नवा बादरी आउर नवा मंजपुर
21
फेर मय नवा बादरी आउर नवा मंजपुर के दखले, कसनबलले आगे चो बादरी आउर मंजपुर नास होली, आउर समदूर बले नी रली
2 फेर मय पवितर सहर बललोने नवा जरूसलेम के सरग चो महापरभु ले उतरतो के दखले। हुन सहर, आपलो दुला काजे सिंगारी होलो दुली असन रये
3 फेर मय आसनगादी ले कोकई बड़े राग ले असन बलतोके सुनले, “दख, महापरभु चो डेरा मनुकमन चो मंजिगता आसे। हुन, हुनमन संगे डेरा पड़ेदे आउर हुनमन हुनचो लोग होदे आउर महापरभु खुदे हुनमन संगे रयदे आउर हुनमन चो महापरभु होयदे।
4 महापरभु, हुनमन के सपाय दुख-डंड ले छंडायदे, आउर एचो पाछे मोरना, दुख, गागा-बोगा आउर दुखा-सुखा नी होयदे। आगे चो गोट सरली।”
5 जोन आसनगादी ने बसुन रये, हुन बललो, “दख, मय सपाय के नवा करुन देयंसे” फेर बललो “एके लिख, ए बचन सत आउर पतेयातो लाईक आय”।
6 फेर हुन मोके बललो, “ए गोटमन पुरा होली। अलफा आउर ओमेगा बललोने मूर आउर सरासरी मय आंय। मय पियास होलोमन के जीवन चो पजरा-पानी ले फोकाहा ने पीयायंदे।
7 जोनमन जीतदे हुनमन ए तीजमन चो हकदार होदे आउर मय हुनमन चो महापरभु होयंदे आउर हुनमन मोचो बेटामन होदे।
8 मानतर डराहामन, नी पतेयातोमन, घिन-घिनामन, माने-मारामन, बेबिचारीमन, पंगनाहामन, मूरत सेवा-सासन करुमन आउर सबु फंदीमन के हुन गंधक ले जरतो आईग-कुंड ने भुगतमान मिरेदे; ए दुसर मोरना आय।”
नवा जरूसलेम
9 फेर सातझन सरगदूत लगे, सातठन सरासरी गराहां ले भोरलो सातठन बटकामन रये, हुनमन ले गोटोक सरगदूत मोचो लगे एउन बललो, “ए बाटे आव, मय तुके दुली, बललोने मेंडा-पिला चो बायले के दखायंदे।”
10 तेबे हुन मोके आत्मा ने गोटोक बड़े डेंग डोंगरी ने नीलो, आउर पवितर सहर जरूसलेम के सरग ले महापरभु लग ले उतरतो के दखालो।
11 महापरभु चो मयमा हुता रये आउर हुनचो उजर खुबे मोलबीती हीरा-मोती बललोने छुक-छुका जसब असन रये।
12 हुन सहर चो भाड़ा खुबे डेंग रये, हुनचो बाराठन कपाट आउर कपाटमन लगे बाराझन सरगदूत राखा रओत, आउर हुन कपाटमन ने इसराएलिमन चो बारा बंस चो नावमन लिखलोर रये।
13 बेर उदिया आउर बेर बुड़ती बाटे तीन-तीनठन कपाटमन रये आउर बेर उदिया चो उजा आउर डेबरी बाटे बले तीन-तीनठन कपाटमन रये।
14 सहर चो भाड़ा ने बाराठन पाया मंडालो पकनामन रये, हुता मेंडा पिला चो बाराझन पठालो-लोगमन चो नाव लिखलोर रये,
15 मोके गोटेयातो सरगदूत लगे, सहर आउर हुनचो कपाटमन आउर हुनचो भाड़ा के नापतो काजे गोटोक सोन चो गज रये।
16 हुन सहर चार खुटिया रये। आउर हुनचो लाम आउर ओसार जोंहरेया रये। हुन, गज ले सहर के नापलो तेबे साढ़े सात सव कोस* बललोने, बारा हजार फरलोंग होली, हुनचो लाम, ओसार आउर डेंग जोंहरेया रये।
17 सरगदूत हुन सहर चो भाड़ा के नापलोके मनुक चो नाप हिसाब ले, एक सव चवालीस हाथ ओसार होली।
18 हुनचो भाड़ा जसब चो बनुन रये, आउर सहर निरवा सोन चो रये जोन छुक-छुका कांच असन रये।
19 हुन सहर चो पाया सपाय बरन चो मोल पकनामन ले सजाउन रओत, पईल पाया पकना जसब चो, दुसर नीलमनी चो, तीसर लालमनी चो, चवथा मरकत चो,
20 पांचवां गोमेदक चो, छटवां मानिक्या चो, सातवां पीतमनी चो, आठवां पेरोज चो, नवा पुखराज चो, दसवां लहसनिए चो, इगारवां धुमरकांत चो, आउर बारवां जाकुत चो रये।
21 बाराठन कपाट बाराठन मोतीमन चो रये, गोटोक-गोटोक कपाट गोटोक-गोटोक मोतीमन ले बनुन रये। सहर चो सड़क छुक-छुका कांच असन निरवा सोन चो रये।
22 मय हुता कोनी मंदिर नी दखले, कसनबलले सबुले सकत चो परभु महापरभु आउर मेंडा पिला हुनचो मंदिर आय।
23 हुन सहर ने बेर आउर जोन चो उजर नी लागे, कसनबलले महापरभु चो मयमा ले हुन सहर ने उजर होयसे आउर हुनचो दीया, मेंडा पिला आय।
24 जात-जात चो लोग हुनचो उजर ने हिंडदे-बुलदे आउर मंजपुर चो राजामन आपलो-आपलो मयमा चो धन-दुगानी के हुता आनदे।
25 हुनचो कपाट अमदेया उगाड़ा रयसे, कसनबलले हुता राती नी होए।
26 जात-जात चो लोगमन धन-दुगानी आउर मान चो जाकमन हुता आनदे।
27 मानतर हुता कोनी काई असुद जाक नोहले घिन-घिना बुता करतो लोगमन नोहले फंद लोग, कोनी बरन ले ओलुक नी सकोत, मानतर हुनीमन ची ओलुक सकदे, जोनमन चो नाव मेंडा पिला चो जीवन चो किताप ने लिखलोर आसे।