10
1 Pokaku sampepepotuu! Kupenoka mpuu bona toYahudi mansumba mbui sira pesorema lako si Pue Ala. Etumo mpane, kupekakaeka liliu sira si Pue Ala. 2 Kuinsani mpuu karuminsina katesuweki nu rarara i peulara si Pue Ala, agaiana baria rainsanira. 3 Lawi raundera mangula dalara saduduara, etumo mpane baria rainsanira adiwa dala ni Pue Ala, mampopewali manusia manoto i petotokiNa. Mewali baria sira mengkoru i dala anu natudoka sira ni Pue Ala etu. 4 Kamonsona, ope-ope anu natunggai nu Atura ni Musa, napabukeimo ni Kerisitu. Mewali ope-ope tau anu mepotuu si Kerisitu, manotomo i petotoki ni Pue Ala.Ima ngkida anu mepotuu si Yesu tesorema sira
5 Ni banimpia nauki ni Musa, ewa ei:
“Ima ngkida anu mampeulai Atura etu, ina tuwu lako i Atura etu.” (Atura Penomba 18:5)
6-7 Agaiana dala bona mewali manoto kita i petotoki ni Pue Ala, wule nakenimpepotuuta. Ewa anu teuki i rara Sura Ngkora Magali ewa ei:
“Inee nuuli i raramu:
‘Ima anu ina mempone lau i suruga?
Ima anu ina mendolu lau i pearia nu tomate?’”
Lawi baria kita anu sangangaa mempone lau i suruga bona mampopendolu mai i Kerisitu. Baria mbui kita anu sangangaa mendolu lau i pearia nu tomate, bona mopatuwu mpesola i Kerisitu.
8 Nauli mbui ni Musa ewa ei:
“Bambari ni Pue gompi mpii si iko.
Bambari etu pensani nupopololita ai nupairara.” (Pepopainga 30:12-14)
Bambari anu kipadongka i ope-ope tau etu, iamo bambari pepotuu. 9 Ane nipangaku i pololitami, “I Yesu iamo i Pue,” ai ane nipotuu i rarami, i Pue Ala mopatuwu mpesola i Yesu lako i kamate, batena ina tesorema komi lako i pesuku nu dosa. 10 Nakeningka tapotuuna i Yesu lako i rarata, mewali naimba kita manoto i petotokiNa. Ai nakeningka tapangakunamo i Yesu i pololitata, mewali Nasoremamo kita lako i suku dosata. 11 I rara Sura Ngkora Magali, ria teuki ewa ei:
“Ima-ima anu mepotuu si Ia,
baria ia ina menonso.” (Yesaya 28:16)
12 Ngkora etu batena rapalau i ope-ope tau, lawi baria ria posisalana toYahudi ai tau anu baria toYahudi. I Pue Ala iamo Pue nu ope-ope tau, Ia mokiraka pewati anu maisi mpii i ope-ope tau anu merade tulungi si Ia. 13 Lawi i rara Sura Ngkora Magali, teuki ewa ei:
“Ima ngkida anu merade tulungi moronde i Pue, batena tesorema sira.” (Yoel 2:32)
14 Agaiana adiwa kapensanina tau merade tulungi moronde i Pue, ane baria mani sira mepotuu? Ai adiwa pepotuura si Pue, ane baria mani sira mangepe bambari kono si Ia? Ai, adiwa karaepera kono si Pue, ane baria ria anu mobambarika sira. 15 Ai adiwa katebambarina, ane baria ria anu ratudu? Ewa etu anu teuki ni banimpia i rara Sura Ngkora Magali:
“Malompe mpuu kadongka nu tau sira, anu mangkeni bambari malompe lako si Pue Ala!” (Yesaya 52:7)
16 Agaiana baria ope-ope tau anu mampotuu Bambari Malompe etu. Ria lolita ni nabi Yesaya ni banimpia anu manguli:
“Pue, ima anu mepotuu i pobambariki?” (Yesaya 53:1)
17 Etumo mpane, mepotuu sira tau lawi mangepe sira bambari, ai bambari anu raepera etu kono si Yesu Kerisitu.
18 Agaiana mekune aku: Baria manipae raepe nu toSaraeli bambari etu? Manotomo karaeperamo! I rara Sura Ngkora Magali teuki ewa ei:
“Bambari etu, tesawukamo i sumalele dunia.
Ngkora etu, rapadongkamo i ope-ope tau.” (Dulua Petoia 19:5)
19 Kupekune mpesola: Mamonsopae kabariana mani rainsani nu toSaraeli? Molentano mpolinguruna, raeperamo lolita ni Pue Ala anu napadongka ni Musa ewa ei,
“Komi toSaraeli,
ina Kupakasina rarami i tau anu baria sira tauKu
ai ina Kupakarumpu rarami i tau ntanina sira anu madoio.” (Pepopainga 32:21)
20 Ai pebai mpuu i nabi Yesaya, lawi ia mopadongka Ngkora ni Pue Ala ewa ei:
Nauli ni Pue Ala:
“Tau anu baria mangkadelo Aku,
sira anu mansumba Aku.
Ai Kupopainsanikamo i tau anu baria sira mekune kaimana Aku.” (Yesaya 65:1)
21 Agaiana kono i toSaraeli, i Pue Ala manguli ewa ei:
“Nauda saeoa Kuona paleKu bona modoko sira,
mosapuaka sira Aku lawi makoo liliu rarara.” (Yesaya 65:2)