ToSaraeli ai Bambari Malompe
I Pue Ala ai tauNa anu tepelisi
9
1 Mamonso anu kuuli ei lako i raraku mpuu. Baria aku modongko. I Kerisitu anu manginsani raraku, ai noto nu raraku ei nasabiki nu Inosa Magali. 2 Mapari mpuu kuepe ai mapari mpuu raraku. 3 Ane kepensani, aginamo aku anu ragane ai ragaaki aku lako si Kerisitu, asala pokaku toYahudi rapawia sira lako i suku nu dosara. 4 Lawi toYahudi iamo toSaraeli anu mansumba maisi pewati lako si Pue Ala, lawi siramo anu napelisi ni Pue Ala ai Napopewali anaNa saduduaNa. I Pue Ala mopatongawaka sira kuasaNa, ai nakenimpodandiNa i toYahudi ni banimpia, ria posintuwura ai Ia. Nakiraka sira AturaNa ai mopatuduka sira ada penombaa. Maisi dandi ni Pue Ala anu Nakiraka sira. 5 Sira etu, pemulea ni Burahima, i Isaki ai i Yako, ulububuta ni banimpia anu napelisi ni Pue Ala. Ai i Kerisitu anu mewali manusia, rapoanaka mbui lako i pemulea nu toYahudi. Kuasa ni Kerisitu melumbu lako i sinangkana. Tetoiamo i Pue Ala duduuna kasae-saeana. Amin!6 Baria tunggaiaku manguli dandi ni Pue Ala baria ina mewali; agaiana baria ope-ope toSaraeli anu napelisi ni Pue Ala. 7 Ai baria mbui ope-ope pemulea ni Burahima, teimba ana ni Burahima, lawi nauli ni Pue Ala si ia, “Wule pemulea anu lako si Isaki ngkida, anu rauli pemuleamu.” 8 Lempona: Baria ope-ope pemulea ni Burahima, anu mewali ana ni Pue Ala. Agaiana wule pemulea ni Burahima anu nidandi ni Pue Ala, anu mewali ana ni Pue Ala. 9 Ai eimo dandi ni Pue Ala si Burahima anu manguli, “Sasio mbula mani, mesola mpesola Aku mai, ai i tempo etumo luwu, i Sara towawinemu ina moana sadua anakoi tomoane.”
10 Anana etu iamo i Isaki, ai baria wule etu ngkida, katongawaana mpii i Ribka mampoanaka rodua anakoi tomoane lako i sadua tuamara, iamo i Isaki ulububuta, anu napelisimo ni Pue Ala. 11 Lako baria mani anakoi rodua aretu rapoanaka, napakanoto amimo ni Pue Ala i anakoi aretu. Pampelisi ni Pue Ala etu, baria tepakanoto lako i apa anu pensani nababei nu tau, agaiana tepakanoto i peronde ni Pue Ala saduduaNa. Lawi i tempona ana ni Ribka rodua tomoane aretu baria mani pensani mobabei apa anu malompe ba anu madaa, 12 nauli amimo ni Pue Ala si Ribka, “Anu torapowutu ina morora anu torapotoi.” 13 I rara Sura Ngkora Magali, teuki ewa ei: “I Yako Kupelisi, agaiana i Esau baria.”
14 Ane ewa etu, apa anu ina tauli ei-ei? Ba baria manoto i Pue Ala? Manotomo kanoto ni Pue Ala! 15 Nikaendoda lolita ni Pue Ala si nabi Musa ni banimpia, anu manguli:
“Aku anu mobotusi!
Ba ima ngkida anu Kuunde Kukiraka kabula nu raraKu ina Kukiraka,
ai ba ima ngkida anu Kuunde Kukiraka pepokaasiKu ina Kukiraka.” (Pensuwu nu toSaraeli 33:19)
16 Mewali, popakanoto ni Pue Ala etu baria mampeulai peundea ai babeia nu manusia, agaiana wule lako i kalompe ni Pue Ala ngkida. 17 Lawi ria teuki i rara Ngkora ni Pue Ala kono si Firaun, ewa ei, “Kupopewali iko datu, agaiana sampangka ngkida tunggaiaKu, iamo bona mampoliungi iko, Kupopeitaka kuasaKu, duduuna sangaKu rapomabose i sumalele dunia.” 18 Mewali, tainsani mpuu: ane i Pue Ala motudoka pepokaasiNa i sadua tau, ba mopakakoo rara nu sadua tau, etu mewali mangula peundeaNa saduduaNa.
