साउल, धरम मंडली के डंड देयसे
8
हुनी दिन ले साउल, जरूसलेम चो सतपतेयालो लोगमन चो मंडली के खुबे डाटा-टेवा करुक मुरियालो, आउर पठालो-लोगमन के छांडुन सपाय लोग जहूदिया आउर सामरिया राजमन ने ए बाटे-हुन बाटे पराला।
2 कोनी-कोनी भगतमन, स्तिफनुस चो मोड़ी के नेउन माटी दिला; आउर हुनचो काजे खुबे गागला।
3 मानतर साउल सतपतेयालो लोगमन चो मंडली के सत्यानास करते रलो, आउर घरे-घरे ओलुन मनुक आउर बायलेमन के ओड़गोड़ते-ओड़गोड़ते जयल घरे नेउन ढाकते रलो।
4 एबे जोनमन ए बाटे हुन-बाटे होउन रला, हुनमन नंगत खबर सुनाते-सुनाते बुलते रला।
5 फिलिपुस, सामरिया राज चो गोटोक सहर ने गेलो आउर हुता लोगमन के किरिस्त चो नंगत खबर सांगते रलो।
6 फिलिपुस जोन गोट के बललो, हुनके खुबे लोगमन सुनुन आउर जोन चीनामन हुन दखाते रलो हुनके दखुन भाति, गोटोक मन होउन नंगत ले सुनला।
7 खुबे लोगमन ले देव-भूतमन किरकिरुन निकरुन गेला, खुबे लकवा मारलो लोग आउर खोड़ेयामन बले उजरला।
8 एईकाजे हुन सहर चो लोगमन खुबे हरिक होला।
9 फिलिपुस चो एतो ले आगे, सामरिया सहर ने समोन नाव चो गोटोक मनुक रलो। आगे हुन जादु बीता रलो आउर सामरेया लोगमन के भकवा बनाते रलो। हुन बलते रये कि मय कोचई ले नानी नोआंय।
10 नानी ले धरुन बड़े, सपाय लोग हुनके इजित-मान करते रला आउर बलते रला, “ए मनुक महापरभु चो माहान सकत आय”।
11 हुन खुबे दिन ले आपलो जादु ले लोगमन के भकवा बनाउन रलो। एईकाजे हुनमन, हुनचो खुबे इजित-मान करते रला।
12 मानतर जिदलदांय हुनमन, फिलिपुस चो गोट के सतपतेयाला जोन महापरभु चो राज आउर जीसु किरिस्त चो नंगत खबर सुनाते रलो, तेबे मनुकमन आउर बायलेमन सपाय बपतिस्मा धरला।
13 तेबे जादु बीता समोन आपने बले महापरभु चो गोट के सतपतेयालो आउर बपतिस्मा धरुन फिलिपुस संगे रउक मुरियालो। हुन महापरभु चो अचरित बुतामन आउर चीनामन के दखुन भक्याते रलो।
14 जिदलदांय जरूसलेम ने रलो पठालो-लोगमन सुनला कि सामरिया लोगमन महापरभु चो गोट के मानलासोत, तेबे हुनमन पतरस आउर जूहन्ना के हुनमन लगे पठाला।
15 पतरस आउर जूहन्ना जाउन हुन सतपतेयालो लोगमन काजे पारथना करला कि हुनमन पवितर आत्मा पाओत।
16 कसनबलले पवितर आत्मा एबले कोचई उपरे नी उतरुन रली। हुनमन तो सोजे परभु जीसु चो नाव ने बपतिस्मा धरुन रला।
17 तेबे पतरस आउर जूहन्ना, हुनमन चो उपरे हाथ थापला आउर हुनमन पवितर आत्मा पावला।
18 जिदलदांय जादु बीता समोन दखलो कि पठालो-लोगमन जेचो उपरे हाथ थापलोने हुनके पवितर आत्मा मिरेसे, तेबे हुन, पतरस लगे रुपया आनुन बललो,
19 “ए सकत मोके बले दियास कि मय जेचो उपरे हाथ थापेंदे, हुनमन पवितर आत्मा पाओत।”
20 पतरस हुनके बललो, “तुचो पयसा तुचो संगे नास होउन जाओ, कसनबलले तुय महापरभु चो बरदान के पयसा ले घेनतो काजे बिचार करलीस।
21 ए गोट ने तुचो काई हक आउर बाटा नीआय कसनबलले तुचो मन महापरभु चो नंजर ने सोज नीआय।
22 एईकाजे ए अडरा उआट ले मन बोहड़ाउन परभु ले पारथना कर, असन होलोने तुचो मन चो बिचार खेमा होउक सके।
23 कसनबलले मय दखेंसे, तुचो मन पीता उलटलीसे आउर ओधरम ले बांदी होलीसे।”
24 तेबे जादु बीता समोन, पतरस आउर जूहन्ना के बललो, “तुमी मोचो काजे परभु ले पारथना करा कि जोन गोट तुमी बललासाहास, हुनमन ले काई बले मोचो उपरे नी पड़ो!”
