11
1 Nipeulai apa anu kubabei, ewa etu pangulaku i Kerisitu.I Paulu mampololita ada petolombu i paminggua
2 Kaliliuana poka-poka, kutoia komi lawi i pangka-pangkana nikaendo liliu aku, ai nipeulai liliu patuduku anu kupadongkaka komi. 3 Agaiana ria anu ina kuulika komi bona niinsani: I Kerisitu iamo woo nu ope-ope tomoane. Ai tomoane mbui iamo woo nu towawinera, ai i Pue Ala iamo woo ni Kerisitu. 4 Mewali, ane sadua tomoane metolombu i tempona mekakae ba mopadongka lolita lako si Pue Ala i tempona menomba, tomoane etu mopakoi i Kerisitu anu mewali Woona. 5 Ai, ane sadua towawine baria metolombu i tempona mekakae ba mopadongka lolita lako si Pue Ala i tempona menomba, towawine etu mopakaea tomoanena anu mewali woona. Kamonsona towawine anu baria metolombu etu, simbela ngkida ewa towawine anu rakoumo wuluana. 6 Mewali, ane ria towawine anu baria mangunde metolombu i tempona mekakae ba mopadongka lolita lako si Pue Ala, aginamo rakou ngkimo wuluana. Agaiana, ane rakou ia, etu mewali pepakaea si ia. Etumo mpane, malompe mani ane metolombu ia.
7 Tomoane anu mekakae sira ba mopadongka lolita lako si Pue Ala, inee sira metolombu, lawi tomoane rateru mopatongawa peawa ni Pue Ala. Agaiana towawine mopatongawa kateadai nu tomoanena, 8 lawi tomoane baria Nateru lako i towawine, agaiana towawineda anu Napopewali lako i tomoane. 9 Ai ewa etu mbui, tomoane baria rateru bona motulungi towawinena, agaiana towawinenada anu Napopewali bona motulungi tomoanena. 10 Etumo puuna, mpane towawine sangangaa metolombu, mewali tanda kariana kuasara mekakae si Pue Ala. Babeiara etu, mopakatono malaeka-malaeka.
11 Agaiana i rara mpepotuuta si Pue, towawine mobundu i tomoane, awetu mbui tomoane mobundu i towawine. 12 Lawi naudapae towawine rapopewali lako i tomoane, agaiana roo awetu, ope-ope tomoane rapoanaka nu towawine. Ai sinangka-nangkana puuna lako si Pue Ala.
13 Nipepekiri lompe: sintotopae ane sadua towawine mekakae si Pue Ala i tempona menomba, baria ia metolombu? 14 Anu tainsani, ane ria sadua tomoane anu mandoe wuluana, tauli baria sintoto. 15 Agaiana towawine, wuluana anu mandoe etu napomabose i rarana, lawi wuluana etu nakiraka ni Pue Ala, napopobundu mobobongi woona. 16 Ane ria anu mobesoi anu kuuli ei, ina kusonoi: kami ba jumaa anu ntanina, anu paka kibabei iamo towawine i tempona mekakae sangangaa metolombu.
Babeia anu baria sintoto lako baria mani mangkoni roti ai manginu anggoro
17 Kaliliuana, ria mbui anu kupenoka kuulika komi. Agaiana anu kuuli ei, baria petoia si komi nakeni nu babeiami. Lawi poterusumi menomba baria moparia anu malompe, agaiana mangkenida komi i babeia anu madaa. 18 Mpolinguruna, kuepe bambari anu manguli: ane moterusu komi menomba, ria posisalami sadua ai sadua. Ai kupekiri bambari etu batena mamonso! 19 Lawi kuinsani sangangaa mosisala komi, bona tongawa ba ima anu maroso peulana si Pue. 20 Ane mogulu simbela komi, baria nibabei apa anu sintoto i pangkoni roti ai panginu anggoro mokaendo kamate ni Pue Yesu. 21 Lawi i tempomi mangkoni simbela, lako baria mani komi mangkoni roti ai manginu anggoro mangkaendo kamate ni Pue Yesu, ria basangkia komi anu kasaliu mangkoni pangkonimi saduduami. Kasopoana ria komi anu maoro mpane anu ntanina mbui manginu duduuna malangu. 22 Bariapae komi ketombi? Aginamo mangkoni ai manginu nsalaa komi i rara nu tombimi mangula peundeami. Mangkiada mpane nibabei ewa etu? Ba niunde mopakoi singka rangami anu mepotuumo si Kerisitu? Mpane mopakaea sira pokami anu mesiasi katuwura? Apa anu sangangaa kuulika komi? Sintotopae kutoia komi i babeiami etu? Baria! I babeiami etu, baria komi kutoia.
23 Lawi ni banimpia, kupatudukamo komi apa lempona mangkoni ai manginu simbela, mokaendo kamate ni Pue Yesu. Ai apa anu kupatuduka komi etu, kusumba lako si Pue Yesu. I kawengi etu lako baria mani Ia napobalu ni Yudasi, i Pue Yesu mangala roti 24 ai manguli maisi kalompena si Pue Ala. Roo awetu, Nabinse-binsemo roti etu mpane Naulika sira topeguruNa, “Eimo wotoKu anu Kususu mopasuru komi. Nibabeimo atura ei bona nikaendo Aku.” 25 Ewa etu mbui, awetu roomo sira mangkoni roti, Nasusukamo sira panginua anu keisi anggoro, Naulika sira, “Anggoro ei, lempona dandi ni Pue Ala anu bou anu mopasintuwu i Pue Ala ai manusia. Dandi ei Napakaroso ai raaKu anu tebubu i kamateKu. Bela-belana niinu, nibabei bona nikaendo Aku.” 26 Mewali, bela-belana komi mangkoni roti ai manginu anggoro mokaendo kamate ni Pue, babeiami etu mobambari kamate ni Pue duduuna i kadongkaNa mpesola.
27 Mewali, ima anu mangkoni roti ai manginu anggoro mangula dala anu baria sintoto, tau etu madosa i lio ni Pue, lawi baria moadai woto ai raa ni Pue Yesu anu rapandiri ewa roti ai anggoro. 28 Etumo mpane, lako baria mani kita mangkoni roti ai manginu anggoro mangkaendo kamate ni Pue Yesu, aginamo ope-ope tau moparesa nsalaa rarana. 29 Lawi tau anu baria mobila pangkoni roti ai panginu anggoro anu mopatongawa woto ni Kerisitu, ina nasuku sira ni Pue Ala. 30 Etumo puuna, mpane ria sira tau wori i olomi anu madua ai malede, ai ria mbui rangami anu mamate. 31 Agaiana ane taparesa nsalaa rarata, baria kita ina nasuku ni Pue. 32 Agaiana ane nasuku kita ni Pue, lempona ai pesukuNa etu Napatudu kita ewa sadua tuama mopatudu anana, bona ntena kita rasuku simbela-mbela ai tau anu baria manginsani i Pue, i eo kasopoa dunia.
33 Mewali pokaku, ane moterusu komi mangkoni simbela, aginamo mombepegia nsalaa komi. 34 Ane ria komi anu maoro lako baria mani komi lau, aginamo mangkoni nsalaa komi i tombimi. Ane nipeulai etu, i pogulu-gulumi menomba etu, baria ina nisumba pesuku lako si Pue.
Pampekunemi anu ntanina, ina kupakanotoka komi ane dongka aku luwu si komi.