11
मय जिबराएल, हुनके सरन देउन सकत देतो काजे मादी दारा राजा चो राजपाट चो पईल बरक ने हुनचो संगे रले।बेर-उदिया उजा आउर बेर-उदिया डेबरी बाट चो राजामन
2 “सुन, एदांय मय तुके सत गोट सांगेंसे, फारस राज ने तीन आउर राजामन राज करदे। फेर चवथा राजा, राज करेदे, हुनके तीनो राजामन ले आगर धन-माल रयदे आउर हुन, धन-माल चो सकत किरता लोगमन के जूनान राज चो बिरुद ने उकसायदे। 3 एचो पाछे, आउर गोटोक बलेयार राजा एउन आपलो बल ले राज करेदे आउर आपलो मन-इछा असन करेदे। 4 जिदलदांय हुनचो बल बाड़ते जायदे, तेबे हुनचो राज भाग-भाग होयदे आउर मंजपुर चो चारोकुती बिगरेदे। मानतर हुनचो राज ने आगे चो असन बल नी रयदे आउर राजा चो थरलर के बले राज करतो हक नी मिरे। कसनबलले हुनचो राज के झीकुन दुसर लोग के देदे।
5 तेबे बेर-उदिया उजा बाट* चो राजा खुबे सकत बीता होयदे, मानतर हुनचो गोटोक सेना-मुखिया हुनचोले बले आगर बलेयार होउन गोटोक नवा राज बनाउन हुता चो राजा होयदे। असन बरन ले हुनचो राज खुबे बाड़ती होयदे। 6 खुबे बरक पाछे, बेर-उदिया उजा बाट चो राजा आपलो बेटी के, बेर-उदिया डेबरी बाट चो राजा संगे बिया कराउन अस्तिर चो बायदा करेदे। असने हुन दुनो बाट चो राजामन मिला-मिसा होदे। मानतर हुनचो बेटी चो सकत आउर हुनचो थरलर बले बुड़ेदे। हुनचो बेटी के, बेटी चो कमेया-कमेयीन के, हुनचो नाती के आउर हुनचो बेटी-जुआंय जोन हुनचो साहरा होउआय, हुन सपाय के बले मोरते मारदे।
7 हुनी समया ने, हुनचो बेटी चो कुटुम थानो गोटोक मनुक हुनचो पलटा राज करेदे। हुन आपलो सेना संगे बेर-उदिया डेबरी बाट चो राजा* चो भाड़ा भीतरे एउन पड़ेदे आउर लड़ई करुन जीतेदे। 8 हुन, हुनमन चो देव-धामीमन चो घड़लो मूरतमन के आउर सोन-रूप चो थारा-बटकामन के झीका-उड़मा करुन आपलो मिसर देस् ने नेयदे आउर खुबे बरक ले बेर-उदिया डेबरी बाट चो राजा संगे लड़ई नी करेदे। 9 तेबे बेर-उदिया डेबरी बाट चो राजा, बेर-उदिया उजा बाट चो राजा संगे लड़ुक एयदे, मानतर आपलो देस् ने बोहड़ुन जायदे।
10 बेर-उदिया डेबरी बाट चो राजा चो बेटामन फेर लड़ई करतो काजे खुबे सेना के जुहादे आउर पुर-पानी ईलो असन बेर-उदिया उजा बाट चो राजा संगे लड़ई करुक एदे आउर लड़ई करते-करते बेर-उदिया उजा बाट चो राजा चो भाड़ा लगे अमरदे। 11 तेबे बेर-उदिया उजा बाट चो राजा जंजाल रीस होउन बेर-उदिया डेबरी बाट चो राजा संगे जुद करेदे। बेर-उदिया डेबरी बाट चो राजा खुबे बड़े सेना रूंडाउन लड़ेदे। मानतर हुनमन, बेर-उदिया उजा बाट चो राजा चो हक ने होदे। 12 बेर-उदिया उजा बाट चो राजा हुन सेना के हराउन खुबे गुमान करेदे, हुन खुबे लाखो-कोटी लोग के मोरते मारेदे। मानतर हुनमन चो देस् के खिंडिक समया काजे ची आपलो हक ने संगाउक सकेदे। 13 कसनबलले बेर-उदिया डेबरी बाट चो राजा आगे आनलो सेना ले बले आगर बड़े सेना के जुआउन आउर खुबे हतियारमन के धरुन फेर लड़ई करुक एयदे।
