Inosa Magali mopawia kita lako i kuasa dosa bona mangula kita peundea ni Pue Ala
8
1 Etumo mpane ei-ei, bariamo ria pesuku i tau anu mosintuwu ai i Yesu Kerisitu. 2 Lawi kuasa nu Inosa Magali anu mampopewalimo kita mosintuwu ai i Yesu Kerisitu, anu mopawiamo kita lako i kuasa dosa ai kamate. 3 Baria kita pensani tepawia lako i kuasa dosa nakenimpangulata Atura ni Musa, lawi baria tabuku mampeulai Atura ni Musa lako i rosota saduduata, agaiana ria anu nababei ni Pue Ala anu melumbu lako i kuasa Atura ni Musa etu, iamo i Pue Ala monangi kuasa dosa anu mokuasai rara nu manusia i tempoNa motudu Ana saduduaNa, mai i dunia mewali manusia. AnaNa etu mosusu wotoNa bona rapopate mosuru dosa manusia. 4 Tunggaia ni Pue Ala mobabei etu, bona mewali kita tau anu manoto i petotoki ni Pue Ala, sintoto ai anu natunggai nu Atura ni Musa. Ai tuwu kita mangula Inosa Magali baria mampeulai peundea nu manusia.5 Tau anu tuwu sira mampeulai peundea nu rarara anu madaa, batena mampekiri liliu sira kono i peundea nu rarara etu. Agaiana tau anu tuwu liliu sira i rara nu Inosa ni Pue Ala, batena mampekiri liliu sira apa anu naunde nu Inosa ni Pue Ala. 6 Ane pampekirimi nakuasai nu peundea nu manusia, wuana iamo kamate. Agaiana ane pekirimu nakuasai nu Inosa ni Pue Ala, wuana iamo katuwu anu mosintuwu ai i Pue Ala. 7 Tau anu mangula sira peundea nu manusia anu madaa, moewa sira i Pue Ala, lawi baria sira mampeulai Atura ni Pue Ala, ai kalawiana baria pensani rapeulaira. 8 Tau anu mangula peundea nu rarara anu madaa, baria rabukura mopakatono rara ni Pue Ala.
9 Agaiana komi poka, bariamo komi nakuasai peundea nu rarami anu madaa. Agaiana nakuasaimo komi nu Inosa Magali. Ane tau anu baria ria Inosa Magali i rarara, baria sira tau ni Kerisitu. 10 Agaiana komi, ane riamo i Kerisitu i rarami, nauda wotomi ei ina mamate nakeni nu dosa, agaiana Inosa Magali mokiraka katuwu si komi, lawi manotomo komi i petotoki ni Pue Ala. 11 I Pue Ala mopatuwu mpesola i Yesu Kerisitu nakeningkamakuasa nu Inosa Magali, ai Inosa Magali etu anu meari i rarami. Mewali, nauda ina mamate wotomi ei, i Pue Ala batena mopatuwu mpesola wotomi nakeningkamakuasa nu Inosa Magali anu meari i rarami.
12 Mewali poka, kita sangangaa mampeulai peundea ni Pue Ala, baria kita mampeulai peundea nu manusia. 13 Lawi ane nakuasai komi peundea nu manusia anu madaa, ina mamate komi. Agaiana ai kuasa nu Inosa Magali, batena nipopate liliu babeiami anu mampopewali komi madosa, mewali ina tuwu komi.
Nakenimpobago nu Inosa Magali tainsani ka kitana ana ni Pue Ala
14 Ima-ima anu nanini nu Inosa Magali, siramo ana ni Pue Ala. 15 Lawi Inosa anu nakira ni Pue Ala si komi, baria mampopewali komi batua mpane tuwu komi i rara nu kaeka. Agaiana Inosa Magali etu, mampopewali komi ana ni Pue Ala. Ai nakenimpobago nu Inosa Magali, pebaimo kita moronde i Pue Ala, “Umaku.” 16 Ai Inosa Magali anu ria i rarata etumo, anu mopatongawakamo kita, ka kitanamo ana ni Pue Ala. 17 Mewali, ane ana ni Pue Ala mpuu kita, sintoto mbui kita mansumba tibota anu napatimamaka kita ni Pue Ala, simbela ewa i Kerisitu anu mansumbamo tibo etu. Ane i dunia ei mantodisa kita ewa i Kerisitu, agaiana ina rapopeawa mbui kita simbela-mbela ai Ia.
Peawa anu ina tasumba
18 Agaiana mangula pesumbaa nu pekiriku, ope-ope pantodisa anu tasumba ei-ei, baria sintoto ai peawa anu ina rapatongawa si kita i eo anu ina mai luwu. 19 I tempo ei, sinangka isi dunia mangingimo mampegia impia tempona i Pue Ala mopatongawa kamonsona ima sira anaNa. 20 Lawi sinangka anu Nateru, Napopewalimo baria mobundu, baria nakenimpeundea nu dunia, agaiana mangula peundea ni Pue Ala. Naudapae ewa etu, ria mani pesarumakaa ei: 21 Sambela tempo sinangka anu Nateru etu, ina Napawia lako i kuasa anu mopakarene ai ina Napawia mbui lako i kamate mpane mesua i rara peawa ni Pue Ala simbela-mbela ai kita anaNa.
