दानिएल आपलो लोगमन काजे गुहारतोर
9
मादी जात चो छयरस राजा चो बेटा दारा, बेबीलोन चो राजा बनलो। 2 हुनचो राजपाट चो पईल बरक ने, मय दानिएल धियान ले गोटोक सास्तर पढ़ते रयें। जहोवा, जिरमियाह अगमजानी के सांगलो हिसाब ले जरूसलेम सतर बरक ले उजड़लो गती ने रयदे।3 तेबे मय उपास रउन पोता ओड़ुन लाकड़ी ने बसले आउर करलाउन जहोवा महापरभु के हुनचो दया काजे पारथना करुक आउर गुहारुक मुरियाले। 4 मय, आपलो पापमन के मानुन मोचो जहोवा महापरभु के असन सांगले:
“ए परभु, तुय सबुले बड़े आउर मयमा-मान महापरभु आस। जोन तुके मया करुन तुचो हुकुममन के मानुआत, तुय हुनमन संगे करलो बायदा के पुरा करुन सत-मया दखाउआस। 5 आमी अडरा बुता करुन तुचो बिरुद पाप करलुसे, उबढंगरी बुता करुन एड़जा होलुसे, तुचो हुकुममन आउर नियममन के नी मानलु। 6 तुचो कमेया अगमजानीमन, तुचो नाव ले आमचो राजामन, राजपालमन, पुरखामन आउर इसराएल चो सपाय लोगमन के सांगते रला। मानतर आमी हुनमन चो गोट के नी पतेयालु।
7 ए परभु, तुय धरमी आस। मानतर आजी आमी लाज पड़लुसे। कसनबलले आमी तुचो बिरुद निमकधुसा करलु आउर तुय, जहूदा ने रतो आमी सपाय के, जरूसलेम ने रतो सपाय लोग के, आउर लगे नोहले लापी रतो सपाय इसराएलिमन के, गुलाय देसमन ने जत-खत करलीस। 8 ए जहोवा, तुचो बिरुद पाप करलो किरता आमी, आमचो राजामन, आमचो राजपालमन, आउर आमचो पुरखापाटीमन बले लाज पड़लुसे। 9 आमचो जहोवा महापरभु जीव-दुखु आउर खेमा करु आय, फेर बले आमी हुनचो बिरुद एड़जा होलु, 10 आउर आमचो जहोवा महापरभु, आपलो कमेया अगमजानीमन बाटले आमके सुनालो नियम-कानुनमन के नी मानलु।
11 सपाय इसराएलिमन तुचो नियम-कानुन के नी मानुन आपलो मने ईलो असन करला आउर तुचो गोट नी धरला। एईकाजे महापरभु चो कमेया मोसा चो नियम-कानुन चो किताप ने लिखलोर सराप आउर किरिया आमचो उपरे पड़ली। कसनबलले आमी तुचो बिरुद पाप करलु। 12 महापरभु, आमचो आउर आमचो राजामन चो बिरुद बललो गोटमन के आमचो उपरे बिपती पाड़ुन पुरा करलो। असन बरन ले जितरो बिपती जरूसलेम उपरे पड़ली, उतरो बिपती मंजपुर ने कहांय बले नी पड़ली। 13 जसन मोसा चो नियम-कानुन ने लिखलोर आसे, उसनेचे सपाय बिपतीमन आमचो उपरे पड़ली। तेबले बले आमी आमचो महापरभु जहोवा के हरिक करतो मन नी करलु आउर हुनचो सत के बले नी पतेयालु आउर आपलो ओधरम बुतामन के बले नी छांडलु। 14 एईकाजे जहोवा ए सपाय बिपतीमन आमचो उपरे पाड़लो। कसनबलले आमचो जहोवा महापरभु आपलो करलो सपाय बुतामन ने धरमकारी आय। मानतर आमी हुनचो गोट के नी मानलु।
15 एदांय ए आमचो परभु महापरभु, तुय आपलो सकत ले आपलो रयत के मिसर देस् ले छंडाउन आनलीस। एचोले तुचो नाव चो मयमा-मान होली जोन आजी ले आसे। मानतर आमी उबढंगरी बुता करुन पाप करलुसे। 16 ए परभु, तुय आपलो धरम बुता किरता तुचो जंजाल रीस के तुचो पवितर डोंगरी बललोने, जरूसलेम सहर उपर ले गुचाव। आमचो पाप आउर आमचो पुरखापाटी चो ओधरम बुता किरता आमचो घर-लग चो लोग पुरे, तुचो रयत आउर जरूसलेम चो इजित बुड़लीसे। 17 “एदांय ए आमचो महापरभु, आपलो कमेया चो पारथना आउर गुहार के सुन। ए परभु, तुचो नाव किरता, तुचो थमना चो उजर आपलो भोसड़लो पवितर ठान उपरे बराव। 18 ए मोचो महापरभु, कान डेरुन सुन, तुचो आईक ले आमचो नानागती के आउर तुचो नाव ने बलाय होतो जरूसलेम सहर के दख। कसनबलले आमी आमचो धरम बुता हिसाब ले नाई, मानतर तुचो बड़े दया उपरे भोरसा करुन तुचोले गुहारुंसे। 19 ए परभु सुन; ए परभु खेमा कर; ए परभु, आमचो गुहार सुनुन उत्तर देस, आपलेई मयमा काजे बेर नी कर! ए मोचो महापरभु, तुचो नाव किरता असन कर। कसनबलले तुचो सहर आउर तुचो रयत तुचेई नाव ले बलाय होयसोत!”
