापरभु चो नंगत खबर सुनातो काजे बाछुन अलगालो, पठालो-बीता पउलुस बाटले चिटी:
2 महापरभु आपलो बेटा बललोने आमचो परभु जीसु किरिस्त चो बारे ने आगे ची अगमजानीमन बाटले पवितर सास्तर ने बायदा करु रये,
3 जोन संवसारिक देहें हिसाब ने दाउद चो थर ने जनमलो,
4 मानतर जीसु किरिस्त, महापरभु चो बेटा होतो गोट के, पवितर आत्मा चो सकत ले मोरलोमन ले जीव उठुन सिद करुन दखालो।
5 हुनचेई बाटले मोके पठालो-लोग होतो बरदान मिरली कि हुनचो नाव के जात-जात चो लोग सतपतेयाउन हुनचो हुकुम के मानोत,
6 हुनीमन संगे तुमके बले जीसु किरिस्त, आपलो लोग होतो काजे बाछलोसे।
7 महापरभु मया करतो आउर पवितर होतो काजे बाछलो सपाय रोमीमन के:
आमचो बुआ महापरभु आउर परभु जीसु किरिस्त ले दया आउर अस्तिर मिरते रओ।
पउलुस, रोमीमन काजे जीव उखड़ायसे
8 सबुले आगे मय, जीसु किरिस्त बाटले तुमचो काजे आमचो महापरभु के धन-धन करेंसे, कसनबलले संवसार चो सपाय लोग तुमचो बिसवास चो बारे ने सुनसोत।
9 महापरभु चो सेवा, मय मन देउन हुनचो बेटा चो नंगत खबर सुनाउन करेंसे, हुनी मोचो गवा आसे कि मय आपलो पारथना ने तुमके रात-मंजन सूरता करते रयंसे,
10 आउर रोजे पारथना ने गुहारेंसे कि महापरभु चो इछा ले कसने बरन ले बले मोके तुमचो थाने एउक होओ।
11 कसनबलले मय, तुमके आत्मिक बर देतो काजे भेटुक मन करेंसे, जेचोले तुमी बिसवास ने चमकट होआसे;
12 बललोने जेबे मय तुमचो संगे रयंदे, तेबे मोचो ने आउर तुमचो ने रतो बिसवास बाटले गोटोक-दुसर के सहरावां।
13 ए मोचो भाईमन, मय मन करेंसे कि तुमी ए गोट के जाना, मय तुमचो लगे घन-घन एतो उआट करले कि जसन बिजातीमन चो मंजिगता सेवा बुता करलो के खुबे नफा होली, उसनेची तुमचो थाने बले होओ, मानतर एबले मोके एतोने अड़ंगा होयसे।
14 मय, पुरवानीमन आउर परगांयामन, बुद बीतामन आउर भकवामन सपाय लोगमन चो लागा पड़लेसे।
15 एईकाजे मय, रोम सहर ने रतो तुमी सपाय लोग के बले नंगत खबर सुनाउक एतो काजे पक्का तियार आंसे।
16 मोके नंगत खबर सुनातो काजे लाज नी लागे, कसनबलले नंगत खबर चो सकत ले ची महापरभु, सपाय पतेयातो लोगमन के मुक्ति देयसे, आगे जहूदीमन के, पाछे जूनानीमन के।
17 कसनबलले महापरभु ले मिरतो धारनिक, मूर ले धरुन सरासरी होओतले बिसवास उपरे ची आसे, जसन लिखलोर आसे, “बिसवास ले धरमकारी जीव रयदे।”
मनुक चो पाप किरता महापरभु चो रीस
18 एईकाजे सत के ओधरम ले दबातो आउर भक्ति नी करतो सपाय लोग उपरे महापरभु चो रीस सरग ले पड़ेसे।
19 महापरभु दखालो किरता सबु लोगमन के महापरभु चो गियान आसे।
20 कसनबलले महापरभु चो दखा नी देतो गुन, हुनचो जुग-जुग चो सकत आउर मयमा-पन*, संवसार के बनालोदांय ले दग-दगा दखा देयसे, एईकाजे हुनमन काई घाई-भीड़ाउक नी सकोत।
21 कसनबलले हुनमन महापरभु के जानुन बले हुनके डंडासरन नी करला आउर जय-जय बले नी करला। मानतर आपलो मने घड़लो फोकाहा गोटमन ने आपने के गुपाला।
22 हुनमन आपने के बुद बीता आंव बलसोत मानतर हुनमन एकदांय भकवा आत,
23 कसनबलले हुनमन जुग-जुग जीव आउर मयमा ने रतो महापरभु के मोरतो मनुकमन, चड़ईमन, चारपांयमन आउर रेंगतो जनतुरमन असन मूरत ने पलटला।
24 एईकाजे महापरभु हुनमन के आपलाहान मन-इछा ले, गोटोक-दुसर संगे आपलो देहें के अडरा बुतामन ले, असुद होतो काजे छांडुन दिलो।
25 कसनबलले हुनमन महापरभु चो सत के पलटुन फंद बनाला आउर तीनपुर चो सपाय के बनालो महापरभु के छांडुन, हुनचो बनालो तीजमन के सेवा-सासन करला। महापरभु अमदेया धन-धन आय। आमीन।
26 एईकाजे महापरभु बले हुनमन के आपलो घिन-घिना मन-इछा ने छांडुन दिलो। हुनमन चो बायलेमन बले मनुकमन चो हक ने रउक छांडुन बायले-बायले राका-राकी होला।
27 उसनेची मनुकमन बले आपलो बायलेमन के छांडुन मनुक-मनुक राका-राकी होला, आउर आपलो करलो अडरा बुता चो पलटा आपने ची पावला।
28 जेबे हुनमन महापरभु के चिताउक मन नी करला, तेबे महापरभु बले हुनमन के, आपलेई घिन-घिना मन-इछा असन बुता करतो काजे छांडुन दिलो।
29 एईकाजे हुनमन सबु बरन चो ओधरम, पाप, लालच, दुसट, डाटा-बईर, ईरका, माने-मारा, झगड़ा, कपट, आउर कुचर ले लड़ा-जुजा, खुद खाउ,
30 बदी देउ, महापरभु चो बयरी, दुसर चो इजित धरु, गुमानी, ढोंगाहा, बाकना गोटेयाउ, आया-बुआ चो गोट नी धरु,
31 भकवा, धोका देउ, मया नी करु, आउर दया नोहलो लोग होला।
32 हुनमन महापरभु चो ए नीती के जानसोत कि असन बुता करलोने मोरना चो डंड मिरुआय, तेबले बले हुनमन, उसनेचे बुता करसोत आउर असन बुता करतो काजे लोगमन के उकसायसोत।