पठालो-लोग 7

स्‍तिफनुस बड़े धरम पंच ने गोटेयायसे

तेबे बड़े पुजारी, स्‍तिफनुस के पूछलो, “काय, तुके देतो बदीमन सते आय?”

2 हुन बललो, “ए मोचो भाईमन, आउर बुआमन! सुना, आमचो पुरखा अबराहम, हारान ने बसापत करलो ले आगे, जेबे हुन मिसुपुतामिया राज ने रलो, तेबे मयमा चो महापरभु हुनके दखा दिलो,

3 आउर हुनके बललो, तुय आपलो लोग-बाग आउर राज ले निकरुन भाति हुन राज ने जा, जेके मय तुके दखायंदे।”

4 तेबे हुन आपलो राज ले, जोन थाने कसदेयामन रते रला, निकरलो आउर हारान ने जाउन बसापत करलो; आउर हुनचो बुआ चो मोरलो पाछे महापरभु हुनके हुताले आनुन ए राज ने बसापत करालो, जोन थाने एबे तुमी आसास।

5 आउर हुनके काई धन नी मिरली बललोने, पांय मंडातो इतलो बले भुंय नी दिलो, मानतर बायदा करलो कि मय ए राज के तुचो आउर तुचो पाछे एतो थर चो हक ने करुन देयंदे; हुदलदांय हुनचो कोनी बले बेटा-बेटी नी होउ रओत।

6 “महापरभु असन बललो, ‘तुचो थर चो लोग दुसर राज ने परदेसी होदे; आउर हुनमन हुनके कमेया बनादे आउर चार सव बरक ले हुनमन चो संगे अडरा बेबार करदे आउर खुबे डंड देदे’।

7 महापरभु फेर बललो, ‘जोन जात चो हुनमन कमेया होदे, हुनमन के मय डंड देयंदे; आउर एचो पाछे तुचो थर, हुताले एउन एई थाने मोचो सेवा करदे।’^†

8 आउर महापरभु हुनचो संगे बायदा करलो, आउर हुन बायदा चो चीना बललोने, महापरभु दिलोर चीना ‘खतना’ आय; आउर ए बायदा चो हिसाब ने, इसहाक हुनचो ले जनमलो; आउर आठ दिन पुरतोके अबराहम हुनचो खतना करलो। एचो पाछे इसहाक, आपलो बेटा जाकूब चो, आउर जाकूब आपलो बाराझन बेटामन चो खतना करलो। जोनमन थान ले बारा बंस होली।

9 आउर आमचो बंस चो बुआमन, आपलो भाई जूसुफ के ईरका-कुचर होउन मिसर राज ने कमेया होतो काजे बिकुन दिला। मानतर महापरभु हुनचो संगे रलो।^†

10 महापरभु जूसुफ के, हुनचो सपाय बिपती ले छंडालो, आउर हुनके बुद दिलो कि मिसर चो राजा फिरोन ले दया पाओ। एईकाजे हुनके राजा फिरोन मिसर राज चो आउर राजा चो सपाय माहालमन चो राजपाल बनालो।^†

11 तेबे सपाय मिसर आउर कनान राजमन ने भूक पड़ली; जेचो किरता लोगमन के खुबे तकलीस होली, आउर आमचो दादी पुरखामन चो खादी-पीदी सरुन गेली।^†

12 मानतर आमचो पुरखा जाकूब असन सुनलो, मिसर राज ने धान-पान आसे, तेबे आमचो दादी पुरखामन के पईल हार हुता पठालो।

13 आउर हुनमन चो दुसर हार एतोके, जूसुफ आपलो भाईमन के आपलो बारे ने सांगलो आउर जूसुफ चो जात के राजा फिरोन जानलो।

14 तेबे जूसुफ आपलो बुआ जाकूब आउर आपलो सपाय कुटुम के हागदेउकलाय पठालो, जोनमन तीन कोड़ी पंदरा लोग रला।

15 तेबे जाकूब आउर सपाय कुटुम चो लोग मिसर राज ने गेला, आउर हुता हुन आउर आमचो दुसर दादी पुरखामन मोरुन गेला।^†

16 आउर हुनमन चो मोड़ीमन के कनान राज चो सेकेम ने नेउन भाति, हुता हुन मोठ ने संगाला, जेके अबराहम धन देउन सेकेम ने, हमोर चो बेटा ले घेनुन रलो।

17 मानतर जिदलदांय हुन बायदा करलो गोट पुरा होतोर रली, जोन बायदा महापरभु, अबराहम संगे करुन रलो, हुदलदांय मिसर राज ने आमचो इसराएलिमन खुबे जन होते गेला।

18 तेबे मिसर राज ने दुसर राजा होलो, जोन जूसुफ चो काई गोट नी जानते रलो।^†

19 हुन आमचो जात ले चलाकी करुन नफा उठालो आउर आमचो दादी पुरखामन संगे अडरा काम करलो, हुनमन के आपलो कोंहरो पिलामन के पकाउन देउक पड़ली कि हुनमन मोरुन जाओत।

