हकदारमन आउर मुखियामन, दानिएल के ईरका होतोर
6
दारा राजा आपलो जमाय राज चो दखा-रखा करतो काजे एक सव बीस झन हकदारमन* के बाछलो, 2 आउर हुनमन उपरे तीन झन मुखिया संगालो, जोनमन ले गोटोक दानिएल रये। ए तीन झन मुखियामन के राजा एक सव बीस झन हकदारमन ले हिसाब-किताप धरुन आपन के देतो काजे बनालो कि राजा चो काई नोकसान नी होओ। 3 जिदलदांय राजा जानलो, दानिएल खुबे नंगत ओज ले बुता करलो, आउर हुन सपाय मुखियामन ले आगर नंगत ले बुता करुक सके, तेबे राजा हुनके आपलो गुलाय राज चो बड़े मुखिया बनातो मन करलो। 4 तेबे सपाय मुखियामन आउर हकदारमन, दानिएल चो राज-सेवा चो बिरुद ने दोख डगराउक मुरियाला। मानतर राज-सेवा ने हुनचो काई कसूर नोहले दोख मिराउक नी सकला। कसनबलले हुन पतेयातो लाईक आउर हुनचो बुता दोख नोहलोर रये। 5 तेबे हुनमन बलला, “आमी दानिएल चो बिरुद ने हुनचो महापरभु चो नियम-कानुन के मानतोके छांडुन आउर काई दोख नी मिराउक सकुं।”6 तेबे सपाय मुखियामन आउर हकदारमन गोटकी सोर होउन राजा लगे गेला आउर राजा के बलला, “ए दारा राजा, तुय जुग-जुग जीव! 7 तुचो राज चो सपाय मुखियामन, हकदारमन, सलाकरुमन, मंतरीमन आउर राजपालमन गोटोक सोर होउन असन बिचार करलुसे, तुय असन चमकट हुकुम निकराव कि तीस दिन काजे कोनी बले तुके छांडुन कोनी दुसर मनुक के नोहले देव-धामी के डंडासरन करला जाले, हुनके बीजापुलिया-बागमन चो करपन ने पकाउन देओत। 8 एईकाजे तुय हुकुम निकरातो चिटी ने आपलो मोहर लगाव, जेचोले मादीमन आउर फारसीमन चो नियम-कानुन हिसाब ले ए हुकुम के कोनी पलटुक नी सकोत।” 9 तेबे दारा राजा हुकुम निकरालो चिटी ने आपलो मोहर लगालो।
दानिएल के बीजापुलिया-बागमन चो करपन ने पकातोर
10 जिदलदांय दानिएल सुनलो, हुकुम निकरालो चिटी ने राजा मोहर लगालो, तेबे हुन आपलो घरे गेलो। हुनचो घर उपर चो खोली थानो खिड़की जरूसलेम बाटे उगाड़ा रते रये आउर जसन दानिएल रोजे दिने तीन हार मांडिखुटा देउन आपलो महापरभु के गुहारते आउर धन-धन करते रये उसने ची हुनी दिने बले गुहारुक मुरियालो। 11 तेबे मुखियामन आउर हकदारमन एउन दानिएल के आपलो महापरभु के गाग-गगरीही होउन साहरा काजे गुहारतोके दखला। 12 एईकाजे हुनमन फेर राजा लगे जाउन हुनचो निकरालो हुकुम चो बारे ने बलला, “ए राजा, काय तुय असन हुकुम नी निकरालीस, तीस दिन होओतले कोनी बले तुके छांडुन कोनी दुसर मनुक के नोहले देव-धामी के डंडासरन करले, हुनके बीजापुलिया-बागमन चो करपन ने पकादे?” राजा हुनमन के बललो, “हव, मादीमन आउर फारसीमन चो नियम-कानुन हिसाब ले ए हुकुम चमकट आसे।” 13 तेबे हुनमन राजा के बलला, “ए राजा, जहूदी कयदीमन ले दानिएल तो तुके आउर तुचो मोहर लगालो चिटी के मुरे नी माने। रोजे दिने हुन, तीन हार आपलो महापरभु ले गुहारते रउआय।”
