पतरस आउर जूहन्ना के धरम पंच चो पुरे आनतोर
4
जिदलदांय हुनमन लोगमन के असन बलते रला, तेबे पुजारीमन, मंदिर राखा करतो बीतामन चो मुखिया आउर सदूकिमन, हुनमन चो उपरे ईला।
2 हुनमन खुबे रीस होला कि हुनमन लोगमन के जीसु चो जीव उठतो चो गोट सिखाते रला आउर परभु जीसु किरिस्त चो गोट सांगुन-सांगुन, मोरलो थान ले जीव उठतो चो गोट के सांगते रला।
3 एईकाजे हुनमन के धरुन दुसर दिन होओतले जयल घरे ढाकुन रला, कसनबलले सांज होउन रली।
4 मानतर महापरभु चो गोट सुनतो लोगमन ले खुबे लोगमन सतपतेयाला आउर हुन मनुकमन, पांचेक हजार इतलो रला।
5 दुसर दिने जहूदीमन चो मुखियामन, धरम-सियानमन आउर धरम-पंडितमन जरूसलेम ने रूंडा होला।
6 हुनमन संगे बड़े पुजारी हन्नास आउर काइफा, जूहन्ना, सिकंदर आउर बड़े पुजारी चो कुटुम चो सपाय लोग बले रला।
7 हुनमन, पतरस आउर जूहन्ना के पुरे उबा करुन पूछला, “तुमी ए काम कोन सकत आउर कोचो नाव ले करलासाहास?”
पतरस, जहूदी मुखियामन के उत्तर देयसे
8 तेबे पतरस, पवितर आत्मा चो सकत ले भरपुर होउन हुनमन के बललो,
9 “ए लोगमन चो मुखियामन आउर सियानमन! ए निमल मनुक संगे जोन भलई होलीसे आउर एचो बारे ने आजी आमके हुन कसन ने चेंगचेंगा होलो बलुन पूछेसाहास जाले,
10 तुमी आउर इसराएल ने रतो सपाय लोगमन नंगत ले जाना, परभु जीसु किरिस्त नासरतेया के, जेके तुमीमन कुरूस ने चेगालास आउर महापरभु मोरलो थान ले जियालो, हुनचो नाव ने, ए मनुक तुमीमन चो पुरे चेंगचेंगा उबा आसे।
11 एई जीसु,
‘हुनी पकना आय, जेके तुमी कारिगिरीमन काई काम चो नोआंय बलुन पकाउन दिलास,
आउर हुनी, कोना चो मुंडी-पकना होलो।’†
12 आउर कोनी दुसर नाव ले मुक्ति नीआय; कसनबलले सरग चो खाले मनुकमन चो मंजिगते आउर कोनी दुसर नाव नी दिलासे, जेचो बाटले आमी मुक्ति पाउक सकुं।”*
13 जिदलदांय हुनमन, पतरस आउर जूहन्ना चो ढाढ़ुस के दखला आउर जानला कि एमन अपढ़ आउर असनी मनुक आत, तेबे भक्याला। फेर पाछे हुनमन चिताला कि एमन जीसु संगे रलासोत।
14 मानतर हुन मनुक, जोन चेकरुन रलो, पतरस आउर जूहन्ना संगे उबा होलो के दखुन भाति हुनमन चो बिरुद ने काई बलुक नी सकला।
15 एईकाजे हुनमन के धरम पंच ले बाहरे जातो काजे हुकुम देउन हुनमन आपलो मंजिगता बिचार करुक मुरियाला,
16 “आमी ए मनुकमन, संगे काय करवां? एमन गोटोक महासंदे चो काम दखालासोत, आउर एके जरूसलेम चो सपाय लोगमन जानसोत। एईकाजे आमी नाई नी बलुक सकुं।
17 मानतर ए गोट, लोगमन ने आउर नी बिगरो, एईकाजे आमी हुनमन के दागा देवां कि एमन जीसु चो नाव ने कोकई काई नी गोटेयाओत।”
18 तेबे हुनमन, पतरस आउर जूहन्ना के भीतरे हागदिला आउर चेतानी देउन असन बलला कि एदांय ले जीसु चो नाव ने काई बले नी सांगा आउर नी सिखावा।
19 मानतर पतरस आउर जूहन्ना हुनमन के बलला, “तुमीमन ची बिचार करा, काय, महापरभु पुरे ए नंगत आय कि आमी महापरभु चो गोट ले आगर तुमचो गोट के मानुआंव?