25 हुनमन साकी देउन आउर परभु चो गोट सुनाउन जरूसलेम ने फिरुन गेला, आउर हुनमन बाटे सामरीमन चो खुबे गांवमन ने नंगत खबर सुनाते गेला।
26 परभु चो गोटोक सरगदूत फिलिपुस के बललो, “निकरुन भाति दखिन ने, हुन बाट ने जा, जोन जरूसलेम ले गाजा बाटे जायसे।” हुन बाट चिमचामनाय आसे।
27 हुन निकरुन जाते गेलो, आउर दखा, कूस राज चो रानी कंदाके चो पयसा-कोहड़ी संगातो गोटोक भंडारी रलो जोन ठेरवा रलो। हुन जरूसलेम ने आराधना करुक एउ रलो।
28 हुन आपलो रथ ने बसुन जसाया अगमजानी लिखलो किताप पढ़ते जाते रलो।
29 तेबे पवितर आत्मा फिलिपुस के बललो, “लगे जाउन रथ चो संगे-संगे हिंड।”
30 फिलिपुस हुन बाटे पराते गेलो आउर हुन भंडारी के जसाया अगमजानी चो लिखलोर किताप पढ़तो के सुनलो, आउर पूछलो, “काय तुय जोन पढ़सीस हुनके समजसीस?”
31 हुन फिलिपुस के बललो, “कोनी मोके नी समजालोर, मय कसन ने समजेंदे?” एईकाजे हुन फिलिपुस के बिनालो, तुय रथे चेगुन मोचो लगे बस।
32 पवितर सास्तर चो जोन अध्या हुन पढ़ते रलो, हुन असन रली:
“हुनके मेंडा असन मोरते मारतो काजे अमराउन दिला
आउर जसन मेंडा पिला आपलो रुआं खुरातो लोग लगे ओगाय रयसे,
असने हुन बले ओगाय रलो।
33 हुनचो नानागती बेरा हुनके नियाव नी मिरली,
आउर हुनचो पीड़ी चो बारे ने कोन सांगुक सकेदे?
कसनबलले मंजपुर ले हुनचो जीव के धरला।”†
34 भंडारी, फिलिपुस के पूछलो: “दया करुन मोके सांग, अगमजानी ए गोट कोचो काजे बलेसे, आपलो काजे कि कोनी दुसर काजे?”
35 तेबे फिलिपुस, हुनके पवितर सास्तर चो एई बचन ले धरुन जीसु चो नंगत खबर सुनालो।
36 बाटे जाते-जाते हुनमन कोनी पानी रलो जगा ने अमरला, तेबे भंडारी बललो, “दख, एथा पानी आसे, एबे मय काय काजे बपतिस्मा धरुक नी सकें?”
37 फिलिपुस बललो “तुय गोटोक मन ले सतपतेयायसीस जाले बपतिस्मा धरुक सकीस।” भंडारी बललो, मय सतपतेयायंसे कि जीसु किरिस्त महापरभु चो बेटा आय।
38 तेबे हुन रथ ठेबातो हुकुम दिलो। फिलिपुस आउर भंडारी, दुनो पानी ने उतरला, आउर फिलिपुस, हुनके बपतिस्मा दिलो।
39 जिदलदांय हुनमन पानी भीतर ले निकरुन उपरे ईला, तेबे परभु चो आत्मा फिलिपुस के झटके उचाउन नीलो। भंडारी हुनके फेर केबई नी दखलो। आउर हुन खुबे हरिक होउन आपलो बाटे गेलो।
40 मानतर फिलिपुस, असदोद ने दखा दिलो, आउर जिदलदांय ले कयसरिया ने नी अमरलो, हुदलदांय ले सहर-सहर ने नंगत खबर सुनाते गेलो।