पउलुस आउर सीलास चो नवा संगवारी
16
पउलुस, दिरबे आउर लुसतरा सहरमन ने बले गेलो, आउर हुता तीमुथियुस नाव चो गोटोक सतपतेयालो बीता रलो। हुन सतपतेयालो जहूदीनी चो बेटा रलो, मानतर हुनचो बुआ जूनानी रलो।
2 हुन लुसतरा आउर इकुनियुम सहरमन चो भाईमन ने मान पावलो मनुक रलो।
3 पउलुस हुनके आपलो संगे नेउक मन करलो, आउर जोन जहूदीमन हुता रला हुनमन चो किरता पउलुस हुनचो खतना करालो। कसनबलले जहूदीमन जानते रला कि हुनचो बुआ जूनानी रलो।
4 सहरमन ने जाउन-जाउन हुनमन, हुन नियममन के जोन जरूसलेम चो पठालो-लोगमन आउर धरम सियानमन बनाउन रला, मानतो काजे सतपतेयालो लोगमन चो मंडली के सांगते रओत।
5 असने सतपतेयालो लोगमन चो मंडली, बिसवास ने बरसक होते गेली आउर हुनमन चो गनती रोजे दिना बाड़ते गेली।
पउलुस दखलो दरसन
6 पवितर आत्मा, पउलुस आउर हुनचो संगवारीमन के आसिया ने महापरभु चो गोट सुनाउक नी दिलो, तेबे हुनमन फरूगिया आउर गलाती राजमन भीतर ले गेला।
7 हुनमन मूसिया लगे अमरला, आउर बितुनिया ने जातो काजे बिचार करला, मानतर जीसु चो आत्मा हुनमन के जाउक नी दिलो।
8 एईकाजे हुनमन, मूसिया ले होउन तरोआस ने ईला।
9 हुता पउलुस राती बेरा गोटोक दरसन दखलो कि मकिदुनिया चो गोटोक मनुक उबा होउन हुनके गुहारुन बलेसे, “ए पाट मकिदुनिया ने आव, आउर आमचो साहरा कर।”
10 पउलुस ए दरसन दखते खन, आमी तूरते मकिदुनिया जातो काजे तियार होलु, आमी ए समजलु कि महापरभु आमके मकिदुनिया चो रतो लोगमन के नंगत खबर सुनातो काजे पठालोसे।
लुदिया नाव चो बायले सतपतेयातोर
11 एईकाजे आमी तरोआस ले पानी जाहाज ने चेगुन भाति सीदा समोतरा खंड ने अमरलु आउर हुताले दुसर दिने नियापुलिस सहर ने ईलु।
12 हुताले आमी फिलिपी ने अमरलु, जोन मकिदुनिया राज चो जगतजाना सहर आय, आउर रोमीमन चो रतो जगा आय; आउर आमी हुता खिंडिक दिन ले रलु।
13 बिसातो दिने, आमी असन बिचार करुन सहर चो बाहरे नंदी खंडे गेलु कि हुता पारथना करतो काजे कोनी ठान होयदे। हुता बायलेमन रूंडा होउन रला, आमीमन बसुन भाति हुनमन संगे गोटेयाउक मुरियालू।
14 लुदिया नाव चो थूआतीरा सहर चो महांग सिलकन फटई बिकतो बीती गोटोक भगतीन बायले रली, हुन आमचो गोटमन के सुनते रली आउर परभु हुनके समज दिलो कि हुन पउलुस चो गोटमन ने मन लगाओ।
15 जिदलदांय हुन आपलो कुटुम चो लोग संगे बपतिस्मा धरली, तेबे हुन आमनमन के बिनाली, “तुमी मोके परभु चो सतपतेयालोर आय जानासाहास जाले, मोचो घरे एउन राहा।” आउर हुन आमके मना-बुजा करुन नीली।
पउलुस आउर सीलास जयल घरे
16 गोटोक हार, जिदलदांय आमीमन पारथना करतो ठान ने जाते रलु, तेबे बाटे आमके गोटोक कमेयीन मिरली। हुनचो थाने अगमगोट गोटेयातो देव-भूत समाउन रली। हुन अगमगोट सांगुन भाति आपलो मालिकमन काजे खुबे कमाउन देते रली।
17 हुन पउलुस आउर आमचो पाट बाटे एउन किरकिरुन-किरकिरुन बलुक मुरियाली, “ए मनुकमन सपाय ले बड़े महापरभु चो सेवा करतो लोग आत। एमन आमके मुक्ति पावतो चो गोट सुनायसोत।”
18 हुन खुबे दिन ले उसने करते रली। आउर पउलुस खुबे रीस होलो, आउर पाटकुती उलटुन भाति हुन देव-भूत के बललो, “मय तुके जीसु किरिस्त चो नाव ने हुकुम देयंसे, तुय एचोले निकरुन जा।” आउर देव-भूत हुदलीदांय निकरुन गेली।
