इसराएलिमन काजे महापरभु चो दया
11
एईकाजे मय पूछेंसे, काय, महापरभु आपलो रयत के छांडुन दिलो? केबई नाई! मय बले तो इसराएली आंय। अबराहम चो थर आउर बिनयामीन बंस चो आंय।
2 महापरभु आगे ले बाछलो आपलो लोग के नी छांडलो। काय, तुमी नी जानास, पवितर सास्तर ने एलिया चो बारे ने काय लिखलोर आसे?
जहूदीमन चो सास्तर (11:2)
3 “ए परभु, हुनमन तुचो सपाय अगमजानीमन के मोरते मारला, आउर तुचो बेदीमन के बले भोसड़ाला। मय एकलाय बाचलेसे आउर एदांय हुनमन मोचो बले जीव धरुक खोजेसोत।”†
4 मानतर महापरभु हुनके बललो, “तुय एकलाय चे नाई, मानतर मोके मानतो सात हजार आउर मनुकमन के बचालेसे, जोनमन बाअल देव के पांय नी पड़लासोत।”†
5 असने ची, खिंडिक असन लोग एबे बले आसोत, जोनमन के महापरभु आपलो दया ले बाछुन बचालोसे।
6 आउर ए, महापरभु चो दया ले आय जाले, फेर बुता हिसाब ले नोआय। बुता हिसाब ले होलोने, फेर दया के दया नी बलदे।
7 तेबे फेर काय होली? इसराएलिमन जेके डगराते रला, हुन, हुनमन के नी मिरली, मानतर बाछलो लोग के मिरली आउर आदो लोग चो मन के कटुर करलो।
8 एईकाजे कि जसन पवितर सास्तर ने लिखलोर आसे,
“महापरभु हुनमन के आजी बले भारी झूमा ने ढाकलोसे।
असन आंईक-कान दिलोसे,
जेचोले दखुक-सुनुक नी सकोत।”†
9 दाउद बलेसे,
“हुनमन चो भोज हुनमन काजे जाल आउर फांदा होओ,
आउर धोका खाओत आउर आपलो करलो अडरा बुता चो पलटा डंड पाओत।
10 हुनमन चो आंईक-कान अंधार पड़ो कि हुनमन दखुक-सुनुक नी सकोत,
आउर हुनमन चो करांड अमदेया लोउन रओ।”†
11 मय फेर पूछेंसे, काय, इसराएलिमन अमदेया काजे घसरतो काजे धोकड़ला? केबई नाई! मानतर हुनमन चो धोकड़लो किरता बिजातीमन के मुक्ति मिरली कि इसराएलिमन ईरका होओत।
12 इसराएलिमन पाप करलो किरता संवसार के धन आउर हुनमन के नोकसान होलो किरता बिजातीमन के नफा होयसे जाले, हुनमन सपाय किरिस्त के पतेयातो बाटले धारनिक होलोने, काय-काय नी होउक सके!
कलम जोड़तो कटार ले बिजातीमन चो मुक्ति
13 मय तुमी बिजातीमन के बलेंसे, कसनबलले मय तुमचो काजे पठालो-बीता आंय। एईकाजे मोके सोपलो सेवा बुता काजे बड़ाई करेंसे
14 कि असन करुन बिजातीमन ले मोचो कुटुम-लोग के ईरका उबजाउन खिंडिक-आदक लोग के बले मुक्ति कराउक होओ।
15 महापरभु इसराएलिमन के छांडलो के संवसार के मुक्ति मिरली, तेबे महापरभु हुनमन के आपलो मानलोने, काय, मोरलो थान ले जीवलो कटार नी होयदे?
