10
ए भाईमन, मय खुबे मन करेंसे आउर महापरभु ले पारथना करेंसे कि इसराएलिमन मुक्ति पाओत।
2 मय हुनमन चो बारे ने गवई देयंसे कि हुनमन महापरभु चो भर ने तो रयसोत, मानतर सत बुद ले नाई।
3 कसनबलले हुनमन महापरभु बाटले होतो धारनिक के नी जानला आउर आपलो धारनिक के पुरे पाड़ुक खोजला। असन करुन, महापरभु बाटले धारनिक होतो उआट के नी मानला।
4 कसनबलले किरिस्त आमचो पापमन काजे जतरा होउन नियम-कानुन के पुरा करलो कि एदांय हुनके पतेयातो सपाय लोगमन धारनिक होओत।
सपाय काजे मुक्ति
5 मोसा लिखलोसे, “जोन मनुक नियम-कानुन ले मिरतो धारनिक ने नंगत ले चलेसे हुन, हुनचेई ले जीव रयदे।”†
6 मानतर बिसवास ले मिरतो धारनिक चो बारे ने सास्तर बलेसे: “तुय आपलो मन ने असन नी बल कि किरिस्त के आनतो काजे ‘सरग ने कोन चेगेदे?’”
7 नोहले, “किरिस्त के मोरलोमन ले जीयाउन आनतो काजे तलपुर ने कोन उतरेदे?”
8 मानतर पवितर सास्तर बलेसे: “बचन तुचो लगे आसे, तुचो टोंडे आउर तुचो मन ने आसे।”† एई बिसवास चो बचन आमी सुनाउंसे
9 कि तुय आपलो टोंड ले, “जीसु के परभु आय,” बलुन मानले, आउर आपलो मन ने, “महापरभु, जीसु के मोरलोमन ले जियालोसे,” बलुन पतेयाले, मुक्ति पावसे ची।
10 कसनबलले धारनिक होतो काजे आपलो मन ने बिसवास करतोर आय, आउर मुक्ति पावतो काजे आपलो टोंड ले जीसु के परभु आय बलुन मानतोर आय।
11 कसनबलले पवितर सास्तर ने लिखलीसे: “जोन बले हुनके पतेयायदे हुन केबई लाज नी पड़ेदे।”†
12 कसनबलले जीसु जमाय चो परभु आय आउर हुनचो नाव धरतो लोगमन के खुबे बर देउआय। हुनमन जहूदी होओत नोहले बिजाती।
13 कसनबलले “जोन बले परभु चो नाव धरेदे, हुन मुक्ति पायदे।”†
14 मानतर जीसु के नी पतेयातो लोग, हुनचो नाव कसन ने धरदे? आउर जोन हुनचो बारे ने नी सुनलासे, हुनमन जीसु के कसन पतेयादे? आउर कोनी नी सांगलोर कसन ने सुनदे?
15 आउर कोनी नी पठालोर कसन ने सांगुक जादे? जसन लिखलोर आसे: “दखा, नंगत खबर सुनाउक जातो लोग चो पांय कितलो मान लाईक आय।”†
16 मानतर जमाय लोग हुन नंगत खबर के नी पतेयाला, जसन जसाया अगमजानी बलेसे, “ए परभु, कोन आमचो सुनालो नंगत खबर के सतपतेयाला?”†
17 एईकाजे बचन सुनले तो पतेयाउक होयसे, आउर कोनी किरिस्त चो बचन के सांगलो ने तो सुनुक होयसे।
18 मानतर मय पूछेंसे, “काय, हुनमन नी सुनला?” सुनतोने तो सुनला ची; कसनबलले लिखलोर आसे:
“हुनचो राग तो गुलाय संवसार ने
आउर हुनचो बचन मंजपुर चो कोना-कोना ने अमरलीसे।”†
19 मय फेर पूछेंसे, “काय, इसराएलिमन हुन नंगत खबर के नी समजला?”
मोसा आगे बले बलु रये:
“मय नानी जातमन बाटले तुमचो मन ने ईरका उबजायंदे।
आउर बिजातीमन बाटले तुमके रीस चेगायंदे।”†
20 फेर जसाया खुबे ढाढ़ुस ले बलेसे:
“जोनमन मोके डगराते नी रला,
हुनमन मोके पावला।
आउर जोनमन मोके पूछते बले नी रला, हुनमन के मय दखा दिले।”
21 मानतर इसराएल चो बारे ने महापरभु असन बलेसे,
“मय रोजे दिने हुकुम नी मानतो
आउर गोट उलटातो लोगमन चो बाट दखते रले।”†