पाप काजे मोरतोर आउर किरिस्त ने जीव रतोर
6
तेबे फेर आमी काय बलवां? काय महापरभु खुबे दया करुआय बलुन पाप करते रवां?
2 केबई नाई। आमी पाप काजे मरलु जाले, फेर कसन ने आमी पाप ने जीवां?
3 काय तुमी नी जानास, आमी सपाय किरिस्त जीसु चो बपतिस्मा धरलो लोग, हुनचो मोरना चो बपतिस्मा ने बले भागी होउंसे?
4 एईकाजे, हुनचो मोरना चो बपतिस्मा पावलोके आमके बले हुनचो संगे गाड़ला, आउर जसन महापरभु चो मयमा ले किरिस्त मोरलोमन ले जीव उठलो, उसनेची आमी बले नवा जीवना जीउं।
5 कसनबलले आमी जीसु चो मोरना ने गोटकी होलुसे जाले हुनचो असन जीव उठतो ने बले गोटकी होउंदे।
6 आमी जानुसे, आमचो पापी देहें के नास करतो काजे आमचो आगे चो मनुक गुन के किरिस्त संगे कुरूस ने चेगाला। एईकाजे एदांय आमी पाप चो कमेया नोआंव।
7 कसनबलले मोरलो लोग, पाप चो बांधन ले छंडाय होलासे।
8 आमी किरिस्त संगे मोरलुसे, एईकाजे पतेयाउंसे कि हुनचो संगे जीउंदे बले,
9 कसनबलले आमी जानुंसे, किरिस्त मोरलोमन ले जीव उठुन फेर नी मोरे आउर मोरना हुनचो उपरे केबई राज नी करे।
10 हुन अमदेया काजे गोटकी ची हार पापमन काजे मोरलो आउर एदांय हुनचो जीव रतोर महापरभु काजे आय।
11 असने ची तुमी बले पाप काजे मोरुन महापरभु काजे किरिस्त जीसु ने जीव आसुं समजा।
12 तुमी पाप चो इछा ले नी चलतो काजे आपलो कुउतो देहें उपरे पाप के राज करुक नी दियास,
13 आउर तुमचो अंगमन के ओधरम बुता करतो काजे पाप के नी सोपा। मानतर खुद के मोरलोमन ले जीव उठलुसे जानुन आपलो अंगमन के धारनिक बुता काजे महापरभु के सोपुन दियास।
14 तेबे तुमचो उपरे पाप राज करुक नी सके, कसनबलले तुमी नियम-कानुन चो हक ने नाई, मानतर महापरभु चो दया ने आसास।
धारनिक कमेया
15 तेबे काय होली? आमी नियम-कानुन चो हक ने नाई मानतर दया चो हक ने आसुं बलुन काय, पाप करते रवां? केबई नाई।
16 काय तुमी नी जानास, जेचो हुकुम तुमी मानसास हुनचो कमेया होयसास। पाप चो कमेया होले मोरुक होयसे, मानतर महापरभु चो हुकुम मानले धारनिक होउक होयसे।
17 मानतर महापरभु चो धन-धन होओ, जसन नीती ले तुमी आगे पाप चो कमेया रलास, एदांय तुमके महापरभु चो सिखियामन के सोपलासे हुनके तुमी गोटकी मन ले मानसाहास,
18 आउर पाप ले छंडाय होउन धारनिक चो कमेया होलास।
19 एईकाजे मय, तुमचो देहें चो निमल किरता मनुकमन चो नीती ले बलेंसे, जसन तुमचो देहें चो अंगमन के असुद आउर ओधरम चो कमेया होतो काजे सोपुन रलास, उसनेची एदांय तुमचो अंगमन के पवितर होतो काजे धारनिक चो कमेया होउन सोपुन दियास।
20 तुमी पाप चो कमेया रलो बेरा धारनिक चो नीती बाटले छुट ने रलास।
21 आउर जोन बुतामन ले तुमी एबे लाज पड़साहास, हुनचो ले हुदलदांय तुमके काय नफा होते रली? कसनबलले हुनचो पलटा मोरना आय।
22 मानतर एदांय तुमी पाप ले छंडाय होउन महापरभु चो कमेया होलास, जेचो पलटा तुमी पवितर होउन जुग-जुग चो जीव पाहासे।
23 कसनबलले पाप चो भूती मोरना आय, मानतर महापरभु चो बर, आमचो परभु जीसु किरिस्त बाटले जुग-जुग चो जीवना आय।