दानिएल 7

दानिएल आपलो दखलो दरसन के सांगतोर

चार ठन पसुमन।

बेबिलोन चो राजा बेलसेसर चो राजपाट चो पईल बरक ने दानिएल आपलो खटेया ने सोवलोदांय सपना आउर दरसनमन दखलो। आउर हुन, आपलो दखलो सपना के लिखलो: 2 मय दानिएल, राती बेरा असन दरसन दखले, चारोकुती ले लेहरा-धुका एउन समदूर चो पानी के उलट-पुलट करली। 3 तेबे समदूर ले चार ठन खुबे बड़े पसु/जनावरमन निकरला, हुनमन गोटोक दुसर ले भिने रला। 4 पईल बड़े पसु, बीजापुलिया-बाग असन रये आउर हुनके रावना चो असन पाटकी रये। तेबे मोचो दखु-दखु हुनचो पाटकीमन के उखनला आउर हुनके भुंय ले उठाउन माने असन दुनो पांय ने उबाला; आउर हुनके मनुक चो मन दिला। 5 फेर मय दुसर बड़े पसु के दखले, हुन भालु असन रये। हुन आपलो गोटोक पांय चो बल ने टेड़ा/पाटकुती चो पांयमन चो बल ने उबुन रये। हुन आपलो टोंडे दातमन चो मंजारे तीन ठन पंजरा-हाड़ामन के धरुन रये। कोनी हुनके बललो, “उठ! खुबे मास खा!” 6 फेर मय तीसर बड़े पसु के दखले, हुन डूरका असन रये। हुनचो पाट ने चड़ईमन चो असन चार ठन पाटकीमन आउर हुनचो चार ठन मुंड रये। हुनके राज करतो हक दिला। 7 फेर मय राती चो दरसन ने चवथा बड़े पसु के दखले। हुन खुबे डरतो लाईक आउर खुबे बल बिती रये। हुनचो दस ठन सींग आउर लोहा चो बड़े-बड़े दातमन रये। हुन पारदी पसु के चीरी-चपट करुन खाते रये आउर बाचलो मास के पांयमन ने रमंदते रये। हुन आगे चो तीनो पसुमन ले भिने रये। 8 मय हुनचो सींगमन के धियान ले दखते रये, तेबे हुन सींगमन चो मंजारे नानी असन सींग निकरली जेचोले आगे चो तीन ठन सींगमन चेर संगे उखनला। नवा अखरलो सींग ने माने चो असन आंईकमन आउर गुमानी गोट गोटेयातो टोंड बले रये।

आगे-जुग चो सियान/अमदेया चो सियान

9 फेर मय दखु-दखु, सरासरी ने

राजगादीमन मंडाला

आउर हुन राजगादी ने गोटोक आगे-जुग चो सियान^* बसलो,

हुनचो फटई बादरी असन खुबे उजर रये

आउर हुनचो चूंदी निरवा ऊन असन रये;

हुनचो राजगादी उठतो आईग चो रये,

आउर हुन राजगादी चो चकामन ढग-ढकतो आईग रये।

10 हुन सियान चो

पुरे ले आईग निकरुन, नंदी असन बोहते रये।

हजार-हजार झन हुनचो सेवा करते रओत,

आउर लाखो-कोटी झन हुनचो पुरे रओत।

फेर नियाव करुमन चो मंडली बसला,

आउर कितापमन^† के उगाड़ला।

11 हुन सींग चो गुमानी गोटमन चो राग सुनुन मय दखते रले, मोचो दखु-दखु, हुन पसु के मोरते मारला आउर हुनचो मोड़ी के आईग ने डसाला। 12 आउर बाचलो तीनो पसुमन चो हक के झीकला। मानतर खिंडिक समया^† काजे हुनमन के जीव छांडला। 13 मय राती बेरा दरसन ने,