14 ए गोट के सुनुन राजा खुबे मुरमुरा होलो। दानिएल के बचातो बिचार करुन सांज होओतले उआटते रये कि एके कसन बचायंदे। 15 तेबे मुखियामन आउर हकदारमन राजा लगे एउन बलला, “ए राजा, ए गोट के पक्का सूरता कर, मादीमन आउर फारसीमन चो नियम-कानुन हिसाब ले राजा चो ए हुकुम के कोनी पलटुक नी सकोत।”
16 राजा हुकुम दिलोके दानिएल के आनला आउर बीजापुलिया-बागमन चो करपन ने पकाउन दिला। हुदलदांय राजा, दानिएल के बललो, “तुय जोन महापरभु के सत-मन ले सेवा करुआस, हुनी तुचो रखेया करो!” 17 आउर हुनमन गोटोक बड़े पकना आनुन करपन के ढाकुन दिला। तेबे राजा हुन थाने आपलो आउर आपलो मुखियामन चो मोहरमन लगाउन दिलो, जेचोले दानिएल चो बारे ने निकरालो हुकुम के पलटुक नी सकोत। 18 तेबे राजा आपलो माहाल ने गेलो आउर राती बेरा काई नी खादलो; आपलो काजे हरिक-उदीम चो काई तीजमन आनुक नी दिलो आउर राती हुनके झूमा बले नी ईली।
दानिएल बीजापुलिया-बागमन चो टोंड ले बाचतोर
19 बियान पावते खन राजा उठलो आउर झटके बीजापुलिया-बागमन चो करपन लगे गेलो। 20 करपन लगे अमरुन राजा कलप-डाहा होउन चिचियालो, “ए दानिएल, जीवत महापरभु चो कमेया, काय जोन महापरभु के तुय सत-मन ले सेवा करुआस, हुन तुके बीजापुलिया-बागमन ले बचालो?” 21 तेबे दानिएल करपन भीतर ले राजा के बललो, “ए राजा, तुय जुग-जुग जीव! 22 मोचो महापरभु आपलो सरगदूतमन के पठाउन बीजापुलिया-बागमन चो टोंड के मुंदलो कि बीजापुलिया-बागमन मोके काई नोकसान करुक नी सकला। कसनबलले मय महापरभु पुरे दोख नोहलोर रले; आउर तुचो बिरुद बले काई कसूर नी करले।” 23 तेबे राजा खुबे हरिक होउन दानिएल के बीजापुलिया-बागमन चो करपन ले निकरातो हुकुम दिलो। एईकाजे दानिएल के करपन ले बाहरे निकराला। हुनचो देहें ने बाग लापड़लो चीना नी रये। कसनबलले हुन आपलो महापरभु उपरे भोरसा करते रये। 24 तेबे राजा, दानिएल के दोख लगालो लोगमन के, हुनमन चो बायले-पिलामन संगे आनुन बीजापुलिया-बागमन चो करपन ने पकातो हुकुम दिलो। हुनमन करपन चो पेंदी लगे अमरुन बले नी रओत, बीजापुलिया-बागमन हुनमन चो उपरे पड़ुन, चीरी-चपट करुन खादला।
25 तेबे दारा राजा गुलाय राज ने रतो जात-जात आउर भिने-भिने भासा-बोली बलतो लोग काजे असन चिटी लिखुन पठालो, “तुमी खुबे अस्तिर ने राहा! 26 मय असन हुकुम देयंसे, जोन-जोन थाने मय राज करेंसे, हुता चो सपाय लोग दानिएल चो महापरभु के डर संगे इजित-मान करा:
कसनबलले हुन जीवत
आउर जुग-जुग रउ महापरभु आय।
हुनचो राज अमदेया रयदे
आउर हुनचो राजपाट जुग-जुग रउआय।
27 हुनी छंडाउआय आउर बचाउआय बले,
हुनी सरग आउर मंजपुर ने अचरित आउर महासंदे चो बुतामन करुआय।
हुनी महापरभु, दानिएल के
बीजापुलिया-बागमन ले बचालोसे।”
28 असन बरन ले, दारा राजा आउर कुसरु नाव चो फारस राजा चो राजपाट बेरा दानिएल चो खुबे मान बाड़ली।