19 Mewali poka-poka, ina niulika aku. “Ane ewa etu, mangkiada i Pue Ala mosalai mani manusia? Bariapae niinsani, mogaloda sadua tau, baria pensani mosomboki peundea ni Pue Ala?” 20 Imada komi manusia, mpane pebai komi mobesoi i Pue Ala? Pensanipae anu rateru mangulika i topoteru ia, “Mangkiada mpane nuteru aku ewa ei?” 21 Rapana: topobabei kura, pensani nababei kura etu, sintoto ai peundeana saduduana. Lako i sangkamumua tana pulu, pensani ia mobabei roogu kura; saogu rapobunga-bunga mpane saogu rapake eo-eona.
22 Ewa etu mbui, i Pue Ala batena makuasa mopatongawa karumpuNa ai kamakuasaNa i apa ngkida anu sintoto mansumba karumpuNa, anu Napatimama bona mepakaropu. Agaiana kamonsona i Pue Ala ai kamanoaNa, mosombo pesukuNa i apa ngkida anu sintoto mansumba pesukuNa etu. 23 Ai nakeningkamanoaNa etumo, mpane tongawa kabose nu peawaNa i apa ngkida anu Napokaasi ai anu Napatimama amimo bona mansumba peawaNa. 24 Kita eimo anu Napelisi mansumba asiNa etu, ai baria wule toYahudi ngkida, agaiana ria mbui anu baria toYahudi.
25 I rara sura ni nabi Hosea, i Pue Ala manguli ewa ei:
“Tau anu baria sira tauKu
ai anu baria manginsani asiKu,
ina Kuronde sira mewali tauKu
ai ina Kupopeitaka sira asiKu.” (Hosea 2:22)
26 “I pearia i tempora raulika,
‘Komi baria kiraKu.’
I se etu tau aretu ina rauli ana ni Pue Ala sira,” (Hosea 1:10)
27 Ai i nabi Yesaya mololita kono i toYahudi ewa ei,
“Naudapae kawori nu toSaraeli
ewa kaisi nu wungi i wiwi nu tasi.
Agaiana, saudi ngkida sira anu ina mansumba katuwu malompe.
28 Lawi bariamo masae
I Pue ina mobotusi kara-kara
nu ope-ope anu ria i dunia.” (Yesaya 10:22-23)
29 Ria mbui lolita anu nauki ni nabi Yesaya ewa ei,
“Ane i Pue Ala anu makuasa, baria mampopelabika kita pemulea,
keope kita maropu,
ewa tumpu kota Sodomo ai Gomora ni banimpia.” (Yesaya 1:9)
ToYahudi baria sira madota mepotuu si Yesu, etumo mpane baria sira mewali kira ni Pue Ala
30 Mewali ewa ei: Tau anu baria sira toYahudi, baria sira mangkadelo dala bona mewali sira manoto i petotoki ni Pue Ala. Agaiana ria sira santongo, anu mewali manoto i petotoki ni Pue Ala. Nakenimpepotuura manoto sira i petotoki ni Pue Ala. 31 Agaiana toSaraeli, masaemo sira mopari-pari bona mewali sira manoto i petotoki ni Pue Ala nakenimpeulara i Atura ni Pue Ala, anu napadongka ni Musa, agaiana baria rasumbara anu rakadelora etu. 32 Baria rasumbara etu, lawi mesarumaka ngkida sira i babeiara saduduara, baria sira mesarumaka si Pue Ala. Tesube sira i watu katesubea. 33 Kono i watu katesubeara etu, iamo Datu Topesorema, anu nauli ni Pue Ala, ewa ei,
“Peita:
Kuboli sambua watu i Bulu Sion,
mawori tau tesube i watu etu, mpane madungka.
Agaiana ima-ima anu mepotuu si Ia,
baria ia ina menonso.” (Yesaya 28:16)