Sangangaa mengkoru kita i topoparenta
13
1 Ope-ope tau sangangaa mengkoru i topoparenta. Lawi baria ria topoparenta anu baria mansumba kuasa lako si Pue Ala. Ai topoparenta-topoparenta anu ria, napakanotomo ni Pue Ala. 2 Etumo mpane, tau anu moewa topoparenta, mosapuaka apa anu napakanoto ni Pue Ala, ai tau anu ewa etu babeiara, batena rasuku. 3 Ane malompe babeiata, baria kita maeka i topoparenta. Anu maeka, batena ngkida tau anu madaa babeiara. Mewali, sangangaa tababei babeia anu malompe, bona ratoia kita ai ntena kita maeka i topoparenta. 4 Lawi topoparenta etu, iamo batua ni Pue Ala anu mobago bona malompe katuwuta. Agaiana ane mobabei kita daa, batena maeka kita i topoparenta, lawi ria kuasara mesuku. Lawi topoparenta aretu, iamo batua ni Pue Ala anu mopabukei pesuku ni Pue Ala, i tau anu madaa. 5 Etumo mpane, sangangaa tapeulai parentara, lawi i rarata ei tainsani apa anu malompe. Mewali etumo anu tapeulai. Baria wule nakeningkaekata nasuku ni Pue Ala.6 Etumo mpane, sangangaa mobaiari kita asele i topoparenta, lawi topoparenta anu mampopolumako bagora etu, sira etu batua ni Pue Ala. 7 Mewali, nibaiari i topoparenta apa anu sintoto nibaiari si sira. Nibaiarimode asele i tau anu sintoto modoko asele. Mengkoru komi i tau anu sintoto nipengkorui. Niadai tau anu sintoto raadai.
Pepokaasi iamo mopabukei Atura ni Musa
8 Inee komi moinda i singka rangami, ngkalina ngkida moinda komi i rara pepokaasimi sadua ai sadua. Lawi ima ngkida anu mampokaasi singka rangana, mampeulaimo ia ope-ope Atura ni Musa. 9 Lawi i rara Atura ni Musa ria parenta anu ewa ei, “Inee mebualosi, inee mepopate, inee manangka, inee mampokailu apa anu ria i rangamu.” Ope-ope parenta ei ai parenta anu ntanina mbui, tapeulaimo ane mampeulai kita parenta anu sampangka ei, iamo, “Nipokaasi rangami ewa pampokaasimi wotomi saduduami.” 10 Tau anu mampokaasi tau ntanina, baria ia ina mobabei apa anu madaa i tau etu. Mewali tau anu mampokaasi rangana, iamo tau anu mabuke pangulana Atura ni Musa.
11 Ope-ope etu sangangaa nibabei, lawi niinsani mpuu apa anu sintoto nibabei i tempo ei. Mainga-inga komi inee maleta, lawi tempo ni Pue Ala mosorema kita gompimo, mpane lako i tempomi mepuu mampotuu i Pue ni banimpia. 12 Kawengi ina liumo, napasuru nu kamabaa anu ina dongkamo mai. Etumo mpane nipengkarookamode mobabei anu madaa, ai nibabei liliu babeia anu malompe moewa anu madaa. 13 Katuwumode komi i rara nu kamabaa. Inee komi mosusa-susa ai malangu-langu. Ai inee nibabei babeia anu merikati, inee komi mobabei babeia anu masala ba anu mangula peundea nu rarami anu madaa. Inee komi mobungka-bungka ai inee komi masina i singka rangami. 14 Nipogeaka i Pue Yesu Kerisitu anu mopakanoto, apa anu sangangaa nipobago. Ai inee nipeulai peundeami saduduami anu madaa.