महापरभु काजे आत्मिक-सेवा
12
एईकाजे ए भाईमन, महापरभु चो दया के सूरता कराउन मय तुमके गुहारेंसे कि आपलो देहें के जीवत, पवितर आउर महापरभु चो मन भावतो असन भेंट चेगाहा। एई तुमचो बाटले महापरभु काजे आत्मिक-सेवा आय।
2 एदांय तुमी ए संवसारी लोग असन नी होआ, मानतर तुमी मन बोहड़ाउन नवा होलो किरता तुमचो चलनी-बुलनी महापरभु के भावतो असन होओ। तेबे तुमी, तुमचो काजे महापरभु चो भलई, नंगत आउर सिद इछा पक्का ले जानासे।
3 मोके मिरलो दया हिसाब ले मय तुमी सपाय के सांगेसे, तुमी जितलोने आसास, उतलीने राहा। मानतर महापरभु बाटुन दिलो बिसवास हिसाब ले आपने के नंगत बुद ले समजा।
4 जसन आमचो गोटोक देहें ने खुबे अंगमन आसे, आउर सपाय अंगमन चो आउर-आउर बुता आय,
5 उसनेची आमी खुबे लोग आसुं, आमी सपाय किरिस्त ने गोटकी देहें होउन, गोटोक-दुसर चो अंग आंव।
6 महापरभु चो दया ले सपाय के बरन-बरन चो बर मिरलीसे, हुन बरमन के बाहारा। तेबे जेके अगमगोट सांगतो बर मिरलीसे, हुन आपलो बिसवास हिसाब ले अगमगोट सांगो;
7 सेवा करतो बर मिरलीसे जाले, सेवा करते रओ; कोकई सिखातो बर मिरलीसे जाले सिखाते रओ;
8 जेके बचन सुनातो बरदान मिरलीसे, गोटोक-दुसर के बचन सुनातो भर ने रओ; जेके दान देतो बरदान मिरलीसे, हुन गोटकी मन ले दान देओ; जोन बाट दखाउ आय, हुन, सत-मन ले बाट दखाओ; जेके दया करतो बरदान मिरलीसे, हुन हरिक ले दया करो।
किरिस्तीमन काजे नियम
9 गोटोक-दुसर के सत-मन ले मया करा: अडरा-बुता के घिनियाहा आउर भलई बुता करते राहा।
10 गोटोक-दुसर के दादा-भाई असन मया करा, आउर आपलो ले आगर दुसर के मान करा
11 बुता करतोने ठग नी होआ, आत्मिक लय ने रउन महापरभु चो सेवा सत-मन ले करा।
12 महापरभु आपलो बायदा पुरा करेदे ची, तुमी हुनी आसा ने हरिक राहा: तकलीस बेरा बिसवास ने चमकट राहा, सरलगा पारथना करते राहा।
13 पवितर लोगमन के जोन बले लागेदे, हुनमन के दियास आउर सगा-मान करते राहा।
14 तुमके डाटा-टेवा करतो लोग के बर दिया। सराप नी दिया मानतर बर दिया।
15 हरिक-उदीम होतो लोगमन संगे हरिक होआ, आउर गागतो लोगमन संगे गागा।
16 सपाय लोग संगे गोटकी सोर ने राहा, गुमान नी करा, खुद के बुदंती नी समजा, मानतर सोज लोगमन संगे मिलुन-मिसुन राहा।
17 कोनी तुमचो अडरा करेसे जाले, तुमी बले हुनचो अडरा नी करा। जोन बुतामन सपाय लोगमन काजे नंगत आय, हुनके ची करा।
18 जितरो होउक सके तुमी सपाय लोगमन संगे मिलुन-मिसुन राहा।
19 ए मोचो मीत भाईमन, तुमी पलटा नी धरा, मानतर सपाय गोट के महापरभु चो हाथे सोपुन दियास। कसनबलले पवितर सास्तर ने लिखलीसे, “परभु बलेसे, पलटा धरतोर मोचो काम आय, मय ची पलटा धरेंदे।”†
20 मानतर, “तुचो बयरी भूके आसे जाले हुनके भात-पेज खुआव, पियास होलोसे जाले पानी खुआव, कसनबलले तुय असन करलीस जाले हुन आपने लाज पड़ेदे।”†
21 अडरा बुता तुमके नी जीतो, मानतर भलई बुता करुन अडरा बुता के जीता।