हनन्या आउर सफीरा
5
मानतर हनन्या नाव चो गोटोक मनुक रलो, जोन आपलो बायले सफीरा संगे मिसुन गोंदाएक भुंय के बीकला।
2 हुनमन दुनो मिसुन, भुंय बीकलो रुपया ले गोटोक बाटा आपनमन काजे संगाला, आउर हनन्या दुसर बाटा के पठालो-लोगमन चो पांय लगे आनुन मंडालो।
3 मानतर पतरस हुनके बललो, “ए हनन्या! तुचो मन भीतरे कसन ने सयतान समाली, कसन तुय पवितर आत्मा के फंद गोटेयालीस आउर भुंय बीकलो रुपया थान ले खिंडिक लुकाउन संगालीस?
4 जिदलदांय भुंय तुचो लगे रली, काय, तुचो खुद चो नी रली? आउर जिदलदांय बिकुन दिलीस, तेबे काय, हुन रुपया तुचो हक ने ची नी रली? तुय आपलो मन ने ए गोट काय काजे बिचार करलीस? तुय मनुक ले नाई, मानतर महापरभु ले फंद गोट गोटेयालीस।”
5 ए गोट सुनते खन हनन्या घसरुन फटनांय मोरलो; आउर सुनतो लोगमन के खुबे डर समाली।
6 जुवानमन उठुन भाति हुनचो मोड़ी के फटई ने गुंडियाला आउर बाहरे नेउन मोड़ा-भाटा ने माटी दिला।
7 हुनचो तीनक घंटा पाछे हुनचो बायले, ए गोट के मुरे नी जानुन भीतरे पतरस लगे ईली।
8 तेबे पतरस हुनके पूछलो, “मोके सांग, काय, तुमीमन हुन भुंय के इतरोई ने बिकुन रलास?” हुन बलली, “हव, इतरोई ने बिकुन रलु।”
9 तेबे पतरस हुनके बललो, “ए काय गोट आय, तुय आउर तुचो मनुक, परभु चो आत्मा के परखतो काजे सोर ने रलास? दख, तुचो मनुक के माटी दिलो लोगमन बाट-डेवना ने उबा आसोत, आउर हुनमन तुके बले बाहरे नेदे।”
10 तेबे हुन तूरते पतरस चो पांय लगे घसरुन फटनांय मोरली। जुवानमन भीतरे ईला आउर हुनचो मोरलो के दखला, हुनके बले बाहरे नीला आउर हुनचो मनुक लगे माटी दिला।
11 आउर सपाय सतपतेयालो लोगमन चो मंडली के आउर ए गोट सुनतो सपाय लोगमन के खुबे डर समाली।
पठालो-लोगमन खुबे बेमार लोगमन के चेकरायसोत
12 पठालो-लोगमन आपलो हाथ ले खुबे चीनामन आउर महासंदे चो बुतामन लोगमन चो मंजिगते दखाते रला आउर हुन सपाय सतपतेयालो लोगमन, गोटोक मन होउन सुलेमान चो सार थाने रूंडा होते रला।
13 मानतर दुसर लोगमन ले कोनी बले हुनमन संगे मिसतो ढाढ़ुस नी करला; तेबले बले लोग हुनमन के सहराते रला।
14 मानतर खुबे बायलेमन आउर खुबे मनुकमन परभु उपरे सतपतेयाला आउर मंडली ने मिसते रओत।
15 लोगमन, बेमारमन के बाटे आनुन खटेयामन आउर टाटीमन ने सुआउन देते रला कि पतरस ईलोने हुनचो छांय कोचई उपरे पड़ुन जाओ।
16 आउर जरूसलेम चो आली-पाली चो गांवमन ले बले लोगमन, बेमारमन आउर देव-भूत ले असकट होलो लोगमन के आनते रला आउर सपाय चेकरते रला।
17 तेबे बड़े पुजारी आउर हुनचो संगे रतो लोगमन, जोन सदूकिमन चो गोहड़ी चो रला, खुबे ईरका-कुचर होउन हुनमन चो उपरे ईला।
18 आउर पठालो-लोगमन के धरुन जयल घरे ढाकला।
19 मानतर राती बेरा, परभु चो गोटोक सरगदूत जयल घर चो कपाटमन के उगाड़ुन हुनमन के बाहरे निकराउन बललो,
20 “जाहा, मंदिर दुआरे उबा होउन ‘ए नवा जीव चो बचन’ सपाय लोगमन के सुनाहा।”
21 हुनमन एके सुनुन बड़े बियाने मंदिर दुआरे जाउन महापरभु चो गोट सांगुक मुरियाला: मानतर बड़े पुजारी आउर हुनचो संगवारीमन एउन बड़े धरम पंच के आउर इसराएल चो सपाय सियानमन के रूंडा करला, आउर जयल घरे खबर पठाला कि पठालो-लोगमन के आना।
22 मानतर पाईकमन हुता अमरुन हुनमन के जयल घरे नी पावला, आउर बोहड़ुन खबर दिला,
