पतरस आउर कुरनेलियुस
10
कयसरिया सहर ने कुरनेलियुस नाव चो गोटोक मनुक रलो। हुन, इतालेया नाव चो पलटन चो मुखिया रलो।
2 हुन, महापरभु चो भगत रलो, आपलो सपाय कुटुम चो लोग संगे महापरभु के डरते रलो। हुन गरीब जहूदीमन के खुबे दान देते रलो, आउर महापरभु ले अमदेया पारथना करते रलो।
3 हुन, गोटोक दिन चो अड़उ पाहार, गोटोक दरसन दखलो। दरसन ने हुन, महापरभु चो गोटोक सरगदूत के छुक-छुका दखलो, जोन भीतरे एउन असन बललो, “ए कुरनेलियुस।”
4 हुन, हुनके नंगत दखलो आउर डर संगे पूछलो, “ए परभु, काय गोट आय?”
सरगदूत हुनके बललो, “तुचो पारथना आउर गरीबमन के दिलो दान, गोटोक चीना असन सूरता काजे महापरभु पुरे अमरलीसे।
5 एबे जाफा ने लोग पठाउन भाति समोन के, जोन पतरस बलाय होयसे हागदेउन आन।
6 हुन चामड़ा चो पेसा करतो बीता समोन चो घरे सगा होउन आसे, हुनचो घर समदूर रेटे आसे।”
7 जिदलदांय हुनके गोटेयालो सरगदूत गेलो, तेबे हुन, दुयझन कमेया आउर हुनके राखा रलो पाईकमन ले गोटोक भगत पाईक के हागदिलो,
8 आउर जोन बले होउन रली समजाउन भाति हुनमन के जाफा सहर ने पठालो।
पतरस दरसन दखेसे
9 जाते-जाते दुसर दिन, जिदलदांय हुनमन जाफा सहर लगे अमरला, हुदलदांय बेरा ढरतो अमरा-अमरी के पतरस मेलान ढाबा ने पारथना करतो काजे चेगलो।
10 आउर हुनके भूक लागली, हुन काई खातो काजे मने करते रलो। मानतर जिदलदांय रांदा होते रली, तेबे पतरस चेत नोहलो असन होलो।
11 हुन गोटोक दरसन दखलो कि सरग उगाड़ी होलीसे आउर गोटोक मांद चदर असन चारो बाटले लटकते, मंजपुर ने उतरते रये।
12 जोन थाने मंजपुर चो सपाय चार पांयामन आउर रेंगतो जनतुरमन आउर बादरी चो चड़ईमन रला।
13 तेबे हुन असन राग सुनलो, “ए पतरस उठ, मारुन भाति खा।”
14 मानतर पतरस बललो, “नाई परभु, केबई नाई। मय केबई असन असुद आउर अडरा तीजमन के नी खादलेसे।”
15 आउर दुसर हार, हुन असन राग सुनलो, “जोन तीज के महापरभु सुद मानलोसे, हुनके तुय असुद नी बल।”
16 तीन हार उसने होली; तेबे तूरते हुन चदर के सरग ने फेर उचाउन नीला।
17 जिदलदांय पतरस ए दरसन चो गोट के आपलो मन ने बिचार करते रलो कि ए दरसन चो काय अरथ आय, हुदलीदांय हुन मनुकमन, जोनमन के कुरनेलियुस पठाउन रलो, समोन चो घर पूछते-पूछते हुनचो बाट डेवना ने एउन उबा होला।
18 हुनमन हागदेउन पूछला, “समोन जोन पतरस बलाय होयसे, काय, एथाय सगा होउन आसे?”
19 जिदलदांय पतरस हुन दरसन चो गोट के बिचार करते रलो, हुदलीदांय पवितर आत्मा हुनके बललो, “दख, तीनझन मनुक तुके डगरायसोत।
20 उठुन खाले उतर, आउर फिकिर नोहलो हुनमन संगे जा, कसनबलले मय ची हुनमन के पठालेसे।”
21 तेबे पतरस खाले उतरलो आउर हुन मनुकमन के बललो, “दखा, जेके तुमीमन खोजसास, हुन मय ची आंय। तुमी काय काजे ईलासाहास?”