जिबराएल, अगमगोट चो अरथ समजातोर
20 जेबे मय असन बलते पारथना करले आउर मय मोचो पाप आउर मोचो इसराएली भाई-बंदमन चो पाप के मानले आउर आपलो जहोवा महापरभु पुरे हुनचो पवितर डोंगरी काजे गुहारते रयें। 21 मय पारथना करते ची रये तेबे जिबराएल सरगदूत मोचो लगे झटके उतरुन ईलो। ए हुनी सरगदूत आय जेके मय मोचो पईल दरसन ने दखु रयें। हुदलदांय सांज चो जतरा बेरा होउन रये। 22 हुन एउन मोके बललो, “ए दानिएल, मय तुके गियान आउर समज देउक ईलेसे। 23 जिदलदांय तुय गुहारुन पारथना करते रयीस, हुदलीदांय महापरभु हुकुम दिलो आउर मय तुके सांगुक ईलेसे, महापरभु तुके खुबे मया करुआय। एईकाजे मोचो गोट के सुन आउर दरसन चो अरथ के समज:
24 तुचो लोग आउर तुचो पवितर सहर काजे सतर हपता* चो समया† दिलोर आसे। ए समया सरु-सरु सपाय बरन चो ओधरम बुता मेटाओत, आउर पाप के छांडोत आउर सपाय ओधरम-पाप चो खंडान काजे खेमा मांगोत। जुग-जुग चो धारनिक परगट होओ। दरसन आउर अगमजानी चो गोट के मोहर लगाओत आउर सबु ले पवितर के अबिसेक करोत। 25 एदांय तुय एके जान! आउर एके समज! जरूसलेम के जतनातो आउर हुता इसराएलिमन के बसापत करातो काजे हुकुम निकरालो समया ले धरुन महापरभु अबिसेक करलो पवितर राजा* एओतले सात हपता होयदे। एचो पाछे, तीन कोड़ी दुय हपता ले बिपती पड़ेदे। एई बिपती चो समया ने ची जरूसलेम सहर के जतनाउन बाटमन आउर हुनचो भोंवरक नाहार-खोदरामन बनादे। 26 तीन कोड़ी दुय हपता पुरलो पाछे, महापरभु अबिसेक करलो पवितर राजा के मोरते मारदे आउर हुनके काई कसूर नोहलो फोकाहा ने मारदे, पाछे एतो दुसर राजा चो सेना, जरूसलेम सहर के आउर पवितर मंदिर के सत्यानास करदे। हुनचो सरासरी पुर-पानी* असन होयदे आउर सपाय सत्यानास होओतले जुद होते ची रयदे। कसनबलले हुन सहर चो उजड़तोर पक्का आय। 27 हुन राजा गोटोक हपता* काजे खुबे लोग संगे बायदा करेदे। मानतर हपता चो आदो दिन ने, जतरा आउर चेगावामन के अटकायदे। तेबे मंदिर उपरे गोटोक असुद घिन-घिना आउर उजड़ातो तीज (मूरत) दखा देयदे। जिदलदांय ले महापरभु हुन असुद घिन-घिना आउर उजड़ातो तीज के सत्यानास नी करेदे हुदलदांय ले हुन, हुताय ची रयदे।”