19 जिदलदांय हुन कमेयीन चो मालिकमन दखला कि हुनमन चो कमानी चो आसा टुटली, तेबे हुनमन पउलुस आउर सीलास के धरुन भाति थाना गुड़ी ने मुखियामन लगे झीकते नीला।
20 आउर हुनमन के नियाव करतो बीतामन थाने नेउन भाति बलला, “एमन जहूदी आत, आउर आमचो सहर ने खुबे उदम-मतायसोत।
21 एमन आमचो नीतीमन चो उलटा करतो काजे सिखायसोत, जेके धरतोर आउर मानतोर आमी रोमीमन काजे नंगत नोआय।”
22 तेबे लोग-कुड़ा गोटकी मन होउन हुनमन चो उपरे ईला; आउर नियाव करतो बीतामन हुनमन चो फटई के चीरला आउर हुनमन के बेत-बड़गी संगे मारतो हुकुम दिला।
23 आउर बेत-बड़गी ने खुबे मारलो पाछे, हुनमन के जयल ने ढाकला; आउर जयल घर चो साएब के हुकुम दिला कि हुन, हुनमन के चलाक ने राखा-जागा करो।
24 असन हुकुम पावलोके जयल घर चो साएब हुनमन के भीतर चो बाकरा ने भोरुन दिलो आउर हुनमन चो पांयमन ने अड़गनामन जोंगड़ाउन दिलो।
25 अधगर राती होआ-हुई के पउलुस आउर सीलास पारथना करते आउर भजन गावते महापरभु चो जय-जय करते रला, आउर कयदीमन एके सुनते रला।
26 आउर एकदांय गोटोक बड़े भुंयडोल होली, इतरो जोर ले होली कि जयल घर चो बसकी हलून गेली आउर तूरते सपाय कपाटमन उगड़ुन गेली; आउर सपाय कयदीमन चो सिकरामन हिटून पड़ली।
27 जयल घर चो साएब सोवलो थान ले चेतलो आउर कयद-खाना चो कपाटमन उगाड़ी होलोर दखुन असन समजलो कि कयदीमन पराला। हुन खांडा झीकलो आउर आपने के मोरते मारतो बिचार करलो।
28 मानतर पउलुस खुबे जोर ले किरकिरुन बललो, “तुय आपने के नोकसान नी कर, कसनबलले आमी सपाय एताय आसुं!”
29 तेबे कयद-खाना चो साएब तूरते दीयामन आनुन भाति झटके भीतरे गेलो। हुन थरथरते पउलुस आउर सीलास के पांय पड़लो।
30 आउर हुनमन के बाहरे आनुन भाति बललो, “ए महापुरूमन, मुक्ति पावतो काजे मय काय करेंदे?”
31 हुनमन बलला, “परभु जीसु किरिस्त के सतपतेयाव, तेबे तुय आउर तुचो कुटुम चो सपाय लोगमन मुक्ति पाहासे।”
32 आउर हुनमन, हुनके आउर हुनचो कुटुम चो सपाय लोगमन के परभु चो गोट सुनाला।
33 हुन, हुदलीदांय राती-बेरा हुनमन के संगे नीलो आउर हुनमन चो घावमन धोअलो, आउर तूरते हुन आपलो कुटुम चो सपाय लोगमन संगे बपतिस्मा धरलो।
34 आउर हुनमन के आपलो घरे नेउन खादी-पीदी खुआलो। महापरभु के सतपतेयालो किरता हुन, आपलो सपाय कुटुम चो लोगमन संगे हरिक होलो।
35 जिदलदांय बियान पावली, तेबे नियाव करतो बीतामन, पाईक मुखियामन चो हाथे खबर पठाला कि हुन मनुकमन के छांडुन दियास।
36 जयल घर चो साएब ए गोट पउलुस के सांगलो। नियाव करतो बीतामन तुमीमन के छांडुन देतो काजे खबर पठालासोत, एबे निकरुन अस्तिर ले जाहा।
37 मानतर पउलुस बललो, “आमी रोम राज चो रयतमन आंव। हुनमन आमके बिन जमकापुरा* करलोर लोगमन चो पुरे मारला आउर जयल घरे भोरुन दिला। एबे काय, आमके लुकाउन भाति छांडसोत? असन नी होए, हुनमन एओत आउर आमके बाहरे नेओत!”
38 पाईक मुखियामन ए गोटमन के नियाव करतो बीतामन के सांगला आउर जिदलदांय हुनमन असन सुनला कि हुनमन रोम राज चो रयत आत, तेबे हुनमन खुबे डरला।
39 हुनमन ईला आउर हुनमन के सरन जुहार करुन भाति मना-बुजा करला, आउर हुनमन के बाहरे नेउन भाति गुहारला कि हुनमन सहर ले निकरुन जाओत।
40 पउलुस आउर सीलास, जयल घर ले निकरुन भाति लुदिया चो घरे गेला, हुनमन हुता भाईमन के भेट होला आउर हुनमन के अस्तिर चो गोट सांगला आउर हुन सहर ले जाते गेला।