रोमी 9

महापरभु आउर हुनचो बाछलो लोग

1-3 काय रे धनी, मोचो कुटुम भाईमन चो मुक्‍ति काजे मय महापरभु ले सराप पाउन किरिस्‍त ले अलग होले बले नंगत होती! कसनबलले मोके हुनमन काजे खुबे दुख-तकलीस आउर अमदेया फिकिर धरलीसे। किरिस्‍त ने रउन मय सत बलेंसे - मुरे फंद नी गोटेयायें। मोचो मन-चेतन बले पवितर आत्‍मा बाटले एचो गवई देयसे।

4 हुनमन इसराएलिमन आत। हुनमन के ची बेटामन होतो हक, मयमा, बायदामन, नियम-कानुनमन, आराधना आउर महापरभु चो बायदामन बले दिलोसे।

5 आमचो पुरखामन बले इसराएलिमन आत। आउर किरिस्‍त बले देहें हिसाब ने हुनमन चो थर ने जनमलो, जोन सपाय चो महापरभु आय, हुनचो धन-धन जुग-जुग होते रओ, आमीन।

6 मानतर महापरभु दिलो बचन फोकाहा नी होए। कसनबलले इसराएली थर ने जनमलो सपाय लोगमन इसराएली नोआत,

7 आउर अबराहम ले जनमलो सपाय लोगमन, हुनचो सत बेटा-बेटीमन नोआत। मानतर महापरभु अबराहम के बललो: “इसहाक ले ची तुचो थर बलदे।”^†

8 बललोने देहें चो हिसाब ले जनमलो लोग के महापरभु चो बेटा-बेटी नी बलदे, मानतर बायदा ले जनमलो बेटा-बेटी ले थर मानदे।^*

9 महापरभु असन बायदा करलो: “एतो बरक एई समया ने मय एयंदे आउर सारा के बेटा होउन रयदे।”^†

10 आउर इतलीचे नाई, रिबका बले आमचो पुरखा इसहाक ले पेटेहारिन रली।

11 आउर जांवर-जिया लेका-पिलामन जनमुन बले नी रला आउर हुनमन काई नंगत नोहले अडरा बुता बले नी करुन रला, हुदलदांय महापरभु रिबका के बललो, “बड़े लेका, नानी लेका चो कमेया होयदे।”^†

12 महापरभु कोकई बले बाछतोर, हुनचो बुता हिसाब ले नाई, मानतर महापरभु चो मन-इछा हिसाब ले आय। एईकाजे कि हुनचो मन-इछा असन उआट अमदेया पुरा होते रओ।

13 जसन बचन ने लिखलीसे, “मय जाकूब के एसाव ले जुगे मया करले।”^†

14 असन आय जाले आमी काय बलवां? काय महापरभु ओनियाव करेसे? केबई नाई!

15 कसनबलले महापरभु मोसा के बललो:

“मय जेके दया करुक मन करेंसे, हुनके दया करेंदे।

आउर जेके जीव-दुखुक मन करेंसे, हुनके जीव-दुखेंदे।”^†

16 एईकाजे महापरभु चो जीव दुखतोर, कोनी मन करले नोहले मसागत करले नी मिरे, मानतर महापरभु चो मन-इछा ले ची मिरेसे।

17 कसनबलले पवितर सास्‍तर ने, महापरभु, फिरोन राजा के बललो: “मय, तुके राजा-पन एईकाजे दिले कि मोचो सकत तुचो उपरे दखाउक होओ आउर मोचो नाव के संवसार चो सपाय लोग जानोत।”^†

18 एईकाजे कि महापरभु जेके दया करुक मन करेसे हुनचो उपरे दया करेसे, आउर जेके कटुर करुक मन करेसे हुनके कटुर करेसे।

महापरभु चो रीस आउर हुनचो दया

19 तेबे तुमी मोके असन पूछुक सकास, “आमी महापरभु चो मन-इछा ले ची जीउंसे जाले, हुन आमके कसन ने कसूर तेंगड़ेसे? कोन महापरभु चो इछा के बिरुद करुक सके?”

20 ए मनुक, महापरभु के गोट उलटातो बीता तुय कोन आस? काय घड़लो जिनीस, घड़लो बीता के बलुक सके: “तुय मोके असन काय काजे बनालीस?”^†

21 काय, कुमार के माटी-ढींढा उपरे हक नीआय कि गोटकी ढींढा ले रांदतो कुंडरी (मान चो), आउर पोतना कुंडरी (ओमान चो) घड़ो?

22 असन बरन ले महापरभु बले आपलो रीस आउर सकत दखातो मन-इछा करलो। तेबे आपलो बनालो लोगमन के रीस ले नास होउक नी दिलो, मानतर खुबे धीरजा ले सहलो।

23 आउर आगे ले ची दया करतो काजे बनालो लोगमन के, महापरभु आपलो मयमा दखाउक मन करलो,

24 बललोने आमी जहूदीमन के ची नाई मानतर बिजातीमन के बले हागदिलोसे। काय, ए बड़े गोट नोआय?

25 जसन होसे अगमजानी चो किताप ने लिखलीसे:

“जोन मोचो रयत नी रला,

हुनमन के मोचो रयत बलेंदे।

आउर जोनमन के मया नी करते रले,

हुनमन के मया करेंदे।”^†

26 आउर

असन होयदे कि “जोन थानो लोगमन के,

तुमी मोचो रयत नोआहास, बलु रलो,

हुनी थानो लोगमन जीवत महापरभु चो बेटा-बेटी बलाय होदे।”^†

27 आउर जसाया, इसराएल चो बारे ने चिचियाउन-चिचियाउन बलेसे:

“इसराएल चो बेटा-बेटीमन चो गनती, समूंद रेटे चो बारु कटार असन होले बले,

हुनमन ले खिंडिक असन ची लोग बाचदे।

28 कसनबलले महापरभु ए संवसार चो नियाव करुन, आपलो धारनिक बुता के झटके पुरा करेदे।”^†

29 जसाया अगमजानी जसन आगे ले बलुन रये:

“सरग-सेनामन चो महापरभु आमचो बंस के नी बचाउ रले,

सदोम आउर अमोरा असन, आमचो बले बंस बुड़ती।”^†

पतेयातो बाटले धारनिक होतोर

30 असन आय जाले आमी काय बलवां? बिजातीमन धारनिक होउक नी डगराते रला, फेर बले हुनमन धारनिक होला, कसनबलले हुनमन महापरभु के सतपतेयाला।^†

31 मानतर नियम-कानुन हिसाब ले चलुन धारनिक होउक डगरातो इसराएलिमन, नियम-कानुन हिसाब ने खिंडिक बले चलुक नी सकला।^†

32 कसन ने चलुक नी सकला? कसनबलले हुनमन बिसवास बाटले नाई, मानतर आपलो करलो बुतामन ले धारनिक होउक डगराते रला। हुनमन हकनतो पकना^* ने हकनुन धोका खादला,^†

33 जसन धरमसास्‍तर ने लिखलोर आसे:

“दखा, मय सियोन ने गोटोक हकनतो पकना

आउर गोटोक अड़ंगा होतो सिलपट मंडायंदे।

मानतर जोन बले हुनके पतेयायदे हुन केबई लाज नी पड़े।”^†