पवितर आत्मा बाटले जीव रतोर
8
एदांय आत्मा बाटले किरिस्त जीसु ने गोटकी होलो लोगमन के डंड चो हुकुम नी होए।
2 कसनबलले किरिस्त जीसु बाटले जीव देतो आत्मा चो नियम, मोके पाप आउर मोरना चो नियम ले छंडालीसे।
3 कसनबलले देहें चो लालच किरता नियम-कानुन निमल होउन, जोन बुता करुक नी सकली, हुनके पुरा करतो काजे महापरभु आपलेई बेटा के मनुक-रूप ने पापी असन पाप-जतरा होतो काजे संवसार ने पठालो। महापरभु, हुनचो देहें ने पाप चो डंड पावतो हुकुम दिलो।
4 एईकाजे एदांय, नियम-कानुन चो नीती पुरा करतो काजे आमी देहें चो हिसाब ले नाई मानतर आत्मा चो हिसाब ले चलुं।
5 कसनबलले संवसारी लोग, देहें चो गोटमन ने मन लगायसोत; मानतर आत्मिक लोग, आत्मा चो गोटमन ने मन लगायसोत।
6 देहें चो गोटमन ने मन लगातोर मोरना आय; मानतर आत्मा चो गोटमन ने मन लगातोर जुग-जुग चो जीव आउर अस्तिर आय।
7 कसनबलले देहें चो गोटमन ने मन लगातोर महापरभु के बईर करतोर आय। हुन महापरभु चो नियम-कानुन चो हक ने नी रउआय, आउर केबई रउक नी सके;
8 जोन देहें चो हिसाब ने चलेसे, हुन महापरभु के हरिक नी करुक सके।
9 मानतर तुमी, महापरभु चो आत्मा पावलासाहास जाले, देहें चो हिसाब ले नाई, मानतर आत्मा चो हिसाब ने चलसास। कोचई मने जीसु किरिस्त चो आत्मा नीआय जाले, हुन किरिस्त चो लोग नोआय।
10 मानतर किरिस्त तुमचो मने आसे जाले, पाप चो किरता देहें मोरलोने बले तुमचो आत्मा जुग-जुग जीव रयदे। कसनबलले महापरभु तुमके धरमकारी मानलोसे।
11 जीसु के मोरलो थान ले जियालो आत्मा तुमचो ने आसे जाले, जोन किरिस्त जीसु के मोरलो थान ले जियालो, हुन आपलो आत्मा बाटले तुमचो नास होतो देहें के बले जियायदे।
12 ए भाईमन, आमी लागा लागलुसे मानतर देहें चो नाई कि आमी देहें चो इछा हिसाब ले दिन काटुं।
13 कसनबलले तुमी देहें चो इछा हिसाब ले दिन काटलोने मोरासे, मानतर आत्मा बाटले देहें चो पाप बुतामन के नास करलोने तुमी जीव राहासे।
14 महापरभु चो आत्मा हिसाब ले चलतो सपाय लोग, हुनचो बेटा-बेटीमन आत।
15 कसनबलले महापरभु तुमके फेर ले कमेया होतो आत्मा नी दिलोसे कि तुमी डरते राहा, मानतर हुनचो आत्मा बाटले तुमी हुनचो बेटा-बेटीमन होआसे, जेचोले तुमी “ए बुआ, ए बाबा!” बलुन हागदेयसास।
16 महापरभु चो आत्मा खुदे आमचो आत्मा संगे गवई देयसे कि आमी महापरभु चो बेटा-बेटीमन आंव।
17 आमी महापरभु चो बेटा-बेटीमन आंव जाले, हकदार बले आंव, आउर किरिस्त चो संगी हकदार आंव। आमी हुनचो संगे दुख पावलु जाले, हुनचो संगे मयमा बले पावां।
एतो समया ने दखा देतो मयमा
18 मोचो हिसाब ले, एबे चो दुख आउर तकलीस हुन एतो समया चो मयमा चो पुरे, गोटोक रेटे चो नोआय।
19-20 ए संवसार फोकाहा ने पाप चो डंड ने पड़ली। ए आपलो मन-इछा ले नाई, मानतर आसा चो हक ने करु महापरभु बाटले आय। तेबे संवसार खुबे आसा ले महापरभु चो बेटा-बेटीमन दखा देतो बाट दखेसे
21 कि ए संवसार बले नास होतो ले छंडाय होउन महापरभु चो बेटा-बेटीमन संगे मयमा पावतो आसा ने आसे।
22 कसनबलले आमी जानुंसे, नवा संवसार पावतो आसा ले, ए संवसार चो सपाय बानी एबे ले दुखा काजे कहरेसे आउर कलपडाहा होयसे।
23 आउर सोजे संवसार ची नाई मानतर आमी बले, जोनमन के महापरभु आपलो आत्मा चो पईल फर दिलोसे, बललोने महापरभु चो बेटा-बेटीमन होतो चो बाट दखुंसे, खुद बले कहरुंसे कि आमचो देहें चो छंडावा होओ।
24 ए आसा बाटले आमचो मुक्ति होलीसे; मानतर जोन जिनीस चो आसा आमी करुंसे, हुन मिरलोने आमचो आसा नी रये। कसनबलले आसा करलो तीज मिरले, तेबे फेर हुनचो आसा काय काजे करतोर आय?
