जरूसलेम ने बड़े धरम सभा
15
फेर आदो लोग जहूदिया राज ले अंताकिया ने ईला आउर हुनमन भाईमन के सिखाउक मुरियाला, “मोसा चो दिलोर नीती ने तुमचो खतना* नी होलोने तुमी मुक्ति पाउक नी सकास।”
2 तेबे पउलुस आउर बरनबास, हुनमन संगे खुबे झगड़ा आउर बला-बली होला, तेबे हुनमन बिचार करला कि पउलुस आउर बरनबास आउर अंताकिया चो भाईमन ले आदो लोग, ए गोट काजे जरूसलेम ने पठालो-लोगमन आउर धरम सियानमन लगे जाओत।
3 आउर सतपतेयालो मंडली चो लोगमन हुनमन के खिंडिक दूर अमराउन दिला। हुनमन फीनिके आउर सामरिया राज ले जाते-जाते भाईमन के, बिजातीमन चो मन बोहड़ातो खबर सुनाते गेला, एके सुनुन सपाय भाईमन खुबे हरिक होला।
4 जिदलदांय हुनमन जरूसलेम ने अमरला, तेबे सतपतेयालो लोगमन चो मंडली, पठालो-लोगमन आउर धरम सियानमन, हुनमन संगे हरिक ले भेट होला। पउलुस आउर बरनबास हुनमन के सांगला कि महापरभु हुनमन संगे रउन कसन-कसन बुतामन करलोसे।
5 मानतर फरीसीमन ले जोनमन सतपतेयाउन रला, हुनमन ले आदो लोग उठुन भाति बलला, “बिजाती लोगमन के खतना करातोर आउर मोसा चो दिलोर नियम-कानुनमन के मानतोर ची आय।”
6 तेबे पठालो-लोगमन आउर धरम सियानमन ए गोट उपरे बिचार करतो काजे रूंडा होला।
7 तेबे खुबे बला-बली होलो पाछे पतरस उबा होउन हुनमन के बललो, “ए भाईमन, तुमी जानासाहास, खुबे दिन चो आगे महापरभु तुमचो मंजिगता ले मोके बाछलो कि मोचो टोंड ले बिजातीमन नंगत खबर सुनुन सतपतेयाओत।
8 आउर मन के जानतो महापरभु, बिजातीमन के बले आमचो असन पवितर आत्मा देउन ए साकी दिलो कि हुनमन बले सतपतेयाउक सकोत।
9 कसनबलले सतपतेयालो बाटले हुनमन चो मन के सुद करुन आमचो ने आउर हुनमन चो ने काई भेद-भाव नी करलो।
10 तेबे तुमी एबे काय काजे महापरभु के परखासाहास? तुमी सतपतेयालो लोगमन चो खांदे असन जुआंड़ी नी तेंगड़ा, जेके आमचो दादी पुरखामन नी उठाउक सकला आउर आमी बले उठाउक नी सकुं?
11 हव, आमी पतेयाउंसे कि जसन आमी परभु जीसु चो दया ले मुक्ति पावलुसे असने ची हुनमन बले मुक्ति पावदे।”
12 एचो पाछे धरम सभा चो सपाय लोग ओगाय होउन बरनबास आउर पउलुस चो गोटमन के सुनुक मुरियाला कि कसन बरन ले महापरभु हुनमन चो बाटले बिजातीमन चो मंजी बड़े-बड़े चीनामन आउर महासंदे चो बुतामन दखालोसे।
13 जिदलदांय हुनमन आपलो गोट सारला, तेबे जाकूब बललो, “ए भाईमन, मोचो गोट सुना।
14 समोन (पतरस) सांगलो कि महापरभु पईल हार बिजातीमन चो उपरे कसन दया करलो आउर हुनमन चो मंजिगता ले आपलो काजे निज लोग बनातो काजे गोटोक रयत के बाछलोसे।
15 एचोले अगमजानीमन चो गोट बले सत होयसे जसन धरमसास्तर ने लिखलोर आसे:
16 ‘एचो पाछे मय फेर एयंदे
आउर दाउद चो घसरलो घर (कुटुम) के उठायंदे,
मय हुनचो उजरलो घर के फेर बनायंदे,
आउर हुनके सजारेंदे।
17 एईकाजे कि बाचलो लोगमन
बललोने जितरो बिजातीमन
मोचो नाव चो बलाय होयसोत,
परभु के डगराओत’।
18 ‘ए हुनी परभु बलेसे जोन संवसार चो मूर बेरा ले ए गोटमन चो खबर देयसे’।†
19 एईकाजे मोचो बिचार असन आसे कि बिजाती लोगमन ले जोनमन महापरभु बाटे बोहड़ेसोत, आमी हुनमन के दुख-डंड नी देउं?
