राज करतोमन चो हक ने रतोर
13
महापरभु ची सपाय राज करतोमन के हक दिलोसे आउर महापरभु नी दिलोर, कोकई काई हक नी मिरे। एईकाजे तुमी सपाय लोग राज करतोमन चो हक ने राहा।
2 जोन बले राज करु बीता चो हक के नी मानेसोत, हुनमन महापरभु चो हुकुम के बिरुद करेसोत। एईकाजे हुनमन डंड पावदे ची।
3 राजपालमन के नंगत बुता करतोमन नाई, मानतर अडरा बुता करतोमन डरुआत। तुमके डर नोहलोर रउक भायसे जाले नंगत बुता करा। तेबे हुन तुमके सहरायदे।
4 कसनबलले राज करु बीता तुमचो भलई काजे महापरभु चो कमेया आय, मानतर तुमी अडरा बुता करतो काजे डरा कसनबलले हुन खांडा के फोकाहा काजे नी धरलोसे। हुन अडरा बुता करुमन के डंड देतो काजे महापरभु चो कमेया आय।
5 तुमी महापरभु ले मिरतो डंड चो डर काजे ची नाई, मानतर मन-चेतन बले एई गवई देयसे, एईकाजे राज करु बीता चो हक ने राहा,
6 आउर पट्टी बले दियास। कसनबलले हुनमन महापरभु चो कमेयामन आत आउर ए बुता के नंगत ले करतोर हुनमन चो जुमे आय।
7 जेके पट्टी देतोर आय हुनके पट्टी दियास, जेके सारी देतोर आय हुनके सारी दियास, जेके डरतोर आय हुनके डरा आउर जेके इजित-मान करतोर आय हुनके इजित-मान करा। जेके जोन बले देतोर आय हुनके देउन दियास।
गोटोक-दुसर के मया करा
8 गोटोक-दुसर के मया करतो लागा के छांडुन आउर हुनचो ले आगर काई लागा नी पड़ा। कसनबलले जोन दुसर के मया करेसे हुनी नियम-कानुन चो गोट के पुरा करेसे।
9 कसनबलले, “तुमी बेबिचार नी करा, माने नी मारा, चोरी नी कर आउर लालच नी करा,”† आउर जितरो बले हुकुममन आसे, हुन सपाय, ए गोटकी गोट ने पुरा होयसे। “आपने के मया करतो असन आपलो घर लग चो लोग के मया कर।”†
10 मया करतो लोग, आपलो घर लग चो लोगमन के काई नोकसान नी करोत। एईकाजे मया करले नियम-कानुन चो गोट पुरा होयसे।
11 गोटोक-दुसर के मया करते रउं। कसनबलले महापरभु आपलो पवितर लोग के मुक्ति करतो समया लगे अमरलीसे, बललोने जोन समया ने आमी किरिस्त के पतेयाउ रलु, हुनचो हिसाब ले आमचो मुक्ति होतो समया एदांय खुबे लगे आसे। एईकाजे आमी चेत ने रउं।
12 रात सरेसे, एदांय उजर होयसे। एईकाजे आमी उजर चो हतियार के धरुं, बललोने, अंधार चो अडरा बुतामन के छांडुन उजर चो नंगत बुतामन करुं।
13 मंजन ने करतो असन नंगत बुतामन के ची करुं आउर होस-नंजरेया, मोंदहा, बेबिचारी, ढीठाहा, झगड़ाहा, ईरकाहा बुतामन नी करुं।
14 मानतर परभु जीसु किरिस्त चो नंगत गुन ने समपुरन होउं आउर देहें चो लालच बुतामन के छांडु।