Babeia nu topepotuu anu sintoto si Pue Ala
Popenomba anu sintoto si Pue Ala
12
1 Mewali poka-poka, nakeningkabosena asi ni Pue Ala si kita, sintoto mpuu komi mosusu katuwumi si Pue Ala mewali popenombami anu tuwu, anu magali, ai anu sintoto rapopenomba si Pue Ala. Lawi etumo penomba anu kamonso-monsona si Pue Ala. 2 Inee nipeulai babeia nu tau sira anu baria mampeulai peundea ni Pue Ala, agaiana nipogeaka i Pue Ala mopakabou pekirimi ai mobaliki babeiami, bona niinsani peundea ni Pue Ala anu malompe, anu sintoto ai peundeaNa, ai anu baria ria kamakurana.3 Mewali aku suroNa, nakeningkabula nu rara ni Pue Ala anu Nakiraka aku. Etumo mpane kukiraka komi lolita ei: Inee kita moimba wotota melumbu lako i kamonso-monsona. I rara nu pampekirita sangangaa mengkaiwoi kita i rara nu katuwuta saduduata, mangula sokana pepotuuta anu nakiraka kita ni Pue Ala sadua ai sadua. 4 Pandirina, i wotota ria maisi kirana, agaiana wotota sambua ngkida. Ope-ope kirana montani-ntani bunduna. 5 Ewa etu mbui kita anu mepotuu si Kerisitu: mawori kita, agaiana sambua ngkida kita i rara nu posintuwuta ai i Kerisitu, ai mosintuwu mbui kita ope-ope sadua ai sadua. 6 Sadua-sadua kita mansumba kapande anu montani-ntani, mangula kabula rara ni Pue Ala anu nakiraka ntoo kita. Etumo mpane, sangangaa tapopobundu kapande anu Nakiraka kita etu, i kalompe-lompena. Ane tau anu rakiraka kapande mopadongka lolita lako si Pue Ala, sangangaa mampopolumako ia bago etu mangula sokana pepotuuna. 7 Tau anu rakiraka kapande motulungi singka rangana, sangangaa motulungi mpuu ia tau ntanina. Tau anu rakiraka kapande mepatudu, sangangaa lako i rarana mpuu mepatudu. 8 Tau anu rakiraka kapande mopakaroso rara nu rangana, sangangaa napobago ai kabuke-bukena nu rarana. Ima anu rakiraka kapande mokira ba apa ngkida i rangana, sangangaa nakiraka sira lako i kabula nu rarana. Ima anu rakiraka kapande metadulakoi, sangangaa mewali mpuu ia tadulako anu madota. Ai ima anu rakiraka kapande motulungi rangana anu mesiasi, sangangaa natulungi sira lako i rarana anu matono.
Sangangaa malompe babeiata i ope-ope tau
9 Nipokaasi rangami lako i kabula nu rarami. Nitende babeiami anu madaa, nipatoro babeiami anu malompe. 10 Sangangaa mombepokaasi komi sadua ai sadua ewa topopoka, ai nipari-pari mampeilodongi moadai rangami. 11 Sangangaa madota komi mobago, inee komi malose, mobago komi si Pue ai kabuke-buke nu rarami. 12 Nipakatono rarami i rara nu pesarumakami si Pue Ala. Tetida komi i rara nu kapari, ai mekakae liliu komi. 13 Nitulungi sira tau anu sampepepotuu ai komi, anu ria i rara nu kamakura. Sangangaa matono komi modoko torare.
14 Ane ria sira tau anu mampopesiasi komi, niperade si Pue Ala bona Nawati sira. Inee sira nitunda-tunda. 15 Sangangaa matono komi simbela-mbela ai tau anu matono, motumangi komi simbela-mbela ai tau anu motumangi. 16 Mosintuwu kita ai rangata. Inee kita mampemabose, aginamo tapoguluka sira tau anu i woi katuwura. Ai inee kita mampopetoia i rangata, nakeningkapandeta.
17 Ane ria tau anu mobabei kadaa si komi, inee nisurungi ai kadaa. Agaiana nipekiri lompe-lompe, bona babeiami i tau etu, rapomalompe nu ope-ope tau. 18 Nipari-pari mobabei etu, bona mombesingkalompe komi ai ope-ope tau. 19 Poka-poka anu kupokaasi: Inee nisurungi kadaa nu singka rangami. Nipogeaka i Pue Ala mosuku sira. Lawi i rara Sura Ngkora Magali, nauli ni Pue Ala:
“Aku ngkida anu makuasa mosurungi.
Aku ngkida anu makuasa mosuku.” (Pepopainga 32:35)
20 Kamonsona:
“Ane iwalimi maoro, nipakoni sira.
Ane mangkamara sira, nipanginui.
Ane ewa etu nibabei, kasopoana ina mewali sira maea.” (Pepatudu ni Salomo 25:21-22)
21 Inee komi nanangi nu kadaa, agaiana sangangaa ninangi kadaa etu ai babeiami anu malompe.