25 मानतर आमी नी मिरलो तीज चो आसा करुंसे जाले, धीरजा ले हुनचो बाट बले दखुंसे।
26 असनी बरन ले पवितर आत्मा बले आमचो निमल बेरा साका होयसे, कसनबलले आमी नी जानुंसे कि पारथना कसन नीती ले करतोर आय, मानतर आत्मा खुदे सांगुक नी सकतो असन गोटमन ले सुयकुन-सुयकुन आमचो काजे गुहारेसे।
27 मन के परखतो महापरभु जाने कि आत्मा काय मन करेसे? कसनबलले आत्मा पवितर लोगमन काजे महापरभु चो मन-इछा असन गुहारेसे।
28 आमी जानुंसे, महापरभु के मया करतो लोग के, बललोने जोनमन के महापरभु आपलो मन-इछा ले हागदिलोसे, जोन बले होयसे सपाय भलई काजे ची होयसे।
29 कसनबलले जोनमन के महापरभु आगतले बाछलोसे हुनमन के आपलो बेटा असन मानलोसे कि जीसु, सबु भाईमन ले पईलात होओ।
30 जोनमन के हुन आगतले बाछलोसे हुनमन के हागदिलोसे बले; आउर जोनमन के हागदिलोसे हुनमन के धरमकारी मानलोसे; आउर जोनमन के धरमकारी मानलोसे हुनमन के मयमा बले दिलोसे।
महापरभु चो मया ले आमके काई अलग करुक नी सके
31 ए गोटमन चो बारे ने आमी काय बलवां? महापरभु आमचो संगे आसे जाले, कोन आमके बिरुद करुक सके?
32 जोन आपलो खुद चो बेटा के बले नी बचाउन आमचो पाप चो पलटा हुनके मोरतो काजे दिलो, तेबे फेर हुन, हुनचो संगे आमके सपाय बानी कसन ने नी देयदे?
33 महापरभु ची आपलो बाछलो लोगमन के धरमकारी मानलोसे; तेबे फेर हुनमन के कोन कसूर तेंगड़ुक सके?
34 जीसु किरिस्त मोरलो आउर मोरलो थान ले जीव उठुन महापरभु चो उजा हाथ बाटे बसलोसे, आउर आमचो काजे गुहारेसे, तेबे फेर कोन आमके डंड चो हुकुम देयदे?
35 काय, तकलीस नोहले बिपती, डाटा-टेवा नोहले भूके रतोर, फटई-टुटई नोहलो रतोर, गराहां नोहले खांडा ले मारतोर आमके किरिस्त चो मया ले अलग करुक सके?
36 पवितर सास्तर ने लिखलीसे:
“तुचो काजे आमी रोजे दिने मोरना ले जुजुंसे।
आमके पूजतो मेंडामन असन समजसोत।”†
37 तेबले बले आमी आमके मया करतो किरिस्त बाटले, ए सपाय गोटमन ने खुबे बड़े जीत पाउंसे।†
38 कसनबलले मय पक्का जानेंसे कि मोरना, जीवना, सरगदूत, बड़े पन, एबे हो नोहले एतो समया हो, सकत, डेंग,
39 गड़िया नोहले संवसार चो बनालो काई तीज आमके महापरभु चो मया ले अदरे करुक नी सके, जोन मया आमके परभु किरिस्त जीसु बाटले मिरलीसे।