22 Lawi tainsani poka, duduuna ei-ei sinangka anu i dunia ei meraroa mpii nakenimpantodisara, simbela ewa sadua towawine mantodisa kapari i tempona moana. 23 Ai baria wule dunia ei ngkida anu mantodisa. Kita mbui topepotuu meraroa i rarata, tongota mani mampegia tempo ni Pue Ala mopawia wotota lako i kamate, ai mampopewali kita AnaNa. Mepotuu kita i pesarumaka etu, lawi modokomo kita Inosa Magali lako si Pue Ala, mewali pokiraNa anu mpolinguruna si kita. 24 Pesarumaka etu, tadoko i tempota nasorema ni Pue Ala. Agaiana ane apa anu tasarumaka etu tadokomo, etu bariamo mewali pesarumaka. Lawi imapae anu mesarumaka mani i apa anu nadokomo? 25 Agaiana ane mesarumaka kita i apa anu baria mani tadoko, sangangaa tapegia i rara nukamanoa.
Inosa Magali motulungi kita i pekakaeta
26 Ewa etu mbui, Inosa Magali motulungi kita i rara nu kamaledeta. Lawi baria mpuu tainsani apa anu sangangaa tauli i rara nu pekakaeta. Agaiana Inosa Magali mopadongka i kamonso-monsona pamperadeta si Pue Ala anu melumbu lako i ka tabukuna tapololita. 27 Ai i Pue Ala anu manginsani rara nu ope-ope tau, ai manginsani mbui tunggaia nu Inosa Magali. Lawi Inosa Magali etu, mampekakaeka kita tau ni Pue Ala, mangula peundea ni Pue Ala.
I sinangka-nangkana i Pue mokadipuraka mpane moparia anu malompe si kita
28 Lawi tainsani ei-ei, i Pue Ala mampopobundu sinangka anu mewali i rara nu katuwuta, bona mopadongka kalompe si kita anu mampokaasi i Pue Ala, iamo kita anu teronde sintoto ai tunggaia ni Pue Ala. 29 Lawi lako ni mpolinguruna, i Pue Ala manginsani kaimana tauNa. Ai kita ei, Napakanotomo bona mewali kita simbela ewa i Yesu Kerisitu, bona i Yesu Kerisitu mewali anaNa anu Torapowutu, lako i ope-ope pokaNa anu mawori. 30 Ewa etumo i Pue Ala moronde sira anu Napakanotomo lako ni mpolinguruna; ai sira anu Naronde etu, mewali manotomo i petotokiNa. Ai sira anu manotomo i petotokiNa, Nakiraka sira peawa.
Baria ria anu pensani mogaaki kita lako i kamaasi ni Pue Ala
31 Ane tapepekiri apa anu nababeimo ni Pue Ala si kita, kamonsona: Ane i Pue Ala mbai si kita, ima anu mobuku moewa kita! 32 Mogaloda Ana saduduaNa, baria Napokabosi; Natudu mai bona mamate mopasuru kita. Mewali, ane Ana saduduaNa baria Napokabosi, manoto kaina Nakirakana mbui kita sinangka-nangkana anu mobundu i rara nu katuwuta. 33 Imapae anu pensani mosalai kita anu napelisimo ni Pue Ala? Baria ria! Lawi i Pue Ala saduduaNa anu manguli kabarianamo ria salata. 34 Imapae anu pensani manguli sangangaa rasuku kita? Baria ria! Lawi i Yesu Kerisitu anu mamate mosuru dosata. Ai melumbu lako i se etu, Ia tuwu mpesolamo ai momeso mbai i kuana ni Pue Ala. I Yesu Kerisitu etu anu mamperurui kita i lio ni Pue Ala.
35 Ima anu pensani mogaaki kita lako i asi ni Kerisitu? Baria ria! Lawi naudapae narumpa kita nu kasusa ba kapari, ba pepopesiasi, ba oro, ba kamakura, ba pepakaeka, ba pepopate. Asi ni Kerisitu batena ria si kita. 36 Ewa anu teuki i rara Sura Ngkora Magali ni banimpia:
“O Pue, ria liliu sira tau anu mampenoka mampopate kami
nakenimpeulaki si Iko.
Kami ei ewa dimba anu ina rasambale.” (Dulua Petoia 44:23)
37 Agaiana, nauda ba apa ngkida anu morumpa kita batena menangi liliu kita, ai maruminsi mpuu penangita nakenimpepokakaia ni Yesu si kita! 38 Lawi kupotuu, malompe kamate ba katuwu, malompe malaeka-malaeka ba kuasa-kuasa anu madaa, malompe anu ria ei-ei ba i eo anu ina mai, 39 ba kuasa-kuasa ntanina, malompe anu ria i wongko ba anu i woi, ai ba apa ngkida anu ntanina, baria ina pensani mogaaki kita lako i pepokakaia ni Pue Ala, anu napatongawamo ni Pue Ala mampoliungi i Yesu Kerisitu, Pueta.