दानिएल, मेंडा आउर बोकड़ा चो दरसन दखतोर
8
बेलसेसर राजा चो तीसर बरक चो राजपाट बेरा, मय दानिएल, गोटोक दुसर दरसन दखले। 2 मोचो दखलो दरसन ने, मय एलाम नाव चो परघन ने सूसन राज भाड़ा ने रयें आउर मय ऊले नंदी खंडे उबा रयें। 3 आउर मय दखले, नंदी खंडे दुय ठन सींग बिती मेंडा उबुन रये। मेंडा चो दुनो सींग लाम-लाम रये। मानतर गोटोक सींग आगर लाम रये आउर आगर लाम बिती सींग, दुसर सींग ले पाछे निकरुन रये। 4 फेर मय हुन मेंडा के, बेर-बुड़ती बाटे, बेर-उदिया डेबरी बाटे आउर बेर-उदिया उजा बाटे ढुसमतोके दखले। हुनचो लगे कोनी जनावरमन नी अधड़ते रओत, आउर हुनचो ले कोनी बाचुक बले नी सकते रओत; हुन आपलो मने ईलो असन करते रये आउर हुनचो बल खुबे बाड़ते रये।5 मय दखते ची रयें, तेबे गोटोक बोकड़ा, बेर-बुड़ती बाटले निकरुन गुलाय मंजपुर ने डगाते रये, हुनचो पांयमन भुंये नी टेकते रये। हुन बोकड़ा चो दुनो आंईक मंजारे गोटोक सींग रये। 6 हुन बोकड़ा, नंदी खंडे मय दखलो दुयठन सींग बिती मेंडा के दखुन समपुरन बल ले हुनचो उपरे ईलो। 7 मय दखले हुन, मेंडा लगे खुबे रीस ले जाउन हुनके ढुसमुन हुनचो दुनो सींगमन के टुटाउन दिलो आउर भुंये घसराउन हुनके रमंदलो। हुन बोकड़ा ले लड़तो काजे मेंडा लगे बल नी रली आउर बोकड़ा चो बल ले मेंडा के कोनी बले बचाउक नी सकला। 8 तेबे बोकड़ा चो बल खुबे बाड़ली। हुनचो बल भरपुर होलोदांय हुनचो बड़े सींग टुटली। हुनचो पलटा चार ठन बरसक सींगमन निकरुन बादरी चो चारोकुती बाड़ुक मुरियाली।
9 एचो पाछे, हुन चार ठन सींगमन ले गोटोक ले नानी असन गोटोक नवा सींग निकरली, आउर हुनचो बल बेर-उदिया उजा बाटे आउर बेर-उदिया बाटे आउर मयमा-मान देस् इसराएल बाटे खुबे बाड़ली। 10 हुन सींग, बादरी चो सेना के टेकतले* बाड़ली आउर आदा-एक तारामन के भुंये घसराउन रमंदली। 11 आउर हुन खुबे बाड़ुन आपने के सरग चो मुखिया* ले बले आगर बलबीता मानली। हुन, रोजे चेगातो होम-जतरा के अटकाली आउर पवितर ठान के असुद* करली। 12 हुनचो उबढंगरी बुता किरता रोजे चेगातो होम-जतरा संगे बादरी चो सेना के बले हुनचो हक ने करुन दिला। हुन सींग, महापरभु चो सत-सिखिया के माटी ने मिसाउन दिली आउर आपलो उबागरी ने बाड़ते गेली। 13 तेबे मय गोटोक पवितर झन गोटेयातोके सुनले, दुसर गोटोक पवितर झन, पईल गोटेयालो पवितर झन के पूछलो, “रोजे चेगातो होम-जतरा के अटकातो चो बारे ने दखलो दरसन केबतले रयदे? पवितर ठान आउर बादरी चो सेना के केबतले रमंदते रदे?” 14 तेबे पईल पवितर झन सांगलो, “दुय हजार तीन सव सांज आउर मंजन होओतले ए ओधरम बुता होते रयदे। हुनचो पाछे पवितर ठान के सुद करेदे।”
जिबराएल सरगदूत, दानिएल के दरसन चो अरथ सांगतोर
15 ए दरसन के दखुन मय दानिएल, एचो अरथ समजतो काजे होते रयें। तेबे मनुक चो रूप ने, कोनी मोचो लगे ईलो। 16 तेबे मय ऊले नंदी खंड ले कोनी मनुक चो राग असन चिचियाउन बलतोके सुनले, “ए जिबराएल, ए मनुक के हुनचो दखलो दरसन चो अरथ समजाव।” 17 तेबे मोचो उबलो लगे जिबराएल सरगदूत ईलो। हुनचो ईलोके मय खुबे डरले आउर पाटा पड़ुन डंडासरन करले। मानतर हुन मोके बललो, “ए मनुक, तुचो दखलो दरसन चो अरथ के समज, कसनबलले हुन सरासरीदांय पुरा होयदे।”
18 जिदलदांय जिबराएल मोके गोटेयाते रये, हुदलदांय मय चेत नोहलो होउन पाटा पड़ुन रयें, तेबे जिबराएल मोके छिंवलो आउर मय उबा होले। 19 आउर हुन बललो, “दख, सरासरी समया ने महापरभु आपलो जंजाल रीस दखायदे, तेबे होतो घटनामन चो बारे ने मय तुके सांगेंदे। कसनबलले ए घटनामन सरासरी दिनमन चो कबूल धरालो समया ने पुरा होयदे। 20 जोन दुय ठन सींग बीता मेंडा के तुय दखलीस, हुन दुय ठन सींगमन चो अरथ, मादी आउर फारसी राजामन आत। 21 आउर हुन बोकड़ा, जूनान चो राज आय आउर हुनचो दुनो आंईक मंजार चो बड़े सींग जूनान चो पईल राजा आय। 22 हुन सींग टुटतोके हुनचो पलटा निकरलो चारठन सींगमन चो अरथ, जूनानी राज ले उबजतो चार ठन राजमन आत। मानतर हुन चारो राजमन जुनानी राज असन बरसक नी रदे।
23 ए चारो राजामन राज करतो चो सरासरीदांय
जेबे हुनमन चो पाप चो हांडी भोरेदे,
तेबे गोटोक दुसट आउर चलाक
राजा चो उबजास होयदे।
24 हुन राजा चमकट रयदे मानतर आपलो सकत ले नाई,
हुन खुबे उदम-मताउन लोगमन के नास करेदे
आउर हुनचो करतो सपाय बुता पुरा होयदे। तेबे हुन बलेयार मुखियामन आउर महापरभु चो पवितर लोगमन के बले नास करेदे।
25 हुनचो चलाक बुद किरता
हुनचो उबागरी बुता खुबे बाड़ेदे।
हुन आपलो मने गुमान करुन
उधापड़े लोगमन के नास करेदे
आउर राजामन चो राजा, महापरभु चो बले बिरुद करेदे।
सरासरी ने, कोनी काई नी करलोर आपने नास होयदे।
26 तुय सांज आउर बियान चो बारे ने दखलो दरसन सते आय। मानतर तुय हुन दरसन के लुकाब ने संगाव, कसनबलले ए घटनामन खुबे बरक पाछे पुरा होयदे।”
27 ए दरसन दखलो पाछे, मय दानिएल निमल होउन खुबे दिनतले बेमार पड़ुन रयें। पाछे मय चेकरुन राजा चो बुता-भयना करुक मुरियाले। मानतर मोचो दखलो दरसन किरता मय बाय-बिकाल होले। कसनबलले मय हुन दरसन चो अरथ नंगत ले नी समजले।