बरनबास आउर साउल के पठातोर
13
अंताकिया चो सतपतेयालो लोगमन चो मंडली ने जिदलदांय अगमजानीमन, धरम गुरुमन, बरनबास, सिमोन जोन करेया (निगर) बलाय होयसे, लूकियुस कुरेनेया, राजा हेरोद चो पोसवा भाई मनाहेम आउर साउल
2 उपास संगे परभु चो पारथना करते रला, तेबे पवितर आत्मा बललो, “बरनबास आउर साउल के, जोन सेवा काजे मय बाछलेसे, हुन सेवा काजे हुनमन के अलगाहा।”
3 एईकाजे हुनमन उपास आउर पारथना करलो पाछे बरनबास आउर साउल चो उपरे हाथ संगाला आउर हुनमन के बिदा करुन दिला।
साइपरस ढिपका ने
4 एईकाजे साउल आउर बरनबास पवितर आत्मा पठालोके सिलुकिया ने गेला; आउर हुताले पानी जाहाज ने चेगुन साइपरस नाव चो ढिपका ने गेला।
5 जिदलदांय हुनमन सलमीस ने अमरला, हुता महापरभु चो गोट जहूदीमन चो मंडली-घरमन ने सुनाला, आउर जूहन्ना हुनमन चो सेवा-सुस्तारा करतो बीता रलो।
6 हुनमन गुलाय ढिपका बुलते-बुलते पाफुस ने अमरला। हुता हुनमन, बार-जीसु नाव चो गोटोक जहूदी पंगनाहा आउर फंदी अगमजानी के भेट होला।
7 हुन राजपाल सिरगियूस पउलुस संगे रते रलो। सिरगियूस गोटोक अकल बीता मनुक रलो। हुन, बरनबास आउर साउल के हागदेउन भाति हुनमन ले महापरभु चो बचन सुनुक मन करलो।
8 मानतर बारजीसु (जूनानी बोली ने, इलीमास) पंगनाहा, बरनबास आउर साउल चो बिरुद करलो आउर राजपाल सिरगियूस के सतपतेयातो ले ठेबाउक खोजलो। बारजीसु पंगनाहा मंजिगता पड़ुन भाति राजपाल सिरगियूस के बिनालो कि बरनबास आउर साउल चो गोट के नी धर।
9 तेबे साउल जेचो नाव पउलुस बले आय, पवितर आत्मा ले भरपुर होउन हुनचो बाटे गरेया-गरेया दखुन बललो,
10 “सयतान चो बेटा, तुय धरम चो बयरी आस, तुय सपाय बरन चो कपट आउर फंद गोटमन ले भोरलीसीस, काय तुय परभु चो सलसला बाट के बाकटा बनातो के नी छांडीस?
11 एबे दख, परभु तुके डंड देयसे, आउर तुय डंडिक काजे काना रसे आउर बेर के बले नी दखुक सकसे।”
तूरते धुंआरी असन जाला हुनचो आंईकमन के ढाकली आउर हुनचो पुरे अंधार होउन गेली। आउर हुन ए बाटे हुन बाटे टामडुक मुरियालो कि कोनी हुनचो हाथ धरुन नेओत।
12 जिदलदांय सिरगियूस ए गराहां दखलो, तेबे हुन परभु चो नंगत खबर ने भक्याउन गेलो आउर हुन सतपतेयालो।
पिसिदिया चो अंताकिया सहर ने
13 पउलुस आउर हुनचो संगवारीमन, पाफुस ले पानी जाहाज ने चेगुन भाति पंफुलिया चो पिरगा ने ईला। हुता जूहन्ना, हुनमन के छांडुन भाति जरूसलेम ने फिरुन गेलो।
14 हुनमन पिरगा थान ले पुरे गेला आउर पिसिदिया चो अंताकिया ने अमरला, हुता हुनमन बिसातो दिने, मंडली-घरे गेला आउर बसला।
15 नियम किताप आउर अगमजानीमन चो किताप ले पढ़लो पाछे, जहूदी मंडली-घर चो मुखियामन हुनमन लगे खबर पठाला, “भाईमन, लोगमन के उकसातो काजे तुमचो लगे काई गोट आसे जाले, सांगा।”
16 तेबे पउलुस उबा होलो आउर हुनमन के हाथ ले अक्याउन बललो:
“ए इसराएलिमन, आउर महापरभु के डरतो लोगमन, सुना:
17 इसराएलिमन चो महापरभु, आमचो पुरखामन के बाछलोसे, आउर जिदलदांय हुनमन मिसर राज ने परदेसी होउन रते रला, तेबे हुनमन के बड़े बनालो आउर हुनमन के हुनचो बड़े बल ले छंडाउन भाति मिसर राज ले निकराउन आनलो।
18 हुन दुय कोड़ी बरक ले रान भीतरे हुनमन के सहते रलो।
19 हुन, कनान राज ने रतो सात जातमन चो लोगमन के नसट करालो आउर हुनमन चो राज के चार सव आउर दुय कोड़ी दस बरक काजे आमचो पुरखामन चो हाथे करुन दिलो।
20 एचो पाछे, अगमजानी सामुएल दांय ले, राज करतो काजे हुनमन चो मंजिगता महापरभु, नियाव करुमन के दिलो।
21 एचो पाछे हुनमन गोटोक राजा मांगला, तेबे महापरभु बिनयामीन चो बंस ले कीस चो बेटा साउल के, हुनमन चो उपरे राजा बनालो। हुन दुय कोड़ी बरक राज करलो।
22 पाछे हुनके निकराउन भाति, दाउद के हुनमन चो राजा बनालो; जेचो काजे महापरभु ए साकी दिलो, ‘मोके गोटोक मनुक जिसय चो बेटा दाउद, मोचो मन भावतो असन मिरलोसे, हुनी मोचो सपाय मन-इछा के पुरा करेदे’।
23 एई दाउद चो बंस ले, महापरभु आपलो बायदा चो असन इसराएलिमन ने, गोटोक मुक्ति देउ बललोने, जीसु के पठालो।
24 जीसु चो ईलो ले आगे, जूहन्ना बपतिस्मा देतो बीता सपाय इसराएलिमन के मन बोहड़ातो चो बपतिस्मा चो गोट सांगलो।
25 जूहन्ना आपलो सेवा सरासरी करतोदांय बललो, ‘तुमी मोके कोन आय बलेसाहास? मय हुन नोआंय, मानतर दखा, मोचो पाछे जोन एउआय, मय, हुनचो पनई चो डोरी ढीलतो लाईक नोआंय’।
26 ए भाईमन, तुमी अबराहम चो बंस चो लोगमन, आउर महापरभु के डरतो लोग आहास, तुमीमन थाने ए मुक्ति चो गोट पठालोर आसे।
27 कसनबलले जरूसलेम ने रतो लोग आउर हुनमन चो मुखियामन हुनके नी चिताला आउर हुनमन अगमजानीमन चो किताप चो गोट के बले नी समजला जेके रोजे बिसातो दिने पढ़सोत, एईकाजे हुनमन, हुनके दोसी बनाउन भाति, हुन गोटमन के पुरा करला।
28 मानतर हुनमन, मोरते मारतो लाईक काई कसूर हुनचोने नी पावला। तेबले बले हुनमन पिलातुस राजा के मांगला कि हुनके कुरूस ने चेगाउन मोरते मारुक होओ।
29 जिदलदांय हुनमन हुनचो काजे लिखलो सपाय गोटमन के पुरा करला, तेबे चेलामन हुनके कुरूस ले उतराउन भाति हुनचो मोड़ी के करपन ने संगाला।
30 मानतर महापरभु हुनके मोरलोमन ले जियालो।
31 जीसु हुनमन के खुबे दिनमन ले दखा देते रलो, जोनमन हुनचो संगे गलील ले जरूसलेम ने एउन रला।; लोगमन चो पुरे एबे हुनीमन ची हुनचो साकी आसोत।
32 आमी तुमके हुन बायदा चो नंगत खबर सुनाउंसे, जोन आमचो पुरखामन ले महापरभु करुन रलो।
33 महापरभु जीसु के जीयाउन हुनी बायदा आमचो बंस काजे पुरा करलो। जसन भजन गीत किताप चो दुय अध्या ने लिखलोर आसे:
‘तुय मोचो बेटा आस।
आजी मय तुके जनम दिलेसे’।†
