हजार बरक चो राज
20
फेर मय गोटोक सरगदूत के सरग ले उतरतो के दखले, जेचो हाथे पेंदी नोहलो दराहां चो कुची आउर गोटोक बड़े सिकरा रये।
2 हुन सरगदूत, जुना बोड़ा-साप के, जोन इबलीस बललोने सयतान आय, धरुन हजार बरक काजे बांधुन दिलो,
3 आउर हुनके पेंदी नोहलो दराहां ने पकाउन ढाकुन दिलो आउर हुनचो थाने मोहर लगाउन दिलो, कसनबलले हजार बरक पुरोतले जात-जात चो लोगमन के फेर नी भरमाओ, एचो पाछे हुनके डंडिक बेरा काजे ढीलदे ची।
4 फेर मय, आसनगादी आउर हुन थाने लोगमन बसलोके दखले, आउर हुनमन के नियाव करतो हक दिला, मय हुनमन चो आत्मामन के बले दखले, जोनमन के जीसु चो गवई दिलो किरता आउर महापरभु चो बचन चो किरता पुजुन रओत। एमन हुन पसु चो आउर हुनचो मूरत चो सेवा नी करुन रओत, आउर हुनचो चीना आपलो कपारे नोहले हाथमन ने नी माराउन रओत, हुनमन जीव उठुन किरिस्त संगे हजार बरक होओतले राज करला।
5 एमन पईल जीव उठलो लोगमन आत। (जिदलदांय ले हजार बरक नी पुरे हुदलदांय ले मोरलोमन ले आदो लोग जीव नी उठोत।)
6 पईल जीव उठलो लोगमन धन-धन आउर पवितर आत, असन लोगमन उपरे दुसर मोरना चो काई बले हक नीआय, मानतर हुनमन महापरभु चो आउर किरिस्त चो पुजारी होदे आउर हुनचो संगे हजार बरक पुरत ले राज करदे।
सयतान के नास करतोर
7 जिदलदांय हजार बरक पुरेदे तेबे सयतान के छांडदे।
8 तेबे सयतान, मंजपुर चो चारो कुती चो जातमन के, बललोने गोग आउर मागोग* के भरमाउन लड़ई काजे रूंडा करेदे, जोनमन चो गनती समदूर चो बारु असन होयदे।
9 तेबे सयतान चो पलटन, सपाय मंजपुर ने बिगरुन पवितर लोगमन चो डेरा बललोने, महापरभु मया करतो जरूसलेम सहर, के चारो कुती ले छेकदे। मानतर सरग ले आईग उतरुन हुनमन के भसम करेदे।
10 हुनमन के गुपातो बीता इबलीस के गंधक ले जरतो आईग-कुंड ने पकाउन देदे, जोन थाने पसु आउर फंदी अगमजानी बले रओत, आउर हुनमन रात-मंजन जुग-जुग चो तकलीस ने डाहाल-बिकाल होते रदे।
पंडरा आसनगादी आउर सरासरी नियाव
11 फेर मय गोटोक बड़े पंडरा आसनगादी आउर हुता एकलो बसलोके दखले, हुनचो पुरे ले मंजपुर आउर बादरी पराला आउर हुनमन हजम-पता होला।
12 फेर मय नानी-बड़े सपाय मोरलो लोगमन के आसनगादी चो पुरे उबा होलो के दखले। कितापमन उगाड़ला आउर हुन कितापमन ने लिखलोर असन, मोरलोमन चो बुतामन हिसाब ने हुनमन चो नियाव करला। एचो पाछे आउर गोटोक किताप के उगाड़ला, हुन जीवन चो किताप आय।
13 समदूर, आपलो थाने मोरलो लोगमन के दिली, मोरना आउर पतालपुर बले आपलो थाने मोरलोमन के दिला, आउर हुनमन चो बुतामन हिसाब ले हुनमन चो नियाव करला।
14 मोरना आउर पतालपुर के आईग चो कुंड ने पकाउन दिला, ए आईग चो कुंड दुसर मोरना आय।
15 आउर जेचो नाव जीवन चो किताप ने लिखलोर नी मिरली हुनके आईग चो कुंड ने पकाला।