20 मानतर आमी हुनमन के लिखुन पठाउं कि:
हुनमन मूरत थाने चेगालो तीजमन के खातो ले,
आउर दुसर बायले-मनुक संगे सोवतो ले
आउर टोडरा अलटलोर पसुमन चो मास आउर लोउ खातो ले बाचुन रओत।
21 कसनबलले जुग-जुग ले सहर-सहर ने मोसा चो दिलोर नियम-कानुनमन के सांगसोत आउर हुनमन के बिसातो दिने मंडली-घरे पढ़सोत।”
बिजाती सतपतेयालो लोगमन काजे चिटी
22 तेबे सपाय मंडली आउर पठालो-लोगमन आउर धरम सियानमन ए गोट के मने करला कि आमीमन ले अजिक मनुकमन के बाछवां आउर हुनमन के पउलुस आउर बरनबास संगे अंताकिया ने पठावां। तेबे हुनमन जहूदा जोन बरसबा बलाय होयसे आउर सीलास के बाछला। ए दुनो, भाईमन थान ले मुखियामन रला। हुनमन के पउलुस आउर बरनबास चो संगे अंताकिया ने पठाला।
23 हुनमन चो हाथ ले ए चिटी लिखुन पठाला: अंताकिया, सीरिया आउर किलिकिया चो रतो भाईमन के जोन बिजातीमन आत, जरूसलेम चो पठालो-लोगमन आउर धरम सियानमन आउर भाईमन बाटले तुमके जुहार!
24 आमीमन सुनलुसे कि आमचो मंजिगता ले अजिक लोगमन हुता एउन भाति तुमके आपलो गोटमन ने पाड़ुन तुमचो मन के गुपालासोत। मानतर आमी हुनमन के ए हुकुम नी देउन रलु।
25 एईकाजे आमी गोटकी बिचार होउन मने करलु कि बाछलो मनुकमन के, आमी खुबे मया करतो पउलुस आउर बरनबास संगे तुमचो लगे पठाउंदे।
26 एमन असन मनुकमन आत जोनमन आपलो जीव के आमचो परभु जीसु किरिस्त काजे गराहां ने पाड़लासोत।
27 एईकाजे आमी जहूदा आउर सीलास के तुमचो लगे पठालुसे, जोनमन तुमके, आपलो टोंड ले बले ए गोटमन के सांगदे।
28 पवितर आत्मा आउर आमी असन मने करलु कि काम पड़तो चो गोटमन के छांडुन आउर तुमचो उपरे काई बोजा नी तेंगड़ू:
29 तुमी मूरत थाने चेगालो जिनीसमन ले
आउर लोउ ले, आउर टोडरा अलटलोर जीव जन्तुर चो मास खातो ले,
आउर दुसर बायले-मनुक संगे सोवतो ले अलगे राहा।
एमन ले अलगे रलोने तुमचो भलई होयदे। जुहार।
30 पाछे हुनमन बिदा धरुन अंताकिया ने अमरला, आउर सतपतेयालो लोगमन चो मंडली के रूंडा करला आउर हुन चिटी हुनमन के दिला।
31 हुनमन चिटी पढ़ला आउर अस्तिर चो गोट ले खुबे हरिक होला।
32 जहूदा आउर सीलास जोनमन खुद बले अगमजानीमन रला, खुबे नंगत गोटमन सांगुन भाईमन के उकसाला।
33 हुनमन हुता खिंडिक दिन रलो पाछे, सतपतेयालो भाईमन, हुनमन के आपलो पठालो लोगमन लगे बोहड़ुन जातो काजे अस्तिर ने बिदा करला।
34 मानतर सीलास हुता रतो काजे मन करलो।
35 पउलुस आउर बरनबास अंताकिया ने ठेबला, हुनमन खुबे दुसर लोगमन के परभु चो नंगत खबर सुनाते आउर सिखाते रला।
पउलुस आउर बरनबास चो अलगे होतोर
36 खिंडिक दिन पाछे पउलुस, बरनबास के बललो, “आव, जोन सहरमन ने परभु चो गोट सुनाउन रलु, आमी फेर हुता जावां, आउर आपलो भाईमन के दखवां कि हुनमन कसन आसोत।”
37 तेबे बरनबास, जूहन्ना के जोन मरकुस बलाय होयसे, संगे नेतो बिचार करलो।
38 मानतर पउलुस हुनके आपलो संगे नेतोर नंगत नी समजलो, कसनबलले हुन पंफुलिया ने हुनमन के छांडुन देउन रलो, आउर नंगत खबर सांगतो बुता काजे हुनमन संगे नी जाउन रलो।
39 मरकुस काजे हुनमन इतरो बला-बली होला कि हुनमन गोटोक-दुसर ले अलगे होउन गेला, आउर बरनबास, मरकुस के आपलो संगे धरुन पानी जाहाज ने साइपरस ढिपका ने जाते गेलो।
40 मानतर पउलुस, सीलास के आपलो संगे नेतो काजे बाछलो, आउर भाईमन, परभु चो दया ने हुनके सोपला आउर हुन हुताले जाते गेलो।
41 हुन सीलास संगे, सतपतेयालो लोगमन चो मंडलीमन के बरसक बनाते-बनाते, सीरिया आउर किलिकिया राजमन बाटले गेलो।