Sura ni Suro Paulu anu mpolinguruna napakatuka jumaa i kota
Korintu
Pepuua lolita
Korintu iamo kota anu mabose i tana Akaya. Ni banimpia mawori tau anu meari i Korintu baria mani sira manginsani i Pue Yesu. Mpolinguruna i Paulu anu mobambari Bambari Malompe i Korintu, ai meari ia i se etu sampae santongo (Suro 18:1-11). Awetu lambu i Paulu lako i Korintu, lau mobambari Bambari Malompe i boea ntanina, dongkamo sadua tadulako nu tau anu mepotuu si Kerisitu anu mapande mololita, sangana i Apolo (Suro 18:24–19:1). I Apolo etu, mopaliliu bago ni Paulu mopaguru ai mokadipuraka tau anu mepotuu si Kerisitu i Korintu (3:6).
Baria masae lako ni se etu, tau anu mepotuu si Kerisitu i Korintu mouki sambua sura anu rapakatu si Paulu. I rara nu surara, basangkia mpangka pampekunera. Etumo mpane i rara nu sura ei, i Paulu mosonoi pampekunera etu (7:1, 25; 8:1; 12:1; 16:1, 12). Ria mbui bambari anu naepe ni Paulu anu manguli kabariana malompe babeia nu tau anu mepotuu si Kerisitu i Korintu (1:10-11; 5:1; 11:18; 15:12). Etumo mpane i Paulu mokambaroka sira bona ntena sira mombembesese ai mobabei babeia anu merikati (watina 1-6).
I rara nu sura ei, i Paulu mopatudu mbui sira kono i ada potombi (watina 7), pangkoni anu rapopenomba i anitu (watina 8-10), ada petolombu (11:2-16), ada mangkoni roti ai manginu anggoro (11:17-34), pewati lako i Inosa Magali (watina 12, 14), ai katuwura mpesola tau anu mamate (watina 15). I watina 13, i Paulu mopakanotoka kita apa anu paraluu mpii, iamo sangangaa mombepokaasi kita.
Isi nu Sura
1. Tabea: I Paulu manguli maisi kalompena si Pue Ala (1:1-9)
2. I Paulu mokambaroka toKorintu (1:10–6:20)
a. Baria sira mosintuwu, ai ria sira anu mosapuaka kuasa ni Paulu (1:10–4:21)
b. Ria sadua tomoane anu mampotombika towawine nu tuamana anu karoduanamo (5:1-13)
c. Ria sira anu mosalai pokara sampepepotuura i topoparenta (6:1-11)
d. Ria sira anu mobabei babeia anu rababei nu tau anu merikati (6:12-20)
3. I Paulu mepatudu kono i ada potombi (7:1-40)
4. I Paulu mepatudu kono i pangkoni anu rapopenomba i anitu (8:1–11:1)
5. I Paulu mepatudu kono i ada petolombu i tempona menomba (11:2-16)
6. I Paulu mepatudu kono i ada mangkoni roti ai manginu anggoro i pangkaendora kamate ni Pue Yesu (11:17-34)
7. I Paulu mepatudu kono i pewati anu lako i Inosa Magali (12:1–14:40)
8. I Paulu mepatudu kono i katuwura mpesola tau anu mepotuu si Kerisitu lako kamate (15:1-58)
9. I Paulu mampololita, kono i doi anu ragulu bona rapakatuka sira tau anu mesiasi katuwura i kota Yerusale (16:1-4)
10. Pamperade ni Paulu kasopoana ai tabea (16:5-24)