सातझन के बाछतोर
6
हुन दिनमन ने, सतपतेयालो लोगमन खुबे होते रला, तेबे जूनानी बोली बलतो जहूदीमन, इबरानी बोली बलतो जहूदीमन के गुरमुरुक मुरियाला, कसनबलले रोजे दिन चो सेवा ने, आमचो रांडीमन चो नंगत दिया-ठोआ नी होयसे।
2 तेबे हुन बाराझन पठालो-लोगमन, सतपतेयालो लोगमन चो मंडली के आपलो लगे हागदेउन बलला, “ए नंगत नोआंय कि आमी महापरभु चो बचन सांगुक छांडुन खुआतो-पीयातो बुता ने रवां।
3 एईकाजे ए भाईमन, आपलो संग चो सातझन, मान पावलो मनुकमन के, जोनमन पवितर आत्मा आउर अकल-गियान ले भरपुर आसोत, असन लोगमन के तुमी बाछा। आमी हुनमन के ए बुता सोपुन देवां।†
4 मानतर आमी पारथना आउर महापरभु चो गोट सांगतो सेवा ने रउंदे।”
5 ए गोट सतपतेयालो लोगमन चो मंडली के नंगत लागली। तेबे हुनमन सतपतेयातोने आउर पवितर आत्मा ले भरपुर रलो स्तिफनुस नाव चो गोटोक मनुक के आउर फिलिपुस, परखुरुस, नीकानोर, तिमोन, परमिनास आउर अंताकेया निकुलाउस के बाछला। निकुलाउस जहूदी धरम ने एउन रलो।†
6 आउर एमन के पठालो-लोगमन चो पुरे उबा करला, आउर पठालो-लोगमन पारथना करुन भाति एमन चो उपरे हाथ संगाला।†
7 आउर महापरभु चो बचन खुबे बिगरली; आउर जरूसलेम ने सतपतेयालो लोगमन चो गनती खुबे बाड़ते गेली; आउर जहूदी पुजारीमन ले खुबे लोगमन जीसु किरिस्त चो नंगत खबर के सतपतेयाला।
स्तिफनुस के धरतोर
8 स्तिफनुस, महापरभु चो दया आउर सकत ले भरपुर होउन लोगमन चो मंजिगता बड़े-बड़े महासंदे चो बुतामन आउर चीनामन दखाते रलो।
9 तेबे हुन मंडली-घर जोन लिबरतिनमन चो बलाय होते रली, हुन थान ले खिंडिक जहूदीमन एउन स्तिफनुस संगे बला-बली करुक मुरियाला; आउर हुन जहूदीमन कुरेनी, सिकंदरिया, किलिकिया आउर आसिया राज ले ईलो लोगमन रला।
10 मानतर स्तिफनुस अकल-गियान आउर पवितर आत्मा ले गोटेयातो के हुनमन, हुनके गोट उलटाउक नी सकला।
11 एईकाजे हुनमन खिंडिक लोगमन के खुसनाय फुसियाला, जोनमन बलुक मुरियाला, “आमी ए मनुक के मोसा चो दिलोर नियममन आउर महापरभु के निंदरतोके सुनलुसे।”
12 असन गोट बलुन भाति हुनमन, लोगमन, धरम-सियानमन आउर धरम-पंडितमन के रीस चेगाला। स्तिफनुस के धरुन भाति बड़े धरम पंच ने आनला।
13 आउर हुनमन फंदी साकीमन बनाउन आनला, जोनमन बलला, “ए मनुक, ए पवितर मंदिर आउर नियम-कानुनमन चो उलटा बलुक नी छांडेसे।
14 आमीमन एके असन बलतोके सुनलुसे कि जीसु नासरतेया ए ठान के तस-नस करुन देयदे, आउर आमीमन के मोसा दिलो नीतीमन के पलटुन देयदे।”
15 तेबे धरम पंच ने बसलो सपाय लोगमन स्तिफनुस बाटे गरेया-गरेया दखला, तेबे हुनचो थमना सरगदूत चो थमना असन बरतो के दखला।