16 भेंट चेगालोर पईल लड्डु पवितर आय जाले, लड्डु बनातो काजे चटकलो पिसान बले पवितर आय। चेर पवितर आय जाले जमाय खेंदामन बले पवितर आय।
(पुरखा अबराहम, इसहाक आउर जाकूब के नंगत जयतून रूक चो चेर आउर इसराएलिमन के हुनी रूक चो खेंदामन चो कटार करुन सांगेसे।)
17 महापरभु नंगत जयतून रूक चो आदो खेंदामन के गोंदुन पकालो आउर तुमी जोन रान जयतून रूक चो खेंदामन आहास, तुमके हुन नंगत रूक ने जोड़लो। एदांय तुमी हुन नंगत रूक चो चेर ले नंगत खादी-पीदी चो भागी होलास।
18 तेबे तुमी नंगत जयतून रूक चो कलम-जोड़लो खेंदामन होलुसे बलुन गुमान नी करा। कसनबलले तुमी चेर के नाई, मानतर चेर तुमके थामलीसे।
19 तुमी असन बलासे; “आमके कलम-जोड़तो काजे हुन खेंदामन के गोंदलो।”
20 हव, हुनमन के, नी पतेयालो किरता गोंदलो, मानतर तुमी, महापरभु के सतपतेयालो किरता तुमके हुन नंगत रूक ने जोड़लो। एईकाजे गुमान नी करा, मानतर महापरभु के डरा।
21 कसनबलले महापरभु, हुन मूर खेंदामन के डंड दिलो जाले, तुमके बले डंड देयदे ची।
22 एईकाजे महापरभु चो दया आउर रीस के जाना। दखा, जोनमन नी पतेयाला हुनमन के कटुर करलो, आउर तुमी पतेयालास गुने तुमके दया करलो। मानतर तुमी हुनचो दया ने चमकट नी रलास जाले, तुमके बले गोंदुन पकायदे।
23 इसराएलिमन बले पतेयाला जाले, महापरभु हुनमन के फेर नंगत जयतून रूक ने जोड़ुक सके।
24 तुमी बिजातीमन, जोन रान जयतून रूक चो गोंदलो खेंदामन आहास, तुमी नंगत जयतून रूक चो नी होले बले, महापरभु तुमके हुता जोड़लो। तेबे हुन आपलेई मूर खेंदामन के नंगत जयतून रूक ने, कसन ने जोड़ुक नी सके?
जमाय इसराएलिमन काजे मुक्ति
25 ए भाईमन, मय मन करेंसे कि तुमी ए भेद चो गोट के जाना, नोहले तुमी आपने के खुबे बुदंती समजासे। भेद चो गोट एई आय, किरिस्त के पतेयातोने बिजातीमन चो गनती पुरत ले आदो इसराएलिमन असनीचे कटुर रदे।
26 आउर असने बरन ले सपाय इसराएलिमन मुक्ति पावदे; जसन लिखलोर आसे:
मुक्ति देउ सियोन ले एयदे,
हुन जाकूब कुटुम ले भक्ति नी करतो मन-बिचार के गुचायदे,
27 आउर हुनमन ले मोचो करलो बायदा तेबे पुरा होयदे,
जेबे मय हुनमन चो पापमन के गुचायंदे।†
28 नंगत खबर के नी मानलो किरता इसराएलिमन, महापरभु चो बयरी आत, एई किरता तुमचो नफा होली; मानतर महापरभु पुरखा ले करलो बायदा हिसाब ले हुनमन के बाछलो, आउर हुनमन एबे बले हुनचो लाडरा आत।
29 कसनबलले महापरभु दिलो बर आउर हागदेतोर केबई फोकाहा नी होए।
30 आगे तुमी महापरभु चो हुकुम नी मानते रलास, मानतर एबे इसराएलिमन हुकुम नी मानलो किरता महापरभु तुमचो उपरे दया करलो।
31 एदांय इसराएलिमन महापरभु चो हुकुम के नी मानसोत आउर जसन तुमचो उपरे महापरभु दया करलो, उसनेची महापरभु ले हुनमन बले दया पाओत।
32 महापरभु एईकाजे सपाय चो मन के हुकुम नी मानतो काजे कटुर करलो कि हुन सपाय उपरे दया करुक सको।
महापरभु चो जय-जय
33 बापरे! महापरभु चो दया-धन, आउर बुद-गियान कितलो जुगे आय। हुनचो बिचारमन चो थाहा नीआय आउर हुनचो उआट के कोन समजुक सके!
34 “परभु चो मन के कोनी जानुक नी सके,
आउर हुनके कोनी सिखाउक नी सके।”†
35 “महापरभु के कोन, काय दिलोसे गुने,
हुनचो पलटा महापरभु हुनके देयदे?”†
36 कसनबलले जमाय के हुनी बनालो आउर जमाय हुनचेई सकत ले चमकट आसे, आउर जमाय हुनचेई काजे आय।
हुनचो मयमा जुग-जुग होते रओ। आमीन।