I Paulu mampopaingaka sira tau ni Pue Ala bona inee sira menomba i anitu
10
1 Poka-poka, nikaendo apa anu mewali i ulububuta ni banimpia anu nakeni ni nabi Musa mopalengi tana Masiri. Nanini sira ni Pue Ala ai gawu anu mampoilodoka sira i polumakoara. Ope-ope sira moweta tasi Tiberau anu napopogaa ni Pue Ala, bona pensani rapoliungira. 2 Sira ewa rariu ai gawu ai ue, bona mewali topeula ni Musa. 3-4 Ope-ope sira mangkoni pangkoni ai manginu panginu anu simbela. Pangkonira ai panginura etu, iamo anu lako si Pue Ala. Manginu sira ue anu mensuwu lako i watu mabose, ai watu etu rapandirira i Kerisitu anu mamporangai sira. 5 Nauda ope-ope sira mansumba pewati lako si Pue Ala, agaiana nakeni nu babeiara anu madaa, mawori lako olora baria sira napokatono ni Pue Ala, etumo mpane mamate sira ai wotowatara masawu i pada lori.6 Ope-ope anu mewali i ulububuta ni banimpia, mobundu si kita ei-ei, lawi tasumba patudu lako i katuwura ntena kita mampenoka apa anu madaa ewa sira. 7 Ai inee kita menomba i anitu, ewa anu rababei nu tau i olora ni banimpia. Ewa teuki i rara Sura Ngkora Magali anu manguli:
“Mangkoni ai manginu sira simbela-mbela,
ai roo awetu motaro-taro sira ai menomba sira i anitu.” (Pensuwu nu toSaraeli 32:1-6)
8 Inee kita mobabei babeia anu merikati, ewa anu rababei nu tau i olora ni banimpia. Nakeni nu babeiara anu madosa etu, mamate sira rompulu tolu nsobu tau i rarana saeoa. 9 Inee kita mampetandaka i Kerisitu, ewa anu rababei nu tau i olora ni banimpia, duduuna mamate sira natilo nu ule. 10 Ai inee kita modeade, ewa anu rababei nu tau i olora ni banimpia, duduuna napopate sira nu malaeka anu mepopate.
11 Ope-ope anu mewali si sira ni banimpia, sangangaa tapairara mewali pandiri si kita ei-ei. Ai ope-ope anu mewali etu, teuki bona ntena kita mansumba pesuku ni Pue Ala ewa sira. Lawi kita ei-ei, tuwu kita gompimo i kasopoa dunia. 12 Mewali, ane ria komi anu manguli, “Maroso mpuu pepotuuku si Pue,” sangangaa mainga-inga komi bona ntena komi manawu i rara dosa! 13 Sinangka pekelo anu morumpa komi, pekelo biasa ngkida anu rasumba mbui nu tau ntanina. Agaiana i Pue Ala mokaendo liliu dandiNa si komi: baria komi ina Napogeaka rakelo melumbu lako i roso nu rarami. Bela-belana narumpa komi nu pekelo, i Pue Ala ina mokiraka komi dala, bona pensani komi tetida i rara nu pekelo.
14 Mewali, poka-poka anu kupokaasi, inee komi menomba i anitu! 15 Kuulika komi: kuimbamo komi ewa tau anu matopa nibuku moparesa pololitaku ei, ba mamonso ba baria. 16 I tempota manginu anggoro mangkaendo kamate ni Pue, ai tauli maisi kalompena si Pue Ala, etu mopakanoto posintuwuta ai raa ni Kerisitu. Ewa etu mbui i tempota mangkoni roti anu rabinse-binse mangkaendo kamate ni Pue, etu mopakanoto posintuwuta i rara woto ni Kerisitu. 17 Lawi saogu roti anu ratibo-tiboka kita, ai sadua-sadua kita mangkoni lako i roti etu. Lempona: Naudapae kita mawori, agaiana sawoto ngkida kita i posintuwuta ai Kerisitu.
18 Ewa etu mbui ada nu toSaraeli. Ane mosusu sira popenombara si Pue Ala i wongko meja potunua popenomba, sangangaa rakonira sangkira lako i popenomba etu, tanda posintuwura ai i Pue Ala. 19 Apa anu kutunggai i pololitaku etu? Malompe anitu ba pangkoni anu rapopenomba i anitu baria ria kuasana! 20 Tunggaiaku: ope-ope anu rapopenomba i anitu, baria rapopenomba si Pue Ala, rapopenombada i seta. Ai baria kuunde ane mosintuwu komi ai seta. 21 Baria komi sintoto manginu anggoro i penombami si Pue, mpane manginu mbui komi anggoro i tempona rapopenomba i seta. Baria sintoto ane mangkoni komi roti mangkaendo kamate ni Pue, mpane mangkoni mbui komi roti i tempona rapopenomba i seta. 22 Ba pebai komi mopakarumpu i Pue? Ba niuli melumbu karosomi mpane lako i Pue?
Pangkoni anu rapopenomba i anitu ai rapobalu i pobalu-balua pensani rakoni
23 Ria komi anu manguli, “Pensani kita mobabei apa ngkida peundeata.” Mamonso, agaiana kuulika komi: ria anu mobundu tababei; ria mbui anu baria mobundu. Pensani kita mobabei apa peundeata, agaiana baria ope-ope anu ina mopakaroso rara nu rangata. 24 Inee tababei apa anu wule motulungi wotota saduduata. Agaiana sangangaa tababei mbui apa anu motulungi rangata.
25 Bau apa ngkida anu rapobalu i pobalu-balua, pensani tabaluki ai takoni. Inee tapekune ba rapopenombamo i anitu ba baria mani. Bona ane takoni baria ria kamasala anu mensuwu lako i rarata, 26 lawi ria teuki i rara Ngkora ni Pue Ala:
“Dunia ai ope-ope isina,
i Pue Ala tumpuna.” (Dulua Petoia 24:1)
27 Ane ria komi anu naronde nu rangami, anu baria sira mepotuu si Kerisitu lau mangkoni i tombira, ai niunde lau mangkoni simbela, nikoni apa anu rasusuka komi. Inee nipekune ba rapopenombamo i anitu bau etu ba baria mani, bona ane nikoni baria ria kamasala anu mensuwu lako i rarami. 28 Agaiana ane ria sira anu mangulika komi, “Bau etu rapopenombamo i anitu,” aginamo inee nikoni lawi moadai komi tau anu mangulika komi etu. 29 Tunggaiaku ewa ei: baria rarami anu mapari, agaiana rara nu tau anu mangulika komi etuda anu mapari.
Mewali pekiri ria komi anu ina manguli ewa ei, “Mangkiada mpane peundeaku pensani rasomboki nu tau ntanina? 30 Ane kukoni bau etu, ai kuulimo maisi kalompena si Pue Ala, mangkiada mpane ria sira tau anu mosalai aku?” 31 Agaiana kuulika komi: ane mangkoni komi ba manginu komi, ba apa ngkida anu nibabei, nibabeimode bona i Pue Ala ratoia. 32 Inee kita mobabei apa anu mopakanawu rangata i rara nu dosa, malompe toYahudi ba tau anu baria sira toYahudi ba tau anu mepotuu si Kerisitu. 33 Ewa aku mbui, i pangka-pangkana kubabei liliu apa anu malompe i petotoki nu ope-ope tau. Baria kukadelo apa anu mobundu i wotoku saduduaku ngkida, agaiana kubabei apa anu ina mobundu i tau wori bona mansumba sira katuwu malompe anu baria mokasopoa.