19
एचो पाछे मय सरग ने बड़े भीड़ चिचियाउन असन बलते सुनले,
“हालेलुया, मुक्ति, मयमा आउर सकत
आमचो महापरभु चो आय।
2 कसनबलले हुनचो नियाव नंगत आउर सत आय,
हुन बड़े बेसवा के जोन आपलो बेबिचार ले मंजपुर के गुपाते रये,
हुनचो नियाव करुन आपलो कमेयामन चो लोउ चो पलटा धरलो।”
3 फेर दुसर हार हुनमन बलला,
“हालेलुया, हुनचो डसतो कुमला
जुग-जुग काजे उठते रयदे।”
4 तेबे मंडली चो चवबीस झन धरम-सियानमन आउर चारझन जीवमन आसनगादी ने बसलो महापरभु के डंडासरन करला आउर बलला, “आमीन, हालेलुया।”
मेंडा पिला चो बिया
5 तेबे आसनगादी ले गोटोक गोट सुनुक होली,
“ए आमचो महापरभु ले डरतो सपाय कमेयामन,
नानी-बड़े सपाय तुमी हुनचो बड़ाई करा।”
6 फेर मय बड़े भीड़ चिचियालो असन आउर घुमर गरजतो असन आउर बादरी घुड़ललो असन बड़े कोलार सुनले,
“कसनबलले सबुले सकत चो परभु
आमचो महापरभु राज करेसे, हालेलुया।
7 इआ, आमी हरिक आउर उदीम होउन हुनचो बड़ाई करुं,
कसनबलले मेंडा पिला चो बिया अमरलीसे
आउर हुनचो दुली आपने तियार होलीसे।
8 हुनके सुद आउर झकमकतो मकमल जोड़ा पींदतो काजे दिला।”
(पवितर लोगमन चो धरम बुतामन के हुन मकमल जोड़ा संगे कटारेसोत।)
9 तेबे सरगदूत मोके बललो, “लिख, धन-धन आत हुनमन, जेके मेंडा पिला चो बिया-भोज ने हागदिलासोत।” हुन फेर मोके सांगलो, “ए महापरभु चो सत बचन आय।”
10 तेबे मय सरगदूत के डंडासरन करतो काजे हुनके पांय पड़ले, मानतर हुन मोके बललो, “दख, असन नी कर, मय बले तुचो असन महापरभु चो कमेया आंय, जसन तुचो भाईमन बले जीसु चो गवई देयसोत। महापरभु के ची डंडासरन कर। कसनबलले जीसु चो गवई अगमजानीमन के अगमगोट सांगतो काजे उकसायसे।”
पंडरा घोड़ा ने बसलो सुआर
11 फेर मय सरग के उगाड़ी होलोर आउर हुता गोटोक पंडरा घोड़ा ने कोनी बसलोके दखले, जेके पतेयातो लाईक आउर सत आय बलसोत, हुन धरम ले नियाव आउर जुद करेसे।
12 हुनचो आंईक ढग-ढकतो आईग असन आय, आउर हुनचो मुंडे खुबे राज-मुकुट आसे, हुता गोटोक नाव लिखलोर आसे, जेके हुनके छांडुन आउर कोनी नी जाने।
13 हुन लोउ ले बुट-बुटा होलो फटई के पिंदलोसे, आउर हुनचो नाव “महापरभु चो बचन” आय।
14 सरग चो पलटन पंडरा घोड़ामन ने बसुन, पंडरा आउर सुद मकमल फटई पींदुन हुनचो पाट-पाट आसोत।
15 राज-राज चो लोगमन के मारतो काजे हुनचो टोंड ले गोटोक लागन खांडा निकरेसे। हुन लोहा चो राज-गुबा धरुन हुनमन उपरे राज करेदे, आउर जसन रस-कुंड ने अंगुर के रमंदसोत उसने हुन, सबुले सकत चो महापरभु चो रीस चो मंद-कुंड ने हुनमन के रमंदेदे।
16 हुनचो फटई आउर जांग ने, “राजामन चो राजा आउर परभुमन चो परभु” बलुन लिखलोर आसे।
17 फेर मय गोटोक सरगदूत के बेर ने उबलोर दखले, हुन बड़े राग ले चिचियाउन बादरी ने उड़तो सपाय चड़ईमन के बललो, “इआ, महापरभु चो बड़े भोज काजे रूंडा होआ।
18 जेचोले तुमी राजामन चो मास आउर मुखियामन चो मास आउर सकत बीतामन चो मास, घोड़ामन चो मास आउर घोड़ा सुआरमन चो मास आउर कमेयामन चो मास आउर छुट बीतामन चो मास, काय बड़े, काय नानी, सपाय लोगमन चो मास खाहा।”
19 फेर मय हुन पसु आउर मंजपुर चो राजामन आउर हुनमन चो पलटन के, हुन घोड़ा ने बसलो सुआर आउर हुनचो पलटन लड़तो काजे रूंडा होलोर दखले।
20 हुनमन पसु आउर हुनचो काजे जादु दखाउ बीता फंदी अगमजानी के धरला आउर हुन दुनो के जीवता-जीवता गंधक ले जरतो आईग चो कुंड ने पकाउन दिलो। कसनबलले हुन फंदी अगमजानी, जादु दखाउन लोगमन के गुपाउन रये, जोनमन थाने हुन पसु चो चीना रये आउर जोनमन हुनचो मूरत चो सेवा-सासन करते रओत।
21 बाचलो लोग हुन घोड़ा ने बसलो सुआर चो खांडा ले मोरला, जोन हुनचो टोंड ले निकरते रये आउर सपाय चड़ईमन हुनमन चो मास के मुहड़ा भागतले खादला।