20 हुदलदांय मोसा चो जनम होली, जोन महापरभु चो पुरे खुबे सुंदर रलो। आउर हुनके तीन मयना ले आपलो बुआ घरे लुकाउन पोसला।

21 मानतर जिदलदांय हुनके मोरतो काजे छांडुन दिला, तेबे राजा फिरोन चो बेटी हुनके नीली आउर आपलो निज बेटा बनाउन पोसली।

22 आउर मोसा के मिसरेयामन चो सपाय गियान सिखाला, आउर हुन, गोट गोटेयातो ने आउर बुता करतोने बलबीता होलो।

23 जिदलदांय हुन दुय कोड़ी बरक चो होलो, तेबे हुनचो मने असन बिचार ईली कि मय मोचो इसराएली जात भाईमन संगे भेट होयंदे।

24 आउर हुन आपलो जात भाईमन ले गोटोक उपरे, गोटोक मिसरेया ओनियाव करतो के दखुन हुनके बचालो, आउर मिसरेया के मोरते मारुन आपलो भाई के डंड करलो चो पलटा धरलो।

25 मोसा बिचार करलो, मोचो भाईमन समजदे कि महापरभु मोचो बाटले हुनमन चो मुक्‍ति करेदे, मानतर हुनमन नी समजला।

26 दुसर दिने, जिदलदांय दुयझन इसराएलिमन आपने-आपने लड़ते रला, तेबे हुन, हुता ईलो आउर मिला-मिसा करातो मन ले बललो, ‘ए मनुकमन, तुमी भाई-भाई आहास, गोटोक दुसर उपरे, काय काजे ओनियाव करसास?’

27 मानतर जोन आपलो भाई संगे ओनियाव करते रलो, हुन मोसा के ठेगलुन बललो, ‘तुके कोन आमचो उपरे राज करतो आउर नियाव करतो बीता बनालोसे?

28 काय, जसन तुय काली मिसरेया के मोरते मारलीस, उसने मोके बले मोरते मारतो काजे होयसीस?’

29 ए गोट के सुनुन मोसा परालो आउर मिदयान राज ने परदेसी होउन रलो, आउर हुता हुनचो दुयझन बेटामन जनमला।^†

30 मिदयान राज ने दुय कोड़ी बरक पुरलो पाछे, गोटोक सरगदूत मोसा के सिनाई डोंगरी लगे रान ने जरतो लदिया-रूक चो आईग ने दरसन दिलो।

31 मोसा एके दखुन खुबे अकचक्‍याउन गेलो आउर जिदलदांय दखतो काजे लगे गेलो, तेबे महापरभु चो असन गोट सुनलो:

32 ‘मय तुचो पुरखामन अबराहम, इसहाक आउर जाकूब चो महापरभु आंय’। तेबे मोसा डरुन थरथरलो आउर हुनके दखतो ढाढ़ुस नी होली।

33 तेबे महापरभु, मोसा के फेर बललो, ‘तुचो पांय थान ले पनई निकराउन देस, कसनबलले जोन लगे तुय उबा आसीस, हुन पवितर भुंय आय।

34 सते मय, मिसर राज ने आपलो लोगमन चो नानागती होलो के दखलेसे आउर हुनमन चो हाय आउर गागतो-बोगतो के सुनलेसे। एईकाजे मय, हुनमन के छंडातो काजे एथा उतरलेसे। एदांय आव, मय तुके मिसर राज ने पठायंदे।’^†

35 मोसा के, जोन इसराएलिमन असन बलुन मने नी करुन रला कि ‘कोन तुके आमचो उपरे राज करतो बीता आउर नियाव करतो बीता बनालोसे?’ हुनकेई महापरभु राज करतो बीता आउर छंडातो बीता बनाउन हुन सरगदूत बाटले पठालो, जोन हुन जरतो बुटा ने दखा देउन रलो।^†

36 हुनी मनुक, हुनमन के मिसर राज ले निकराउन लाल समदूर ने आउर रान भीतरे दुय कोड़ी बरक ले अचरित बुता आउर चीना दखाउन-दखाउन हुनमन के बाट दखालो।

37 ए हुनी मोसा आय जोन इसराएलिमन के बललो, ‘महापरभु तुमचो भाईमन ले मोचो असन गोटोक अगमजानी के पठायदे जसन हुन मोके पठालो।’^†

38 ए हुनी आय, जोन रान भीतरे चो इसराएली मंडली ने रलो, आउर सिनाई डोंगरी ने सरगदूत हुनचो संगे गोटेयालो आउर आमचो दादी पुरखामन संगे बले रलो; आउर हुनकेई जीवता बचन मिरली कि हुन बचन के आमचो लगे अमराओ।

39 मानतर आमचो पुरखामन मोसा चो गोट के मानुक मन नी करला, आउर हुनके गुचाउन आपलो मने, मिसर राज ने बोहड़ुन जातो बिचार करला।

40 हुनमन मोसा चो भाई हारुन के बलला, ‘आमचो काजे असन देवमन बनाव जोनमन आमचो पुरे-पुरे हीं‍डोत, कसनबलले ए मोसा जोन आमीमन के मिसर राज ले निकराउन आनलो, आमी नी जानु हुनके काय होली।’^†

41 हुन दिनमन ने, हुनमन गोटोक बाछा चो मूरत बनाउन भाति हुनी मूरत चो पुरे जतरा करला आउर आपलो हाथ ले करलो बुता ले हरिक होउक मुरियाला।

42 मानतर महापरभु, हुनमन के पाट करुन छांडुन दिलो कि हुनमन बादरी चो तारामन चो सेवा करोत, जसन अगमजानीमन चो किताप ने लिखलोर आसे:

‘ए इसराएल कुटुम चो लोगमन, काय, तुमीमन रान भीतरे दुय कोड़ी बरक ले जतरा मोचोई काजे करते रलास?

