Ria sira toSaraeli anu napopelabi ni Pue Ala bona mewali tauNa
11
1 Mewali, kupekune: Ba nasapuaka mpuu ni Pue Ala toSaraeli anu mewali tauNa ni banimpia? Manoto baria! Lawi aku ei, toSaraeli mbui aku. Aku, pemulea ni Burahima lako i tina nu toBenyami. 2 I Pue Ala baria mosapuaka tau anu roomo Napelisi lako i mpolinguruna. Nikaendo tunturaka ni nabi Elia anu teuki i rara nu Sura Ngkora Magali, adiwa i Elia mosalai toSaraeli i lio ni Pue Ala, anu manguli:3 “Pue, toSaraeli mampopatemo nabi-nabiMu,
ai mogero mbui sira watu potunua popenombaki si Iko.
Batena ngkidamo aku anu tuwu,
agaiana aku, batena rakadelo mbui rapopatera!” (1 Datu-Datu 19:10,14)
4 Mewali ba nikaendo pesono ni Pue Ala si Elia, anu manguli, “Ria mani pitu nsobu dua tau anu baria mosapuaka Aku. Sira aretu, batena kiraKu, baria sira sambela menomba i anitu anu raulira Baal.” 5 Ei-ei, ewa etu mbui: naudapae mawori toSaraeli anu baria mepotuu si Yesu, agaiana ria mani basangkia dua anu napelisi ni Pue Ala nakeningkabula nu raraNa. 6 Mewali Napelisi sira, nakeningkabula nu raraNa, baria nakeningkalompe nu babeiara. Lawi, ane rapana Napelisi sira nakenimposurungiNa babeiara anu malompe, kabula rara ni Pue Ala etu, baria pensani rauli kabula nu raraNa.
7 Mewali, tainsani: ToSaraeli, baria mansumba apa anu rakadelora. Agaiana tau anu napelisi ni Pue Ala ngkida anu mansumba, nauda saudi ngkida sira. Anu ntanina mengkabatu sira i peronde ni Pue Ala, 8 lawi i rara Sura Ngkora Magali teuki ewa ei,
“I Pue Ala mopakatusumo rarara.
Natuko matara ntena sira mangita dala anu mamonso.
Natuko talingara ntena sira mangepe bambari anu mamonso duduuna ei-ei.” (Pepopainga 29:4, Yesaya 29:10)
9 Ewa etu mbui, anu nauli ni Daudi kono i singka toYahudina anu mewali iwalina:
“O Pue, kuperade bona posusa katono nu rarara etu, mopakanawu sira,
ai mewali kalolu anu rakanawuira duduuna marene sira,
bona tesurungi babeiara anu madaa.
10 Nupakadedi petotokira ntena sira mangita dala anu mamonso.
Nupakasusa sira, bona mabungku sira mokolo kaparira duduuna kasae-saeana.” (Dulua Petoia 69:23-24)
ToSaraeli manawu tau ntanina tesorema
11 Mewali, mekune mpesola mbui aku: Awetu toYahudi manawu nakeningkabariana tetida pepotuura si Yesu, ba etu anu mampopogaa sira ai i Pue duduuna kasae-saeana? Monso-monso baria! Agaiana nakeningkabariara tetida, etumo mpane tau anu baria sira toYahudi nasorema sira ni Pue Ala. Etumo anu rapokakoi rara nu toYahudi i tau anu baria toYahudi. 12 Nakeningkabariana tetida pepotuu nu toYahudi si Yesu, etumo mpane tau anu baria sira toYahudi mansumba pewati lako si Pue Ala. Agaiana tapetandaka tapekiri, ane tetida mpesola sira mangula i Pue Yesu; manotomo melumbu mpii kabosena pewati anu nakiraka ni Pue Ala i ope-ope tau i dunia ei!
13 Anu natunggai nu pololitaku iamo pokaku anu baria komi toYahudi. Aku ei, suro ni Pue Yesu anu Natudu mobambari Bambari Malompe si komi anu baria komi toYahudi. Bagoku ei lako i raraku mpuu mampobago, mpane lako i bago anu ntanina. 14 Lako i bagoku ei, kusarumaka kaina riana sira singka toYahudiku, anu mangita komi anu baria toYahudi anu mepotuumo si Pue Yesu, duduuna masina rarara ai mampenoka mbui sira mepotuu si Ia, bona tesorema sira lako i suku nu dosara. 15 Lawi tempona i Pue Ala baria modoko toYahudi, ni tempo etumo tebungkasi dala i ope-ope tau i dunia, bona mosintuwu sira ai i Pue Ala. Apa mani ane i Pue Ala modoko mpesola toYahudi, ina melumbu porasi nu tau i dunia. I tempo etu, pensani sira rapandiri ewa tomate anu tuwu mpesola.
16 Ane tau mosusumo sangkira roti anu mpolinguruna si Pue Ala, kamonsona ope-ope roti etu, Iamo tumpuNa.a Ai ane rari nu kau saitun, i Pue Ala tumpuNa, manotomo daana mbui i Pue Ala tumpuNa. 17 ToYahudi pensani sira rapandiri ewa kau saitun anu rakadipuraka, santongo daana ralaliki, mpane i polalikiana etu, i Pue Ala mopataka daa nu kau saitun anu baria rakadipuraka, daa etu marudu lawi mansumba pangkoni lako i rari nu kau saitun anu rakadipuraka. Daa anu Napataka etu, iamo komi anu baria toYahudi. Rapataka komi i se etu, bona mansumba komi sinangka anu malompe lako i katuwu nu posarani nu toYahudi.