20 ए तो आमचो ले होउक ची नी सके कि जोन आमी दखलुसे आउर सुनलुसे हुनके आमी नी सांगु।”
21 तेबे हुनमन, पतरस आउर जूहन्ना के चेतानी देउन भाति छांडुन दिला। लोगमन चो रलो किरता हुनमन के डंड देतो काई दांव नी मिरली, कसनबलले जोन अचरित बुता होउन रली, हुनचो काजे सपाय लोग महापरभु चो जय-जय करते रला।
22 हुन मनुक, जेके चेंगचेंगा करुन अचरित चीना दखालासे, हुनचो उमर दुय कोड़ी बरक ले आगर रली।
सतपतेयालो लोगमन चो पारथना
23 जिदलदांय जहूदीमन चो मुखियामन, पतरस आउर जूहन्ना के छांडला, तेबे हुनमन सतपतेयालो लोगमन लगे ईला, आउर जोन बले पुजारीमन चो मुखियामन आउर धरम-सियानमन हुनमन के बलुन रला, सतपतेयालो लोगमन के सांगुन दिला।
24 एके सुनुन, हुनमन गोटोक मन होउन महापरभु के किरकिरुन बलला, “ए सपाय ले बड़े मालिक, सरग आउर मंजपुर, आउर समदूर आउर जोन बले हुता आसे, हुनके तुय ची बनालिसीस।†
25 तुय पवितर आत्मा ले आपलो सेवा करु आमचो पुरखा दाउद चो टोंड ले असन बललीसीस:
‘दुसर जातमन काय काजे रीस ने कल-कल मतालासोत?
आउर राज-राज चो लोगमन काय काजे फोकाहा उआट करलासोत?
26 महापरभु आउर हुनचो किरिस्त चो बिरुद लड़तो काजे संवसार चो राजामन तियार होला,
आउर राजपालमन गोटोक संगे रूंडा होला।’†
27 सते, तुचो पवितर सेवा करु जीसु चो बिरुद ने, जेके तुय अबिसेक करलिसीस; हेरोद राजा आउर पुन्तियुस पिलातुस बले दुसर जातमन चो लोगमन आउर इसराएलिमन संगे ए सहर ने रूंडा होला
28 कि जोन बले आगे ले तुचो सकत आउर बुद ने रली, उसने करोत।
29 ए महापरभु, एदांय हुनमन चो दागा के दख, आउर तुचो सेवकमन के तुचो गोट के खुबे ढाढ़ुस ले सुनातो काजे बर देस।
30 आउर तुचो उजरातो सकत दखाव; चीनामन आउर महासंदे चो बुतामन तुचो सेवा करु पवितर जीसु चो नाव ने करुक होओ।”
31 जिदलदांय हुनमन पारथना करुन सारला, तेबे हुनमन चो रूंडा होलो जगा हलली, आउर हुनमन सपाय पवितर आत्मा ले भरपुर होउन महापरभु चो बचन के खुबे ढाढ़ुस ले सुनाते रला।
32 आउर सतपतेयालो लोगमन चो मंडली, गोटोक मन आउर गोटकी बिचार चो रली, आउर कोनी बले आपलो धन के मोचो आय नी बलते रला, मानतर जमाय तीजमन सपाय चो रली।
33 आउर पठालो-लोगमन खुबे सकत ले परभु जीसु जीव उठतो चो साकी देते रला, आउर हुनमन जमाय चो उपरे भरपुर दया होते रली।
34 आउर हुनमन चो मंजिगता कोनी बले गरीब नी रला; कसनबलले जेचो थाने भुंय नोहले घर रली, हुनमन हुनके बिकुन-बिकुन, बीकलो तीजमन चो रुपया के आनुन पठालो-लोगमन चो पांय ने संगाउन देते रला,
35 आउर जेके जितरो काम पड़ते रली, हुनचो हिसाब ने गोटोक-गोटोक के बाटा करुन देते रला।