22 हुनमन बलला, “पलटन चो मुखिया कुरनेलियुस, जोन गोटोक धरमकारी आउर महापरभु के डरतो बीता आय, जेके सपाय जहूदीमन मानसोत; हुनके गोटोक पवितर सरगदूत बाटले, तुके आपलो घरे हागदेउन तुचो ले महापरभु चो बचन सुनतो हुकुम मिरलीसे।”
23 तेबे पतरस हुनमन के घर भीतरे हागदिलो, आउर हुनमन चो इजित मान करलो। हुनचो दुसर दिने, पतरस हुनमन संगे गेलो, आउर जाफा चो कोनी-कोनी भाईमन बले संगे गेला।
पतरस, कुरनेलियुस चो घरे
24 आउर दुसर दिने, हुनमन कयसरिया ने अमरला, हुता कुरनेलियुस, आपलो लोग-बाग आउर संगी-संगवारी लोगमन संगे, हुनचो बाट दखते रलो।
25 जिदलदांय पतरस भीतरे एते रलो, तेबे कुरनेलियुस हुनके भेटलो आउर मांडिखुटा देउन पांय पड़लो।
26 आउर पतरस हुनके उठाउन बललो, “उबा हो, मय बले तो मनुक ची आंय।”
27 पतरस हुनचो संगे गोटेयाते-गोटेयाते घर भीतरे गेलो आउर हुता खुबे लोगमन रूंडा होलो के दखलो।
28 हुन, हुनमन के बललो, “तुमी जानसास, बिजाती* संगे संगत करतोर आउर हुनमन चो घरे जातोर, जहूदी काजे आपलो धरम हिसाब ले नी बने। मानतर महापरभु मोके बललोसे कि मय कोनी बले मनुक के अडरा नोहले असुद नी बलें।
29 एईकाजे जेबे मोके हागदिला, तेबे मय काई नी पूछुन भाति ईलेसे। एबे मय पूछेंसे, मोके काय काम काजे हाग दिलासाहास।”
30 कुरनेलियुस बललो, “चार दिन होली मय नंगत इदलीदांय, अड़उ पाहार आपलो घरे पारथना करते रले। आउर दख, बरतो फटई पींदलोर गोटोक मनुक मोचो पुरे एउन उबा होलो।
31 आउर हुन बललो, ‘ए कुरनेलियुस, तुचो पारथना महापरभु सुनलोसे, आउर तुचो गरीब के दिलोर दान के महापरभु सूरता करलोसे।
32 एबे तुय कोकई बले जाफा सहर ने पठाव आउर हुताले समोन के जोन पतरस बलाय होयसे, हुनके एथा हागदेस। हुन चामड़ा चो पेसा करतो बीता समोन चो घरे आसे, जेचो घर समदूर चो रेटे आसे, हुता हुन, सगा होउन आसे।’
33 हुदलीदांय मय, तुचो थाने लोग पठाले, नंगत होली तुय एथा ईलीस। एईकाजे आमी सपाय एथा महापरभु चो पुरे आसुं, कसनबलले जोन बले महापरभु तुके बलतो काजे हुकुम दिलोसे, हुनके आमी नंगत ले सुनुंदे।”
पतरस चो सिखानी
34 तेबे पतरस बलुक मुरियालो, “एबे मय सते जानले कि महापरभु कोचई पाटेया नी होए।
35 मानतर सपाय जात चो लोग, जोन हुनके डरसोत आउर धारनिक बुता करसोत, हुनमन के महापरभु मने करेदे।
36 ए हुनी गोट आय, जेके इसराएलिमन लगे महापरभु पठालो, आउर हुन जीसु किरिस्त बाटले, जोन सपाय चो परभु आय, हुनमन के अस्तिर चो नंगत खबर सुनालो।
37 ए घटलो गोटमन तुमीमन जानासाहास, जोन जूहन्ना चो बपतिस्मा चो गोट सुनालो पाछे, गलील ले मुरियाउन सपाय जहूदिया राज ने बिगरली।
38 कसन बरन ले महापरभु, जीसु नासरतेया के पवितर आत्मा आउर सकत ले अबिसेक करलो आउर कसन बरन ले जीसु सपाय के भलई करते आउर देव-भूत धरलो लोगमन के उजराते रलो, कसनबलले महापरभु हुनचो संगे रलो।
39 आमी हुन सपाय बुतामन चो साकी आसुं, जोनमन के जीसु, जहूदीमन चो राज ने आउर जरूसलेम ने करलो। हुनमन, जीसु के कुरूस ने चेगाउन मोरते मारुन दिला।
40 मानतर हुनके महापरभु तीसर दिने, मोरलो थान ले जियालो, आउर सपाय चो पुरे दखालो।
41 सपाय लोगमन के नाई, मानतर आमी साकीमन के, जोनमन के महापरभु आगे ले बाछुन रलो, दखा दिलो आउर आमी हुनचो मोरलो थान ले जीव उठलो पाछे, हुनचो संगे खादलु आउर पीवलु।
42 परभु जीसु आमके हुकुम दिलोसे कि लोगमन के नंगत खबर सांगा आउर साकी दिया। कसनबलले ए हुनी आय, जेके महापरभु जीव रतो लोगमन आउर मोरलो लोगमन चो नियाव करतो काजे चुनलोसे।
43 सपाय अगमजानीमन हुनचो गवई देयसोत कि जोन कोनी बले हुनचो उपरे सतपतेयादे, हुनके जीसु चो नाव ले पापमन चो खेमा मिरेदे।”
बिजातीमन पवितर आत्मा के पायसोत
44 जिदलदांय पतरस ए गोट बलते ची रलो, तेबे गोट सुनतो सपाय लोगमन उपरे पवितर आत्मा उतरली।
45 तेबे खतना करलो (जहूदी) सतपतेयालो लोगमन, जोनमन पतरस संगे एउन रला, हुनमन सपाय भक्याला, कसनबलले बिजातीमन चो उपरे बले पवितर आत्मा चो दान रिकाउन दिलोसे।
46 कसनबलले हुनमन के दुसर-दुसर भासा बलतोके आउर महापरभु चो जय-जय करतो के सुनला,
47 तेबे पतरस बललो, “काय, कोनी ए लोगमन के पानी ने बपतिस्मा धरतो ले ठेबाउक सके? एमन बले आमचो असन पवितर आत्मा के पावलासोत।”
48 एईकाजे पतरस हुकुम दिलो कि हुनमन के जीसु किरिस्त चो नाव ने बपतिस्मा देतोर आय। तेबे हुनमन पतरस के गुहारला कि खिंडिक दिन तुय आमचो संगे रा।