पतरस आपलो बुता चो बारे ने सांगेसे
11
जहूदिया राज ने रलो, पठालो-लोगमन आउर भाईमन असन सुनला कि बिजातीमन बले महापरभु चो गोट के मानलासोत।
2 आउर जिदलदांय पतरस जरूसलेम ने ईलो, तेबे जहूदी सतपतेयालो लोगमन (खतना होलो भाईमन) पतरस संगे बला-बली करुक मुरियाला।
3 आउर बलला, “तुय बिजातीमन (खतना नोहलो लोग) थाने जाउन कसन ने खादलीस?”
4 तेबे पतरस मूर ले मुरियाउन, सपाय गोट के जसन होउ रली उसने हुनमन के सांगलो,
5 “मय जाफा सहर ने पारथना करते रले। तेबे मय चेत नोहलो असन होउन भाति गोटोक दरसन दखले। गोटोक बड़े चदर असन चारो बाटले लटकलोर काई तीज सरग ले उतरुन मोचो लगे ईली।
6 जिदलदांय मय हुनके नंगत दखले, तेबे मय, मंजपुर चो चार पांयामन, रान जियादमन, रेंगतो जनतुरमन आउर बादरी चो चड़ईमन के दखले।
7 आउर मय, असन राग बले सुनले, ‘ए पतरस उठ, मारुन खा’।
8 मय बलले: ‘नाई परभु, केबई नाई, कसनबलले काई असुद आउर अडरा तीजमन मय केबई नी खादलेसे।’
9 फेर दुसर हार सरग ले असन गोट होली: ‘जोन बले महापरभु सुद बनालोसे हुनके असुद नी बल।’
10 असन तीन हार होली, हुनचो पाछे जमाय के फेर सरग ने झीकुन नीला।
11 दखा, तूरते, हुदलीदांय तीनझन मनुक, जोनमन के कयसरिया ले मोचो लगे पठाउन रलो, जोन घरे मय रले, हुता एउन उबा होला।
12 तेबे पवितर आत्मा मोके बललो, काई फिकिर नी करुन तुय, हुनमन संगे जा। जाफा ले ईलो, ए छयझन भाईमन बले मोचो संगे ईला, आउर आमी हुन मनुक कुरनेलियुस चो घरे गेलु।
13 हुन आमके बललो, गोटोक सरगदूत हुनके, घरे दरसन देउन भाति बललो कि जाफा ने मनुक पठाउन भाति समोन, जोन पतरस बलाय होयसे, हुनके हागदेउन आन।
14 हुन तुमके असन गोट सांगेदे, जेचो बाटले तुय आउर तुचो कुटुम चो सपाय लोग मुक्ति पाहासे।
15 जसन मय हुनमन के गोटेयाउक मुरियाले, हुदलीदांय पवितर आत्मा हुनमन चो उपरे उतरली, जसन मूर ने आमचो उपरे उतरुन रली।
16 तेबे मोके परभु चो हुन गोट सूरता ईली, जोन हुन बलुन रलो, ‘जूहन्ना तो पानी ने बपतिस्मा दिलो, मानतर तुमी पवितर आत्मा ले बपतिस्मा पाहासे।’
17 जेबे महापरभु हुनमन के बले हुनी दान दिलो, जोन आमके परभु जीसु किरिस्त ने सतपतेयालोके मिरुन रली, तेबे मय कोन आंय जोन महापरभु के ठेबाउक सकेंदे?”
18 ए सुनुन भाति हुनमन ओगाय होला, आउर महापरभु चो जय-जय करला आउर बलुक मुरियाला, “महापरभु बिजाती लोगमन के बले अमर जीव पावतो काजे मन बोहड़ातो चो मोहका दिलोसे।”
अंताकिया ने सतपतेयालो लोगमन चो मंडली
19 जोन लोगमन हुन चिपा काजे, जोन स्तिफनुस चो समया ने पड़ुन रली, ए बाटे हुन बाटे जाउन रला, हुनमन बुलते-बुलते फीनिके, साइपरस आउर अंताकिया थाने अमरला। हुनमन जहूदीमन के छांडुन आउर कोकई परभु जीसु चो नंगत खबर के नी सांगते रला।
20 मानतर हुनमन ले खिंडिक साइपरसेयामन आउर कुरेनेयामन रला, जोनमन अंताकिया थाने एउन भाति जूनानी लोगमन के बले परभु जीसु चो नंगत खबर सुनाते रला।
21 आउर परभु चो बल हुनमन संगे रली, आउर खुबे लोग सतपतेयाउन भाति परभु बाटे ईला।
22 जिदलदांय ए गोट, जरूसलेम चो सतपतेयालो लोगमन चो मंडली सुनला, तेबे हुनमन बरनबास के अंताकिया ने पठाला।
23 हुन हुता अमरलो आउर महापरभु चो दया के दखुन हरिक होलो, आउर सपाय के सिखिया देउन गुहारलो कि देहें आउर मन ले परभु चो भगत होउन राहा।
24 बरनबास गोटोक नंगत मनुक रलो। हुन पवितर आत्मा आउर सतपतेयातो ले भरपुर रलो आउर खुबे लोग एउन परभु ने मिसला।
25 हुन साउल के डगरातो काजे तरसुस सहर ने गेलो।
26 जिदलदांय हुन साउल के भेटलो तेबे हुनके अंताकिया ने आनलो। हुनमन बरककार ले सतपतेयालो लोगमन चो मंडली संगे मिसते रला आउर खुबे लोगमन के सिखिया देते रला। चेलामन, सपाय ले आगे अंताकिया ने ची किरिस्तीमन बलाय होला।
27 हुनी दिनमन ने, आदो अगमजानीमन, जरूसलेम ले अंताकिया ने ईला।
28 हुनमन ले गोटोक अगमजानी, जेचो नाव अगबुस रली, उबा होउन भाति पवितर आत्मा चो सकत ले सांगलो कि सपाय संवसार ने बड़े भूक पड़ेदे। (हुनी भूक, कलोदियुस राजा चो बेरा पड़ली।)
29 तेबे सतपतेयालो लोगमन बिचार करला कि सपाय भाई आपलाहान सकत हिसाब ले, जहूदिया राज ने रतो आपलो भाईमन काजे साहरा पठावां।
30 हुनमन असने करला, बरनबास आउर साउल चो हाथे, धरम-सियानमन लगे दान पठाउन दिला।