23 आमनमन जयल घर के खुबे नंगत ले ढाकलो के दखलु, आउर रखवारीमन के बाहरे दुआरे उबा होलो के दखलु। मानतर कपाट उगाड़तो के भीतरे कोनी नी रओत।
24 जिदलदांय मंदिर राखा करतो बीतामन चो मुखिया आउर पुजारीमन चो मुखियामन ए गोट के सुनला, तेबे हुनमन खुबे फिकिर ने पड़ला, “एदांय कसन होयदे आउर काय करवां।”
25 हुदलीदांय कोनी एउन हुनमन के सांगलो, “दखा, जोनमन के तुमी जयल घर ने ढाकुन रलास, हुन मनुकमन मंदिर दुआरे उबा होउन लोगमन के महापरभु चो गोट सांगसोत।”
26 तेबे रखवारीमन चो मुखिया, पाईकमन संगे जाउन पतरस आउर जूहन्ना के फेर आनला। मानतर मारा पेटा नी करला। कसनबलले हुनमन, लोगमन आमके पकना संगे मारदे बलुन डरते रओत।
27 हुनमन, पतरस आउर जूहन्ना के भीतरे आनुन भाति धरम पंच ने उबा करला, आउर बड़े पुजारी हुनमन के पूछलो,
28 “काय, आमी तुमके पक्का चेतानी देउन भाति बलुन नी रलु, तुमी ए नाव ने नी सांगा? तेबले बले दखा, तुमी जरूसलेम ने गुलाय बाटे आपलो सिखानी के सांगलासाहास, आउर हुन मनुक चो मोरना चो पाप के आमचो उपरे तेंगड़तो बिचार करसास।”
29 तेबे पतरस आउर दुसर पठालो-लोगमन बलला, “मनुकमन चो हुकुम मानतो ले आगर महापरभु चो हुकुम के मानतोर आमचो काम आय।
30 आमचो दादी पुरखामन चो महापरभु, जीसु के मोरलो थान ले जियालो, जेके तुमी कुरूस ने लोहो खुटी ठेचुन मारुन रलास।
31 हुनकेई ची महापरभु आपलो उजा हाथ बाटे बसाउन परभु आउर मुक्ति देउ बनालो आउर सपाय हक सोपुन दिलो कि हुन इसराएलिमन के मन बोहड़ातो मोहका आउर पापमन चो खेमा देओ।
32 आमी ए गोटमन चो गवई आसुं, आउर पवितर आत्मा बले, जेके महापरभु हुनमन के दिलोसे जोनमन हुनचो हुकुम मानसोत।”
33 ए गोट के सुनुन, हुनमन आईग असन रीस होला आउर पठालो-लोगमन के मोरते मारतो बिचार करला।
34 मानतर गमलिएल नाव चो गोटोक फरीसी, नियम-कानुन चो गुरुजी रलो, आउर सपाय लोगमन हुनके इजित देते रला, हुन पंच ने उबा होउन पठालो-लोगमन के डंडिक काजे बाहरे नेतो हुकुम दिलो।
35 तेबे हुन बललो, “ए इसराएलिमन, जोन बले ए मनुकमन संगे करतो बिचार आसे, जानुन-बुजुन करा।
36 कितरो दिनमन चो आगे थियुदास असन बलते उठलो, मय बले कोनी आंय। चारक सव असन मनुकमन हुनचो संगे मिसला। मानतर हुनके मोरते मारुन दिला आउर हुनचो चेलामन ए बाटे हुन बाटे होउन गेला, आउर हाजुन गेला।
37 हुनचो पाटे मरदम सुवांरी चो बेरा जहूदा गलीलेया उठलो आउर लोगमन के आपलो बाटे करलो। मानतर हुनके बले मोरते मारुन दिला आउर जितरो लोग हुनचो उपरे भोरसा करते रला, जमाय ए बाटे हुन बाटे होउन गेला।
38 आउर एबे मय तुमके बलेंसे, ए मनुकमन ले अलगे ची राहा; आउर हुनमन संगे काई नाता नी रओ; कसनबलले ए धरम नोहले ए काम मनुक बाटले होलोने मेटुन जायदे।
39 मानतर ए महापरभु बाटले होलोने, तुमी हुनके मेटाउक नी सकास, असन होलोने तुमी महापरभु ले लड़तो बीतामन होआसे।”
40 तेबे हुनमन हुनचो गोट के मानला, आउर पठालो-लोगमन के भीतरे हागदेउन कोड़ा संगे मारला आउर ए हुकुम देउन भाति छांडुन दिला कि जीसु चो नाव ने काईची सिखानी नी दियास।
41 हुनमन ए गोट ले खुबे हरिक होउन, बड़े पंच चो मंजिगता ले जाते गेला कि आमी जीसु चो नाव ने इजित धराय होतो लाईक तो होलु।
42 रोजे दिने हुनमन मंदिर दुआरे आउर घरे-घरे नंगत खबर सुनाते आउर सिखाते रला कि जीसु ची किरिस्त* आय।