इकुनियुम ने पउलुस आउर बरनबास
14
इकुनियुम ने असन होली कि पउलुस आउर बरनबास, जहूदीमन चो मंडली-घरे गेला। हुता हुनमन असन गोटमन सांगला कि जहूदीमन आउर जूनानीमन ले खुबे लोगमन सतपतेयाला।
2 मानतर नी पतेयातो जहूदी लोगमन, बिजाती लोगमन चो मन के, ए भाईमन चो बिरुद उकसाला आउर हुनमन के अडरा गोटमन सांगुन भाति हुनमन चो मन के कटुर करला।
3 एईकाजे पउलुस आउर बरनबास खुबे दिन ले हुता रला आउर परभु चो बारे ने ढाढ़ुस ले सांगते रला। परभु, हुनमन चो हाथ ले चीना आउर महासंदे चो बुता कराउन आपलो दया चो बचन चो साकी देते रलो।
4 मानतर सहर चो लोगमन दुय भाग होला। एमन ले आदो जहूदीमन बाटे आउर आदो पठालो-लोगमन बाटे होला।
5 मानतर जिदलदांय बिजातीमन आउर जहूदीमन, हुनमन के हिनस्ता करतो काजे आउर हुनमन के पकना ने मारतो काजे आपलो मुखियामन संगे गेला।
6 तेबे पउलुस आउर बरनबास ए गोट के जानला, आउर हुताले हुनमन लुकाउनिया चो लुसतरा आउर दिरबे सहरमन ने, आउर आली-पाली चो जगामन ने पराउन गेला।
7 आउर हुता नंगत खबर सुनाउक मुरियाला।
लुसतरा आउर दिरबे ने
8 लुसतरा सहर ने गोटोक मनुक बसुन रलो। हुनचो पांयमन ने बल नी रली। हुन जनम ले खोड़ेया रलो आउर हुन केबई नी हिंडुन रलो।
9 हुन पउलुस चो गोटेयातो के सुनते रलो, आउर पउलुस हुनचो बाटे नंगत ले दखलो आउर जानलो, हुनके चेकरतो चो बिसवास आसे।
10 पउलुस जोर ले बललो, “आपलो पांयमन चो बल ने चेंगचेंगा उबा हो।” तेबे हुन खोड़ेया उदलुन भाति हिंडुक-बुलुक मुरियालो।
11 लोगमन, पउलुस चो ए बुता के दखुन भाति लुकाउनेया चो बोली ने किरकिरुन बलला, “देवमन, मनुक चो भेस ने आमचो लगे सरग ले उतरुन ईलासोत।”
12 हुनमन बरनबास के “जयूस,” आउर गोटेयातो ने पुरे रलो पउलुस के “हिरमेस” बलला।
13 जयूस चो मंदिर हुनमन चो सहर चो पुरे रली। हुन मंदिर चो पुजारी, बयलामन आउर फूलमन चो माला डेवना ने आनुन लोगमन चो पुरे जतरा करतो उआट करलो।
14 जिदलदांय पठालो-लोगमन बरनबास आउर पउलुस ए गोट के सुनला, तेबे हुनमन मुरमुरा होउन भाति आपलो फटईमन के चीरुन दिला, आउर लोग-कुड़ा भीतरे पराते ओलला, आउर किरकिरुन बलला, “ए लोगमन तुमी ए काय करसास,
15 आमी बले तो तुमचो असन दुख-सुख भोगतो मनुक आंव। आमी तुमके नंगत खबर सुनाउंसे, तुमी ए फोकाहा तीजमन ले अलगे रउन जीवता महापरभु चो बाटे फिरा, जोन सरग, मंजपुर, समदूर आउर जोन बले हुता आसे, हुन सपाय के बनालोसे।†
16 हुन दादी पुरखा चो समया ने सपाय जात चो लोगमन के आपलो-आपलो बाट ने हिंडुक-बुलुक दिलो।
17 तेबले बले हुन आपलो साकी देउक नी छांडलो आउर हुन भलई बुता करते रलो आउर बादरी ले बरसा आउर बरन-बरन चो फसल पाकतो बतर देउन तुमीमन के खादी-पीदी दिलो आउर मन के हरिक करते रलो।”
18 असन बललो पाछे बले आपलो काजे जतरा करतो ले लोगमन के ठेबाउक नी सकला।
19 मानतर खिंडिक असन जहूदीमन अंताकिया आउर इकुनियुम ले ईला आउर हुनमन लोगमन के आपलो बाटे बनाला आउर हुनमन पउलुस के पकना-पकना मारला, आउर हुनके मोरलो बलुन भाति ओड़गोड़ते-ओड़गोड़ते सहर चो बाहरे नीला।
20 जिदलदांय सतपतेयालो लोगमन, पउलुस चो भोंवरक एउन उबा होला, तेबे हुन उठुन भाति सहर ने गेलो, आउर दुसर दिने बरनबास संगे दिरबे ने गेलो।
सीरिया राज चो अंताकिया सहर ने फिरुन एतोर
21 पउलुस आउर बरनबास दिरबे सहर चो लोगमन के नंगत खबर सुनाला आउर हुता खुबे लोग सतपतेयाला। हुनचो पाछे हुनमन लुसतरा, इकुनियुम आउर अंताकिया ने फिरुन ईला।
22 आउर सतपतेयालो लोगमन चो मन के हुनमन बरसक करते रला, आउर सतपतेयातोने बाड़तो काजे उकसाते रला; आउर असन बलते रला, “आमनमन के खुबे डंड सहुन भाति महापरभु चो राज ने ओलतोर आय।”
23 हुनमन सपाय मंडली ने सियानमन के बाछला, आउर उपास संगे पारथना करुन भाति जेचो उपरे हुनमन भोरसा करुन रला, हुनमन के परभु चो हाथे सोपुन दिला।
24 हुनमन पिसिदिया बाटले पंफुलिया ने अमरला।
25 आउर पिरगा चो लोगमन के नंगत खबर सुनाउन भाति हुनमन, इटली राज अमरला।
26 हुताले हुनमन पानी जाहाज ने चेगुन अंताकिया ने ईला, जोन थाने हुनमन के महापरभु चो दया ने सोपुन रला, हुन सेवा-बुता के सारुन ईला।
27 हुता अमरुन भाति हुनमन सतपतेयालो लोगमन चो मंडली के रूंडा करला आउर सांगला कि महापरभु हुनमन चो संगे रउन भाति कसन बड़े-बड़े बुता करलो; आउर बिजातीमन काजे सतपतेयातो चो बाट उगाड़ुन दिलो।
28 हुता पउलुस आउर बरनबास सतपतेयालो लोगमन संगे खुबे दिन ले रला।