18 Etumo mpane poka, inee nipekiri i wongko mani komi mpane lako i toYahudi anu rapandiri ewa daa anu ralaliki etu. Nikaendo, komi wule daana ngkida. Ai baria daa anu mokira pangkoni i rari, agaiana rarida anu mokira pangkoni i daana. 19 Agaiana komi poka, pekiri ina manguli komi, “Io, agaiana daa-daa aretu ralaliki bona pensani aku rapataka i kauna!” 20 Mamonso mpuu poka, agaiana nikaendo, baria sira radoko lawi baria sira mepotuu. Komi, radoko komi lawi mepotuu komi. Mewali, inee komi mampemabose, aginamo mengkaiwoi komi ai mainga-inga komi, lawi ina Nalaliki komi ane mesapuaka komi. 21 Mewali, mogaloda toYahudi anu ewa daa nu kau saitun anu lako mpolingurunamo, baria makangki-kangki i Pue Ala molaliki, apa mani komi anu wule rapataka. 22 Etumo mpane, nipeita adiwa kamaasi ni Pue Ala, ai baria pensani rabesoi pesuku anu Nabotusimo. Mewali manotomo ka Nasukuna tau anu baria tetida meula si Pue Yesu. Agaiana i Pue Ala maasi si komi ane mepotuu liliu komi i asiNa etu. Agaiana ane baria komi ewa etu, baria komi ina Nadoko!
23 Ane toYahudi anu baria tetida meula si Yesu etu menonso lako i pesapuakara, ina napopentaka mpesola sira ni Pue Ala. Lawi, i Pue Ala ria kuasaNa mopataka mpesola sira i woto nu kau. 24 Mewali ane komi anu baria toYahudi iamo ewa daa nu kau saitun anu baria nakadipuraka ni Pue Ala pensani rapataka i kau saitun anu nakadipuraka ni Pue Ala. Apa mani toYahudi anu rapandiri ewa daa-daa nu kau saitun anu nakadipuraka ni Pue Ala. Manotomo kabariana mapari i Pue Ala mopataka mpesola sira i puu nu kau saitun anu Nakadipuraka.
Pepokaasi ni Pue Ala i ope-ope tau
25 Pokaku sampepepotuuku! Kupenoka mangulika komi, apa tunggaia ni Pue Ala anu baria mani rainsani nu tau ni banimpia. Kuulika komi ei, bona inee komi mampemabose. Bona niinsani, ei-ei sanggaa toYahudi makoo rarara agaiana etu baria masae, duduuna sondo kawori nu tau anu baria sira toYahudi mepotuu si Yesu sintoto ai tunggaia ni Pue Ala. 26 Ni tempo etu, tebungkasimo dala i ope-ope toYahudi ina tesorema sira lako i suku dosara, bona tepabukei apa anu teuki i rara Sura Ngkora Magali, ewa ei:
“Sambela tempo,
Datu Topesorema ina dongka lako i Sion mai,
ai mopakarao ope-ope anu madaa lako i pemulea ni Yako
bona magali katuwura. (Yesaya 59:20-21)
27 Etumo dandiKu si sira.
I tempo etu luwu, Kuampuni dosara.” (Yeremia 31:33-34)
28 Ei-ei toYahudi mewali sira iwali ni Pue Ala, lawi baria sira madota mampotuu Bambari Malompe. Lako i se etumo, morasi komi anu baria toYahudi. Agaiana nauda ewa etu, toYahudi etu batera napokaasi liliu ni Pue Ala, lawi siramo anu Napelisi ni banimpia mangula dandiNa i ulububura. 29 Lawi ane i Pue Ala mopelisi ai mowati tau, apa anu Nababeimo, baria ina Nadii mpesola. 30 Ni banimpia, komi anu baria toYahudi, baria komi tetida meula si Pue Ala. Agaiana ei-ei i tempora toYahudi baria tetida meula si Pue Ala, i tempo etumo komi anu baria toYahudi mansumba pepokaasi ni Pue Ala. 31 Ewa etu mbui sira toYahudi, ei-ei baria sira tetida meula si Pue Ala. Etumo mpane komi anu baria toYahudi, mansumba pepokaasi ni Pue Ala. Agaiana sambela tempo, toYahudi aretu, ina mansumba pepokaasi ni Pue Ala, simbela ewa anu nisumba. 32 Lawi i Pue Ala mampogeakamo ope-ope manusia i rara nu kabariara tetida si Ia, bona pensani Ia mopatongawa asiNa i ope-ope tau.
Petoia si Pue Ala
33 Maruminsi mpuu kalompe ni Pue Ala! Matopa ai manoto mpuu raraNa! Ima anu pensani moparesa tunggaiaNa? Ima anu manginsani adiwa dalaNa mobago?
34 I rara Sura Ngkora Magali teuki ewa ei, “Imapae anu manginsani pekiri ni Pue Ala?
Imapae anu pensani mokiraka Ia patudu?” (Yesaya 40:13)
35 “Imapae anu pensani mokiraka ba apa ngkida si Pue Ala,
mpane pensani mamperade surungina?” Baria ria! (Ayubi 41:11)
36 Lawi i Pue Ala anu mampopewali sinangka-nangkana. Ope-ope anu ria, puuna lako si Pue Ala, ai Ia ngkida anu rapakabose. Toiamo i Pue Ala duduuna kasae-saeana! Amin!