14 हुन समया ने, खुबे लोग बेर-उदिया उजा बाट चो राजा चो बिरुद होदे आउर तुचो इसराएली निज लोग ले उबढंगरी लोग बले दरसन पुरा होतो काजे हुनचो पाटेया होदे। मानतर हुन उबढंगरी लोगमन नी जीतदे। 15 तेबे बेर-उदिया डेबरी बाट चो राजा एउन चमकट सहर के भोंवरक बेड़ुन हुनके आपलो हक ने करेदे, बेर-उदिया उजा बाट चो राज चो सबुले बरसक सेना बले हुनके लड़ुक नी सकदे। कसनबलले हुनचो बीरमन लगे लड़तो बल नी रयदे। 16 फेर बेर-उदिया डेबरी बाट चो राजा आपलो मन-इछा असन हुनचो बिरुद होतो सपाय के नास करेदे। आपलो खुबे बरसक सेना संगे मयमा-मान राज* के बले आपलो हक ने करेदे आउर हुनके कोनी लड़ुक नी सकदे। 17 तेबे हुन आपलो राज चो सपाय बरसक सेना के रूंडायदे। हुन, बेर-उदिया उजा बाट चो राज के आपलो हक ने करतो काजे, बेर-उदिया उजा बाट चो राजा के, बेर-उदिया डेबरी बाट चो राज चो गोटोक बायले संगे बिया करुन देयदे आउर हुनचो संगे मिला-मिसा करेदे। मानतर हुन बायले के बिया करुन दिलोर काई काम नी पड़ेदे आउर बेर-उदिया डेबरी बाट चो राजा चो मन-इछा बले पुरा नी होयदे। 18 एईकाजे हुन समदूर कटा चो जात-जात चो लोगमन के आपलो हक ने करेदे। मानतर गोटोक सेना-मुखिया हुनचो गुमान के टुटाउन हुनचोले पलटा धरेदे। 19 बेर-उदिया डेबरी बाट चो राजा आपलो भाड़ा बिती देस् ने बोहड़ुन जातोदांय हुनके मोरते मारदे आउर हुनचो काई चीना-बाना बले नी मिरेदे।”
बेर-उदिया डेबरी बाट चो दुसट राजा
20 तेबे बेर-उदिया डेबरी बाट चो राजा चो पलटा कोनी दुसर राजा चो उबजास होयदे हुन, मयमा-मान राज मंजी पट्टी उसील करतो काजे गोटोक मुखिया के पठायदे। मानतर खिंडिक समया पाछे हुन राजा उपड़ता मोरेदे, जुद नोहले कोनी नी मारलोर आपने नास होयदे। 21 बेर-उदिया डेबरी बाट चो राजा चो पलटा गोटोक दुसट मनुक राज करेदे, जोन राजा चो कुटुम चो नी रयदे। हुन आपलो चलाक बुद ले उधापड़े एउन राज के आपलो हक ने करेदे। 22 हुनचो सकत ले, सेनामन आउर महापरभु बायदा करलो पवितर राजा†* बले नास होयदे। 23 आउर जोन-जोन राज हुनचो संगे मिला-मिसा होदे, हुनमन के हुन धोका देयदे आउर खिंडिक असन लोग रले बले हुनचो सकत बाड़ते जायदे। 24 हुन दुसट राजा, धन-माल ले भरपुर भाड़ा बिती सहरमन उपरे उधापड़े एउन पड़ेदे आउर हुनचो पुरखापाटीमन केबई नी करलो बुतामन करेदे। हुन झीका-उड़मा करलो धन-माल के आपलो संगे चो लोग के बाटुन देयदे। हुन, चमकट राजमन के आपलो हक ने करतो उआट करेदे। मानतर खिंडिक समया काजे ची असन करुक सकेदे। 25 हुन, बेर-उदिया उजा बाट चो राजा चो बिरुद बड़े सेना जुहाउन एयदे। तेबे बेर-उदिया उजा बाट चो राजा बले हुनचोले आगर बड़े आउर बरसक सेना संगे लड़ेदे। मानतर हुनचो बिरुद अडरा उआटमन करलो किरता बेर-उदिया उजा बाट चो राजा हारेदे। 26 हुनचो संगे गोटकी पतरी ने खातो लोग हुनके धोका देदे। हुनचो सेना पुर-पानी असन रले बले हुनचो सेना चो खुबे पलटनमन के मोरते मारदे। 27 हुन दुनो राजामन गोटोक दुसर के धोका देतो उआट ले संगे बसुन बले गोटोक दुसर के फंद गोटेयादे। मानतर एचोले बले हुनमन के काई नफा नी होयदे आउर कबूल धरालो समया ने नास होदे ची। 28 तेबे बेर-उदिया डेबरी बाट चो राजा खुबे झीका-उड़मा करलो धन-माल के धरुन आपलो देस् बोहड़ेदे। मानतर जातो बाटे, महापरभु चो पवितर बायदा चो बिरुद करतो उआट हुनचो मने एयदे आउर हुन आपलो मन-इछा पुरा करुन आपलो देस् ने बोहड़ुन जायदे।