34 हुनके असन बरन ले मोरलो थान ले जियालो कि हुन केबई नी कुओ। हुन असन बललोसे:
‘मय, दाउद संगे करलो बायदा हिसाब ले, तुचो उपरे पवितर आउर दया दखायंदे’।†
35 एईकाजे हुन, आउर गोटोक भजन ने बले बललोसे:
‘तुय आपलो पवितर लोग के केबई कुउक नी देयीस’।†
36 कसनबलले दाउद तो, महापरभु चो मन असन आपलो समया ने सेवा करुन भाति मोरलो, आउर आपलो पुरखामन संगे माटी दिला, हुनचो मोड़ी कुउन बले गेली।
37 मानतर जेके महापरभु मोरलोमन ले जियालो, हुन नी कुउलो।
38 एईकाजे ए मोचो भाईमन, तुमी जाना, एई जीसु बाटले पाप खेमा चो नंगत खबर सांगुसे।
39 मोसा चो नियम-कानुन हिसाब ले, जोन गोटमन ने तुमी दोख नोहलो नी होउक सकते रलास, हुन सपाय गोटमन ने सतपतेयातो लोगमन, हुनचो बाटले दोख नोहलो होयसोत।
40 एईकाजे चेत ने राहा, असन नी होओ कि अगमजानीमन चो किताप ने लिखलो गोट, काय, तुमचो उपरे सत नी होओ:
41 ‘ए निंदा करतो लोगमन दखा,
भक्याहा आउर नास होआ;
कसनबलले मय तुमचो बेरा ने गोटोक काम करेंसे;
काम असन आय कि
कोनी तुमके सांगलो ने बले, तुमी केबई सत नी पतेयाहास’।”†
42 पउलुस आउर बरनबास पारथना घर ले बाहरे निकरतो बेरा, लोगमन हुनमन के गुहारला, तुमी एतो बिती बिसातो दिने बले आमके असन गोटमन आउर सुनाहा।
43 जिदलदांय मंडली-घरे पारथना सरली तेबे जहूदी लोगमन आउर जहूदी धरम ने ईलोर भगत लोगमन ले खुबे लोग पउलुस आउर बरनबास संगे होला। तेबे हुनमन लोगमन के गोटेयाला आउर समजाला कि महापरभु चो दया ने बाड़ते जाहा।
44 पाछे चो बिसातो दिने, सहर चो सपाय लोगमन महापरभु चो गोट सुनतो काजे पारथना घरे रूंडा होला।
45 मानतर जहूदीमन इतरो लोग-कुड़ा के दखुन भाति ईरका-कुचर होला आउर बदी देउन पउलुस चो गोट चो बिरुद करुक मुरियाला।
46 तेबे पउलुस आउर बरनबास डर नोहलो होउन बलला, “महापरभु चो गोट आगे तुमी, जहूदीमन के सुनातोर रली मानतर तुमी हुनके नी मानुन भाति आपने के जुग-जुग चो जीव पावतो लाईक नी समजलास। दखा, एईकाजे आमी बिजाती लोगमन बाटे जाउंसे।
47 परभु आमके ए हुकुम दिलोसे:
‘मय तुमके बिजातीमन काजे उजर बनालेसे,
कसनबलले तुमी मंजपुर चो कोना-कोना ने मुक्ति चो गोट सांगतो लोग होआसे’।”†
48 ए गोट के सुनुन भाति बिजातीमन खुबे हरिक होला। हुनमन महापरभु चो बचन चो जय-जय करुक मुरियाला: जितरो लोग के जुग-जुग जीव काजे बाछुन रलो, हुनमन सपाय सतपतेयाला।
49 तेबे परभु चो बचन, हुन सपाय राज ने बिगरुक मुरियाली।
50 मानतर जहूदीमन, मान पावलो भगतीन बायलेमन के आउर सहर चो बड़े मुखियामन के उकसाला आउर पउलुस आउर बरनबास चो बिरुद झगड़ा कराउन भाति हुनमन के आपलो राज ले निकराउन दिला।
51 तेबे हुनमन चो पुरे, आपलो पांयमन चो धुरला फापड़ुन भाति इकुनियुम ने गेला।
52 आउर सतपतेयालो लोगमन हरिक ले आउर पवितर आत्मा ले भरपुर होते रला।