बिया होलो जीवना चो कटाव
7
ए भाईमन, मय नियम-कानुन जानतो लोग के बलेंसे, काय तुमी नी जानास, मनुक जीवता-जीव भर ची नियम-कानुन चो हक ने रयसे?
2 कसनबलले नियम-कानुन चो हिसाब ले बिया होलो बायले आपलो मनुक जीव रओतले हुनचो हक ने रयसे, मानतर मनुक मोरलो जाले हुन नियम-कानुन चो हिसाब ले आपलो मनुक चो हक ले छुट होयसे।
3 कोनी बायले आपलो मनुक जीव रउ-रउ बले दुसर मनुक संगे दोस पड़ली जाले हुनके बेबिचारी बलदे। मानतर हुनचो मनुक मोरलोने हुन, मनुक चो हक ले नियम-कानुन हिसाब ले छुट होयसे, तेबे फेर हुन, कोनी दुसर मनुक काजे घर होले बले हुनके बेबिचारी नी बलदे।
4 ए मोचो भाईमन, उसनेची तुमी बले किरिस्त चो देहें संगे नियम-कानुन काजे मोरलास, आउर मोरलोमन ले जीव उठलो किरिस्त चो होलास, तेबे आमी महापरभु काजे काम पड़तो लाईक होवां।
5 कसनबलले आमी देहें चो हिसाब ने रलो बेरा, नियम-कानुन बाटले उबजालो लालचमन ने रउन, आमचो अंगमन के मोरना चो बाट ने पाड़ते रलु।
6 मानतर एदांय हुनचो ले आमके छुट मिरलीसे, आउर हुनचो काजे आमी मरलु। एईकाजे आमी आगे चो लिखलो नियम-कानुन चो नीती ले नाई, मानतर आत्मा चो नवा नीती ले महापरभु चो सेवा करुंसे।
नियम-कानुन आउर पाप
7 तेबे आमी काय बलवां? काय, नियम-कानुन पाप आय? केबई नाई! मानतर नियम-कानुन ले ची पाप के चिताउक होयसे: “तुय लालच नी कर” बलुन नियम-कानुन नी सांगले, मय नी जानते, लालच करतोर पाप आय।
8 मानतर मोहका मिरते खन नियम-कानुन मोचो मन ने लालच उबजाली। नियम-कानुन नोहलोर पाप बले नी रलो कटार चो आय।
9 आगे मय नियम-कानुन नोहलोर जीव रले, मानतर जिदलदांय हुकुम ईली, तेबे मोचो जीवना ने पाप दखा दिली, आउर मय मोरले।
10 आउर हुनी हुकुम जोन मोचो जीवना काजे रली, मोचो मोरतो नीस होली।
11 कसनबलले पाप मोहका पाउन मोके हुनी हुकुम बाटले फुसियाली, आउर मोके मोरना ने पाड़ली।
12 एईकाजे नियम-कानुन पवितर आय, आउर हुकुम बले पवितर, सत आउर नंगत आय।
13 तेबे काय, जोन नंगत आय, हुनी मोचो मोरतो नीस होयदे? केबई नाई! मानतर पाप हुन नंगत बाटले मोचो काजे मोरना डंड उबजाली कि मोचो पाप दखा देओ, एदांय आमी हुकुम बाटले जानुंसे कि पाप खुबे डरतो लाईक आय।
मन-चेतन चो लड़ई
14 आमी जानुंसे कि नियम-कानुन तो आत्मिक आय, मानतर मय संवसारी मनुक आंय आउर मोके पाप चो कमेया बुता काजे बीकलासे।
15 जोन बुता मय करुक मन करेंसे हुनके करुक नी सकेंसे; मानतर हुन बुतामन के करेंसे जेके मय करतो के घिनियाउ आंय। एईकाजे मय नी समजे कि मय काय करेंसे।
16 जेके मय करुक मन नी करेंसे हुनके ची करेंसे जाले, मय मानेंसे कि नियम-कानुन नंगत आय।
17 असन होलोने अडरा करतो बीता मय नोआंय, मानतर मोचो भीतरे रलो पाप आय।
18 कसनबलले मय जानेंसे मोचो ने, बललोने मोचो देहें ने काई नंगत गुन नीआय। मोके नंगत बुता करुक भायसे मानतर मय करुक नी सकेंसे।
19 कसनबलले मय नंगत बुता करतो मन करेंसे, हुनके नी करुन मन नी करतो अडरा बुतामन के ची करेंसे।
20 मय हुनी करेंसे जेके मय मन नी करेंसे जाले, करतो बीता मय नुआंय, मानतर मोचो भीतरे रलो पाप आय।
21 एईकाजे मय जानेसे कि मोचो ने ए नियम आसे: जोन मोके नंगत बुता करुक भावले बले अडरा बुतामन के ची करायसे।
22 कसनबलले मोचो आत्मा महापरभु चो नियम-कानुन ले खुबे हरिक आंसे।
23 मानतर मोके आपलो अंगमन ने दुसर बरन चो नियम दखा देयसे: जोन मोचो मन चो नियम ले लड़ेसे आउर मोचो ने रलो पाप चो नियम ने पाड़ेसे।
24 मय कितरो ओभागी मनुक आंय! मोके ए मोरतो देहें ले कोन छंडायदे?
25 महापरभु के धन-धन होओ, हुनी मोके आमचो परभु जीसु किरिस्त बाटले मोरतो देहें ले छंडायदे।
मय मन ले महापरभु चो नियम के मानेंसे, मानतर देहें ले पाप चो नियम के मानेंसे।