29 कबूल धरालो समया ने, बेर-उदिया डेबरी बाट चो राजा फेर बेर-उदिया उजा बाट चो राज ले लड़ई करुक एयदे। मानतर एदांय आगे चो असन हुनचो इछा पुरा नी होयदे। 30 कसनबलले कित्तीमन पानी-जाहाज ने एउन हुनचो बिरुद लड़दे। तेबे बेर-उदिया डेबरी बाट चो राजा डर काजे आपलो देस् ने बोहड़ेदे आउर महापरभु चो पवितर लोग उपरे आपलो रीस हिटायदे आउर महापरभु चो पवितर बायदा के नी मानतो लोग के आगर धियान देयदे। 31 बेर-उदिया डेबरी बाट चो राजा पठालो सेना, भाड़ा बिती पवितर मंदिर के असुद करदे आउर मंदिर ने रोजे चेगातो होम-जतरा के अटकाउन हुनचो पलटा सपाय के असुद करतो घिन-घिना मूरत के संगादे। 32 जोन लोग पाप करुन पवितर बायदा के टुटादे, हुनमन के फोबानी गोट गोटेयाउन फुसियायदे। मानतर महापरभु चो भगतमन चमकट रदे आउर हुनचो बिरुद करदे। 33 बुद-गियान रलो लोग दुसर लोग के बले समजादे, मानतर हुनमन के खांडा ने मारदे, जीव-जीव आईग ने डसादे, नोहले झीका-उड़मा करुन कयद करदे। असन बरन ले हुनमन उपरे खिंडिक समया काजे बिपती एयदे। 34 जेबे बिपती ने पड़ुन रदे, तेबे हुनमन के खिंडिक ची असन साहरा मिरेदे। हुनमन ले खुबे लोग मेलाय काजे अडरा लोगमन संगे मिसदे। 35 समज-बुद बितामन ले कोनी-कोनी के दोख-नोहलो, सुद आउर पवितर रतो काजे डाटा-टेवा सहुक पड़ेदे। सरासरीदांय ले हुनमन चो असनेचे गती रयदे। कसनबलले कबूल धरालो समया ने ची ए सपाय चो सरासरी होयदे।
36 “बेर-उदिया डेबरी बाट चो राजा आपलो मन-इछा असन करेदे आउर आपन के सपाय देव-धामीमन ले बड़े मानुन गुमान करेदे, आउर सपाय देव-धामीमन चो महापरभु के निंदरेदे। हुनचो पाप चो हांडी उचरतले हुनचो ओधरम बुतामन बाड़ते रयदे। कसनबलले जोन गोट पुरा होतोर पक्का आय हुन होयदे ची। 37 हुन राजा आपलो पुरखापाटी चो नोहले बायलेमन सेवा करतो देव-धामी के नी मानेदे; आउर दुसर कोनी देव-धामी के बले नी मानेदे। कसनबलले हुन आपन के सपाय ले बड़े समजेदे। 38 बेर-उदिया डेबरी बाट चो राजा आपलो भाड़ा चो देव चो सेवा करेदे जोन देव के हुनचो पुरखापाटी नी जानोत। हुन देव के सोन-रूप, मनी-पकनामन आउर माहांग जिनीसमन चेगाउन इजित-मान करेदे। 39 ए पर देव-धामीमन चो साहरा ले हुन, चमकट भाड़ा बिती सहरमन ले लड़ेदे आउर जोन हुनचो पाटेया होयदे, हुनमन के हुन इजित-मान करुन हुनमन के खुबे लोग उपरे राज करतो हक देयदे आउर आपलो राज चो भुंय-बाड़ी के इनाम ने बाटुन देयदे।”
सरासरी समया
40 “सरासरीदांय मिसर चो राजा, हुन राजा संगे लड़ई करेदे। मानतर सीरिया चो राजा आपलो रथमन, घोड़ा-सुवारमन आउर जाहाजमन संगे लेहरा-धुका असन लड़ई करुक एयदे। असन बरन ले हुन खुबे देसमन के पुर-पानी असन लड़ते जायदे। 41 सीरिया चो राजा खुबे देसमन के रन-बन करते-करते मयमा-मान राज ने एयदे आउर दसक हजार लोगमन के मारेदे। मानतर एदोमी आउर मोआबी देसमन आउर अमोनी देस चो खास भाग हुनचोले बाचदे। 42 हुन खुबे दुसर देसमन ले बले लड़ेदे आउर मिसर देस् बले हुनचोले नी बाचेदे। 43 हुन, मिसर चो सोन-रूप रलो भंडारमन आउर सपाय मन-भावतो महांग तीजमन के आपलो हक ने करेदे; लूबी आउर कूसीमन बले हुनचो हक ने होदे। 44 तेबे हुन, बेर-उदिया आउर बेर-उदिया डेबरी बाट चो खबर सुनुन डरेदे आउर जंजाल रीस होउन खुबे लोग के सत्यानास करुक निकरेदे। 45 आउर हुन आपलो तमु-भाटा के समदूरमन चो आउर मयमा-मान पवितर बड़े-डोंगरी मंजारे उबायदे। एचो पाछे बले हुनके साहरा करतो काजे कोनी नी रदे, आउर बेर-उदिया डेबरी बाट चो राजा मोरुन जायदे।”