मंडली उपरे आउर डंड एतोर
12
हुदलदांय हेरोद राजा, सतपतेयालो लोगमन चो मंडली चो कोके-कोके धरुन भाति डंड देउक मुरियालो।
2 हुन जूहन्ना चो भाई जाकूब के खांडा ले मोरते माराउन दिलो।
3 आउर जिदलदांय हुन दखलो कि जहूदी लोगमन एचोले हरिक होयसोत, तेबे हुन पतरस के बले धरलो: हुदलदांय पाग नोहलो रोटी चो तिहार चो दिनमन रली।
4 हुन, पतरस के धरुन भाति जयल घरे ढाकुन दिलो, आउर राखा करतो काजे, चार-चारझन पाईकमन चो चार गोहड़ी के आरेया-पारेया राखा संगालो, हेरोद मने करते रलो कि फसह तिहार चो पाछे, पतरस के लोगमन चो पुरे नियाव करतो काजे आनुक होयदे।
5 एईकाजे जयल घर ने पतरस चो राखा होते रली, हुदलदांय सतपतेयालो लोगमन चो मंडली गोटोक मन होउन, महापरभु ले हुनचो काजे पारथना करते रला।
सरगदूत, पतरस के जयल घर ले निकरायसे
6 जिदलदांय हेरोद, पतरस के लोगमन चो पुरे आनतो बीता रलो, हुनी राती पतरस दुयठन लोहा चो सिकरामन ने बांदलोर, दुयझन पाईकमन चो मंजिगते सोवते रलो आउर राखा करतो बीतामन जयल घर चो डेवना ने राखा करते रला।
7 तेबे दखा, परभु चो गोटोक सरगदूत हुनचो लगे एउन भाति उबा होलो, आउर पतरस रलो बाकरा ने उजर बरली, आउर सरगदूत, पतरस चो पंजरा के पेटुन भाति हुनके चेतालो आउर बललो, “उठ आउर झटके कर।” तूरते पतरस चो हाथमन ले सिकरा हिटून घसरली।
8 तेबे सरगदूत, हुनके बललो, “करांड के नंगत बांद आउर आपलो पनई पींद।” पतरस उसने करलो। हुन, पतरस के बललो, “आपलो फटई पींदुन मोचो पाट-पाट आव।”
9 पतरस बाकरा ले निकरुन भाति हुनचो पाट-पाट गेलो, मानतर हुन नी जानते रलो कि जोन बले सरगदूत करेसे, काय हुन सते होयसे, पतरस असन समजलो कि मय काई दरसन दखेंसे।
10 तेबे हुनमन, पईल राखा बीतामन आउर दुसर राखा बीतामन ले निकरुन भाति हुन लोहा चो कपाट लगे अमरला, जोन सहर बाटे नेयसे। हुन कपाट, हुनमन काजे आपने उगाड़ी होली आउर हुनमन निकरुन गोटोक खोर बाट ले गेला। एचो पाछे सरगदूत, पतरस के छांडुन जाते गेलो।
11 तेबे पतरस जानुन भाति बललो, “एबे मय सत के जानले कि परभु आपलो सरगदूत के पठाउन मोके हेरोद राजा ले बचालोसे आउर जहूदी लोगमन चो सपाय आसा के मुरमुरा करुन दिलो।”
12 जिदलदांय हुन सपाय गोट के जानलो, तेबे हुन जूहन्ना (जेके मरकुस बले बलाय होयसे) चो माय मरियम घरे गेलो, जोन थाने खुबे लोग रूंडुन भाति पतरस काजे पारथना करते रला।
13 जिदलदांय पतरस डेवना चो कपाट के ठटालो, तेबे रूदे नाव चो गोटोक कमेयीन सुनुन भाति ईली।
14 हुन, पतरस चो गोट के चिताली, मानतर हुन खुबे हरिक किरता कपाट नी उगाड़ली। हुन पराते भीतरे गेली आउर लोगमन के सांगली, “पतरस डेवना ने उबा आसे।”
15 हुनमन, हुनके बलला, “तुय बोयी आस।” हुन जोर ले बलली ए सते आय। तेबे हुनमन बलला, “हुनचो दूत आय।”
16 मानतर पतरस कपाट ठटाते ची रलो। एईकाजे हुनमन कपाट के उगाड़ला, आउर पतरस के दखुन भाति भक्याउन गेला।
17 तेबे पतरस, हुनमन के हाथ ले अक्याउन बललो, ओगाय राहा। तेबे हुन, हुनमन के सांगलो, महापरभु कसन हुनके जयल घर ले निकरालोसे; आउर हुन बललो, “जाकूब आउर दुसर भाईमन के बले ए गोट सांगुन दियास।” तेबे हुन निकरुन भाति दुसर थाने गेलो।
18 बड़े बियाने पाहरा करुमन चो मंजिगता नुकोई हरबर होला कि पतरस के काय होली।
19 जिदलदांय हेरोद राजा, पतरस के डगर धरलो आउर हुन नी मिरलोके, पाहरा करुमन के परखुन मोरते मारतो हुकुम दिलो। एचो पाछे हेरोद राजा, जहूदिया राज के छांडुन खुबे दिन कयसरिया सहर ने रलो।
हेरोद राजा चो मोरना
20 हेरोद राजा, सूर आउर सयदा चो लोगमन उपरे खुबे रीस होउन रलो। एईकाजे हुनमन गोटोक मन होउन भाति हुनचो लगे ईला आउर हुनमन, राजा चो बड़े काम करतो बीता बलासतुस के बिनाला, आउर हुनमन जाउन भाति राजा संगे मिसुक डगराला, कसनबलले हेरोद राजा चो राज ने हुनमन चो जीवना-खावना होते रली।
21 कबूल दिने, हेरोद राजा पोसाक पींदुन भाति राजगादी ने बसलो, आउर लोगमन के गोट सांगलो।
22 आउर लोगमन असन बलते रला, “ए तो मनुक चो नाई, मानतर परभु चो राग आय।”
23 हुदलीदांय परभु चो गोटोक सरगदूत हुनके बेमार ले मारलो। कसनबलले हुन महापरभु चो मयमा नी करलो, आउर हुन कीड़ा पड़ुन मोरुन गेलो।
24 मानतर महापरभु चो गोट बाड़ते आउर बिगरते गेली।
25 बरनबास आउर साउल आपलो सेवा बुता सारलो पाछे, हुनमन जूहन्ना के जोन मरकुस बलाय होयसे, आपलो संगे धरुन जरूसलेम ले बोहड़ला।