मनुक चो बेटा असन

कोकेई बादरी संगे एतोके दखले।

आउर हुनके,

आगे-जुग चो सियान लगे अमराला।

14 फेर मनुक चो बेटा के हक,

मयमा-मान आउर राजपाट दिला

कि देस-देस, जात-जात आउर भिने-भिने भासा-बोली बलतो लोग

हुनचो सेवा करोत।

हुनचो हक जुग-जुग रयदे

आउर केबई नी सरेदे,

आउर हुनचो राजपाट अमदेया चमकट रयदे।

पसुमन चो अरथ

15 तेबे मय दानिएल, दखलो दरसन किरता मोचो मन खुबे डाहाल-बिकाल होली आउर मय खुबे डरले। 16 तेबे मय हुता उबा रलो लोगमन लगे जाउन हुनमन ले एकलो के सपाय गोटमन चो अरथ पूछले, तेबे हुन मोके दरसनमन चो अरथ परगट करलो: 17 “हुन चार ठन बड़े-बड़े पसुमन, मंजपुर ने उबजास होतो चार ठन राज आय। 18 मानतर सबुले बड़े महापरभु चो पवितर लोगमन के हुन राज मिरेदे आउर हुनमन, हुन राज चो हकदार जुग-जुग काजे होदे।”

19 तेबे मोचो मने हुन चवथा बड़े पसु चो बारे ने जानतो बिचार ईली जोन तीनो बड़े-बड़े पसुमन ले भिने आउर खुबे डरतो लाईक रये। हुनचो दातमन लोहा चो आउर नकमन पीतल चो रये, हुन तीजमन के कतरुन चीरी-चपट करते रये। आउर बाचलो तीजमन के पांय ने रमंदते रये; 20 आउर हुनचो मुंड चो दस ठन सींग चो बारे ने आउर नवा अखरलो सींग जेके आंईक आउर खुबे गुमानी गोट गोटेयातो टोंड रये, आउर सपाय सींगमन ले आगर डरतो लाईक रये। हुन अखरलोके तीन ठन सींगमन टुटली। 21 मय दखु-दखु, हुन सींग महापरभु चो पवितर लोग संगे लड़ुन खिंडिक समया काजे जीतली। 22 तेबे आगे-जुग चो सियान ईलो, आउर सपाय ले बड़े महापरभु चो पवितर लोग के नियाव-दाव ने जीतालो आउर हुनमन के राज करतो हक दिलो।

23 हुन मोके सांगलो, “चवथा बड़े पसु,

चवथा राज आय

जोन मंजपुर चो दुसर राज ले भिने होयदे।

ए राज, मंजपुर चो सपाय राज के

रमदुन रन-बन आउर सत्‍यानास करेदे,

24 आउर दस ठन सींग चो अरथ ए आय,

ए चवथा राज ले दस ठन राजामन चो उबजास होयदे,

फेर हुनमन चो ले भिने गोटोक राजा चो उबजास होयदे।

हुन आगे चो राजामन ले

तीन झन राजामन के हरायदे।

25 हुन, सबुले बड़े महापरभु चो बिरुद गोटेयाउन

हुनचो पवितर लोगमन के डाटा-टेवा करेदे।

हुनमन मानतो आगे चो तिहारमन आउर नीति-नियममन के पलटतो उआट करेदे

आउर हुनके साढ़े तीन बरक^* ^†काजे

हक देयदे।

26 मानतर नियावकरुमन चो मंडली बसदे

आउर राजा चो राजपाट के झीकदे

आउर हुनके सत्‍यानास करदे।

27 तेबे सबुले बड़े महापरभु चो पवितर लोग के

मंजपुर चो सपाय राज,

हुनमन चो हक आउर मयमा-मान देयदे;

हुनमन चो राज अमदेया काजे रयदे।

सपाय राज करतो लोग हुनमन चो हक ने होउन हुनमन चो हुकुम मानदे।”

28 दरसन चो गोट एताय सरली। मय दानिएल, आपलो मने डाहाल-बिकाल होउन खुबे डरले आउर मोचो थमना उतरली; मानतर मय, ए गोटमन के आपलो मने धरुन रले।