Sura ni Suro Paulu anu napakatuka jumaa i kota
Roma
Pepuua lolita
Banimpia kota Roma iamo pomesoa nu poparenta kadatua Roma anu mokamumu maisi tana ntanina. Tunggaia ni Paulu mouki sura ei, bona mosomboki pampekiri nu toYahudi ai tau anu baria toYahudi anu simbela-mbela sira mepotuu si Kerisitu, lawi pesumbaa pekiri nu toYahudi, sira tau anu manoto nakenimpangulara Atura ni Musa, mpane lako i tau anu baria sira toYahudi anu mepotuumo si Kerisitu, bona inee ria pesumbaa nu pekirira baria sira simbela ai toYahudi i petotoki ni Pue. Ei nababei ni Paulu i topepotuu si Kerisitu anu i Roma, i rara mpopaguruna kono i puu nu patudu agama Sarani, lawi i Paulu baria mani ria tempona lau i Roma.
Tunggaia ni Paulu mouki sura ei pensani tasumba i Roma 1:17 anu manguli ewa ei, “Lako i Bambari Malompe, tainsani adiwa dala ni Pue Ala bona manusia manoto i petotokiNa. Naimba kita manoto nakenimpepotuuta si Ia.” I rara sura ei, nauli ni Paulu: Kita ope-ope tau anu madosa, malompe toYahudi malompe anu baria toYahudi. Nakeningkamadosata, sintoto kita nasuku ni Pue Ala (3:9-19). Nakeningkamaasi ni Pue Ala, Ia mosompo dosata i kamate ni Pue Yesu (3:24-25; 5:8). Mewali ane mepotuu kita si Yesu, i Pue Ala mosore kita lako i suku dosata, ai moimba kita manoto i petotokiNa (3:22, 26; 4:24-25; 5:1).
I rara sura ei, i Paulu mepatudu kono i tunggaia ni Pue Ala i toYahudi, anu rauli mbui toSaraeli (9:1–11:32). Nauli ni Paulu, ei-ei kaworira toYahudi baria sira mansumba katuwu malompe lawi baria sira madota mepotuu si Yesu (10:1-4). Nakenimpesapuakara, tebungkasimo dala bona mawori tau anu baria sira toYahudi mansumba katuwu malompe (11:11-15, 30-31). Tunggaia ni Pue Ala, bona kasopoana, “ope-ope toSaraeli ina tesorema lako i suku dosara” (11:26).
Kasopoana i Paulu mopaguru sira kono i babeia anu sintoto i topepotuu. Napatudu sira bona mampokaasi sira singka rangara (12:9-16, 13:8-14), mengkoru sira i topoparenta (13:1-7), ai mombeadai sira (14:1–15:13).
Isi nu Sura
1. Pepuua lolita (1:1-15)
2. Puu nu patudu: Dala nu manusia mewali manoto i petotoki ni Pue Ala (1:16-17)
3. Ope-ope tau madosa ai sintoto mansumba pesuku ni Pue Ala (1:18–3:20)
4. Kita mewali manoto i petotoki ni Pue Ala nakeningka napasuruta ni Yesu Kerisitu ai nakenimpepotuuta si Ia (3:21–5:21)
5. Nakenimposintuwuta ai Yesu, tepawiamo kita lako i kuasa dosa ai tasumba katuwu anu bou (6:1–8:39)
6. I Paulu mampololita kono i dala nu toYahudi ai tau anu baria sira toYahudi mewali tau ni Pue Ala i rara peparentaaNa (9:1–11:36)
7. I Paulu mopaguru kono i babeia anu sintoto si kita anu mepotuu si Yesu (12:1–15:13)
8. I Paulu motuntu pobagona mobambari Bambari Malompe i tau anu baria sira toYahudi (15:14-33)
9. I Paulu mopakatu tabea (16:1-27)