नंदी खंडे रलोदांय दानिएल के मिरलो दरसन
10
फारस देस् चो कुसरू राजा चो राजपाट चो तीसर बरक ने दानिएल, जेके बेलतससर बले बलुआत, महापरभु बाटले गोटोक खबर मिरली। ए खबर सते रये, आउर खुबे बड़े जुद होतो खबर रये। दानिएल के ए खबर समजतो काजे खुबे झंझट लागली, पाछे गोटोक दरसन बाटले हुन खबर के सरसरा समजलो।2 हुन दिनमन ने, मय दानिएल तीन हपता ले गाग-गगरीही होते रले। 3 ए तीन हपता पुरतले मय मास-भात नोहले अंगुर-रस नी खादले आउर मोचो देहें ने तेल बले नी घसे। 4 फेर पईल मयना चो एक कोड़ी चवथा दिने मय, हिदेकेल* महानंदी खंडे उबा रयें 5 तेबे मय दखले, गोटोक मनुक मकमल फटई पींदुन उफाज देस् चो निरवा सोन चो पट्टा करांडे बांधुन मोचो पुरे उबलोसे। 6 हुनचो देहें झकमकतो हीरा-पकना* असन रये, हुनचो थमना पानी जागतो उजर असन रये। हुनचो आंईकमन बरतो मसाल असन रये। हुनचो हाथ-पांय झकमकतो पीतल असन रये, आउर हुनचो राग बड़े भीड़ चो गरजन असन रये। 7 मय, दानिएल एकलाय ए दरसन के दखले; मोचो संगे रलो लोग काई नी दखला। फेर बले हुनमन के डर चेपाली गुने पराउन लुकला। 8 एईकाजे मय एकलाय रउन हुन अचरित दरसन के दखते ची रयें। मोचो भीतरे सकत नी रली, तेबे मय खुबे डरुन मुछियाले आउर मोरलो असन होले। 9 तेबे मय हुन मनुक चो गोट के सुनले; आउर सुनते खन मय चेत नोहलो पाटा पड़ुन भुंये घसरले।
10 मानतर कोनी मोके छिंवलो आउर मोचो हाथ के धरुन उठालो आउर मय मांडिखुटा देउन उठले। 11 हुन मोके बललो, “ए दानिएल, महापरभु चो भावतो मनुक, जोन गोटमन मय तुके सांगेंदे हुनके धियान ले सुन। तुय उबा हो, कसनबलले मोके तुचो लगे पठालोसे।” हुन असन बलतोके मय उबा होले, मानतर थरथरते रयें। 12 फेर हुन मोके बललो, “ए दानिएल, नी डर। कसनबलले पईल दिने ची जिदलदांय तुय समज-गियान पाउक मन करलीस आउर महापरभु पुरे आपन के सोज बनालीस, हुदलीदांय हुन, तुचो पारथना सुनलो आउर तुचो पारथना किरता ची मय ईलेसे। 13 मानतर फारस राज चो मुखिया* मोके एक कोड़ी एक दिन होओतले छेकुन रलो। एईकाजे जहोवा चो सेना-मुखिया मीकाएल सरगदूत मोके साका होउक ईलो। आउर मय हुनके फारस राज चो मुखिया संगे छांडुन ईले, 14 आउर एदांय सरासरी दिनमन ने तुचो लोग संगे काय-काय घटेदे एचो बारे ने तुके समजाउक ईलेसे आउर घटतो गोटमन चो बारे ने जोन दरसन तुय दखलीस, हुन एतो समया ने पुरा होयदे।”
15 जिदलदांय हुन मोके गोटेयाते रये, हुदलदांय मय खाले मुंडी करुन ओगाय रले। 16 तेबे मनुक चो असन कोनी, मोचो टोंड के छिंवलो आउर मय गोटेयाउक मुरियाले, आउर मोचो पुरे उबुन रलो मनुक के बलले, “ए मोचो परभु, दरसन दखलोके मोचो देहें-पांय बसुन गेली आउर मय निमल होले। 17 ए परभु, तुचो कमेया तुचो संगे कसन ने गोटेयायदे? कसनबलले मय थरथरेंसे, मोचो हाथ-पांय बसुन गेली आउर मोके फुंडा धरली।”
18 तेबे कोनी, मनुक असन मोके छिंवलो आउर मोके तीरतिरा लागली। 19 हुन मोके बललो, “ए महापरभु चो भावतो मनुक, नी डर। तुके अस्तिर मिरो, तुय चमकट हो, आउर ढाढ़ुस कर!” जिदलदांय हुन असन बललो, तेबे मय तीरतिरा होउन बलले, “ए परभु, एदांय सांग, कसनबलले तुय मोके सकत दिलीस।” 20 तेबे हुन बललो, “काय तुय जानीस, मय तुचो लगे काय काजे ईलेसे? मोके बोहड़ुन फारस राज चो मुखिया संगे लड़ुक जातोर आय। जिदलदांय मय हुनके जीतेंदे हुदलीदांय जूनान राज चो मुखिया एता एयदे। 21 मानतर सत चो किताप ने जोन गोट लिखलोर आसे, हुनमन के मय तुके सांगेंसे। फारस राज चो मुखिया चो बिरुद लड़तो काजे जहोवा चो सेना-मुखिया मीकाईल सरगदूत के छांडुन आउर कोनी मोचो साहरा नी करोत।”