पतरस गोटोक मुटी-मांगु खोड़ेया के उजरायसे
3
पतरस आउर जूहन्ना अड़उ पाहार ने पारथना बेरा मंदिर बाटे जाते रला।
2 लोगमन, जनम ले खोड़ेया रलो गोटोक मनुक के आनते रला, जेके हुनमन रोजे मंदिर चो सुंदर नाव चो डेवना ने बसाउन देते रला कि हुन मंदिर ने जातो लोगमन के मुटी मांगो।
3 जिदलदांय हुन, पतरस आउर जूहन्ना के मंदिर ने जातो के दखलो, तेबे हुनमन ले मुटी मांगलो।
4 पतरस आउर जूहन्ना हुनचो बाटे नंगत ले दखला आउर पतरस हुनके बललो, “आमचो बाटे दख।”
5 हुन काई पावतो आसा ने हुनमन बाटे नंगत ले दखलो।
6 तेबे पतरस बललो, “सोन आउर चांदी तो मोचो लगे नीआय, मानतर जोन मोचो लगे आसे हुन तुके देयंसे। जीसु किरिस्त नासरतेया चो नाव ने, ‘उठ आउर हिंड’।”
7 पतरस हुनचो उजा हाथ धरुन हुन खोड़ेया के उबालो: आउर हुदलीदांय हुनचो पांयमन आउर मांडीमन ने बल ईली,
8 आउर हुन खोड़ेया उदलुन भाति उबा होलो, आउर हिंडुक-बुलुक मुरियालो, आउर हिंडते आउर डगाते महापरभु चो जय-जय करते हुनमन संगे मंदिर ने गेलो।
9 सपाय लोगमन हुनके हिंडतो के आउर महापरभु चो जय-जय करतो के दखला।
10 आउर हुनके चिताला कि ए हुनी आय, जोन मंदिर चो सुंदर नाव चो डेवना ने बसुन मुटी मांगते रलो। हुन चेंगचेंगा होलो किरता हुनमन भक्याउन आउर अकचक्याउन गेला।
पतरस लोग-कुड़ा के गोटेयायसे
11 जिदलदांय हुन, पतरस आउर जूहन्ना संगे रलो, तेबे सपाय लोग खुबे भक्याउन भाति सुलेमान चो बलाय होतो सार थाने, हुनमन लगे पराउन ईला।
12 एके दखुन भाति पतरस लोगमन के बललो, “ए इसराएलिमन, तुमी ए मनुक के दखुन, काय काजे भक्यालासाहास आउर आमके काय काजे असन दखसाहास, काय, आमीमन ची आपलो बल आउर धरम-करम ले एके हिंडतो-बुलतो लाईक बनाउन दिलु?
13 अबराहम, इसहाक आउर जाकूब चो महापरभु, हुनी आमचो दादी पुरखामन चो महापरभु, आपलो सेवा करु परभु जीसु के सपाय ले जुगे मयमा दिलो। तुमीमन हुनके धराउन दिलास आउर जिदलदांय पिलातुस हुनके छांडुन देतो काजे मन करलो, तेबले बले तुमीमन हुनचो पुरे नाई बललास।
14 तुमीमन, हुन पवितर आउर धरमकारी के ‘नाई’ बललास आउर गुहारलास कि गोटोक माने-मारा कयदी के तुमचो काजे छांडुन देओ।
15 आउर तुमीमन, जीवन चो बाट दखाउ के मोरते मारुन दिलास, मानतर महापरभु हुनके मोरलो थान ले जियालो; आउर ए गोट चो आमी गवई आसुं।
16 ए मनुक जीसु चो नाव ने, सतपतेयालो किरता बल पावलो, जेके तुमी दखसास आउर जानसास; हव, हुनी जीसु के सतपतेयालो किरता, ए मनुक चेंगचेंगा होलो, जसन तुमी दखसास।”
17 ए भाईमन, मय जाने, जोन तुमी जीसु के करलास, नी जानुन करलास, आउर उसने तुमचो पंच मुखियामन बले करला।
18 मानतर जोन गोटमन महापरभु, आगे ले आपलो सपाय अगमजानीमन बाटले सांगुन रलो कि हुनचो किरिस्त दुख उठायदे; आउर असन करुन हुन, ए गोटमन के सते करुन दिलो।
19 एईकाजे आपलो पाप के मानुन भाति मन बोहड़ाहा आउर महापरभु चो बाटे इआ कि तुमचो पाप मेटुन जाओ आउर परभु ले अस्तिर चो दिन एओ।
20 आउर हुन, जीसु किरिस्त के पठाओ, जेके तुमचो काजे आगे ले मुक्ति देउ बनालोसे।
21 “ए गोट पक्का आय, जोन गोट हुन आपलो पवितर अगमजानीमन बाटले आगे जुगे ले बललोसे कि हुन सरग ने हुदलदांय ले रयदे, जिदलदांय ले महापरभु सपाय गोटमन के नंगत नी करे।
22 जसन मोसा अगमजानी बललो, ‘महापरभु तुमचो भाईमन ले तुमचो काजे मोचो असन गोटोक अगमजानी के पठायदे, जोन बले हुन तुमके बलेदे, हुनचो गोट के नंगत ले सुना,†
23 मानतर कोनी मनुक, हुन अगमजानी चो गोट नी मानलोने हुनके महापरभु चो लोगमन ले अलगे करुन नास करेदे।’†
24 आउर सामुएल अगमजानी ले धरुन जितरो अगमजानीमन गोटेयालासोत, हुनमन सपाय ए दिनमन चो खबर दिलासोत।
25 तुमी महापरभु चो अगमजानीमन चो बेटा-बेटीमन आउर हुन पवितर बायदा चो भागी आहास, जोन बायदा, महापरभु तुमचो पुरखामन ले करुन रलो, जिदलदांय हुन अबराहम के बललो, ‘तुचो थर बाटले मंजपुर चो सपाय कुटुम चो लोग बर पावदे।’†
26 एईकाजे महापरभु आपलो सेवा करु जीसु के बाछुन भाति आगे ले तुमचो थाने पठालो कि तुमचो मंजिगता ले सपाय लोग के, हुनमन चो अडरा बुतामन ले फिराउन बर देओ।”