43 नाई, तुमी मोलेक देव चो तमु आउर

रिफान देव चो तारा के धरुन हिंडते रलास।

हुन मूरत-घटनमन के, तुमी पांय पड़तो काजे बनाउन रलास।

एईकाजे मय तुमके बेबिलोन राज चो हुन पाट पठायंदे।’^†

44 महापरभु चो हरिक होतो साकी चो तम्‍बु, रान भीतरे आमचो दादी पुरखामन संगे रली, जेबे ले हुनमन मिसर राज ले निकरुन ईला। महापरभु मोसा के बललो कि जोन घटन तुय दखलिसीस हुनचो असन एके बनाव।

45 हुनी तम्‍बु के, आमचो दादी पुरखामन आगे ले पावला आउर खुबे बरक पाछे पुरखामन जहोसू संगे एथा धरुन ईला; जिदलदांय हुनमन बिजातीमन चो राजामन के आपलो हक ने करला, जोन बिजातीमन के महापरभु हुनमन चो पुरे ले खेदलो; आउर हुन तम्‍बु, दाउद राजा बेरा ले रली।

46 महापरभु, दाउद के खुबे दया करलो, आउर हुन महापरभु के गुहारलो कि मय जाकूब चो महापरभु काजे गोटोक रतो जगा बनायंदे।

47 मानतर दाउद राजा चो बेटा सुलेमान, महापरभु काजे गोटोक मंदिर बनालो।

48 तेबले बले सपाय ले बड़े महापरभु, मनुक चो हाथ चो बनालोर मंदिर ने नी रये। जसन अगमजानी बललोसे:

49 ‘परभु बलेसे,

सरग मोचो राजगादी

आउर मंजपुर मोचो पांय मंडातो पीड़ा आय।

मोचो काजे तुमी कसन बरन चो मंदिर बनाहासे?

आउर मोचो रतो जगा कसन होयदे?

50 काय सरग, मंजपुर आउर ए सपाय मोचो बनालोर नोआंय?’^†

51 ए एड़जामन आउर मन आउर कान के खतना नी करलो लोगमन, तुमी अमदेया पवितर आत्‍मा चो बिरुद करसाहास। जसन तुमचो दादी पुरखामन करते रला, उसनेची तुमी बले पवितर आत्‍मा चो बिरुद करसाहास।

52 अगमजानीमन ले कोके तुमचो दादी पुरखा दुख नी दिला? हुनमन हुन धरमकारी एतो चो गोट आगे ले सांगतो बीतामन के मोरते मारुन दिला, आउर एबे तुमीमन हुनचो धरातो बीतामन आउर मोरते मारतो बीतामन होलास।

53 तुमीमन तो महापरभु, सरगदूतमन चो बाटले दिलो नियम पावलास, तेबले बले तुमीमन हुनके नी मानलास।”

स्‍तिफनुस के पकना संगे मारतोर

54 असन गोटमन सुनुन भाति धरम पंच चो लोगमन आईग असन रीस होला आउर स्‍तिफनुस चो उपरे दात कडरुक मुरियाला।

55 मानतर स्‍तिफनुस पवितर आत्‍मा ले भरपुर होउन सरग बाटे दखलो। आउर महापरभु चो मयमा आउर जीसु के हुनचो उजा हाथ बाटे उबा होलोर दखलो।

56 हुन बललो, “दखा, मय सरग के उगाड़ी होलोर आउर मनुक चो बेटा, जीसु के महापरभु चो उजा बाटे उबा होलो के दखेंसे।”

57 एके सुनुन हुनमन खुबे जोर ले कोलार होउन कान के चुटुन दिला आउर गोटोक मन होउन हुनचो उपरे गेला।

58 आउर हुनके सहर चो बाहरे ओड़गोड़ते-ओड़गोड़ते निकराउन भाति पकना संगे मारुक मुरियाला। फंदी साकीमन आपलो फटई टुटई के हिटाउन साउल नाव चो गोटोक जुवान चो पांय लगे संगाउन दिला।

59 हुनमन स्‍तिफनुस के पकना संगे मारते रला। आउर स्‍तिफनुस, असन बलुन पारथना करते रलो, “ए परभु जीसु, मोचो जीव के तुय ने।”

60 आउर हुन मांडिखुटा देउन किरकिरुन बललो, “ए परभु, ए पाप खेमा कर आउर हुनमन चो उपरे नी लगाव।” असन बलुन भाति मोरुन गेलो। साउल बले हुनके मोरते मारतो ने राजी रलो।